މިދިޔަ ހުކުރު ދުވަހު މާލެއަށް ކުރި ވިއްސާރައިގައި ގެއްލުންވި 141 ގޭގެ ތެރެއިން 112 ގެއެއްގެ ޑެމޭޖް އެސެސްމަންޓް މިހާރު ހަދާ ނިމިފައިވާ ކަމަށް ނޭޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ)އިން މިއަދު ބުނެފިއެވެ.
ހުކުރު ދުވަހުގެ މެންދުރު ފަހު ވެހެން ފެށި ވާރޭގައި މުޅި މާލޭގައި ފެންބޮޑުވުމުގެ ސަބަބުން 36 ގެއެއްގެ 226 މީހަކަށް ވަގުތީ ބޯހިޔާވަހިކަމާއި ކެއިންބުއިމުގެ އެހީތެރިކަން އެންޑީއެމްއޭއިން ފޯރުކޮށްދިނެވެ. އެއީ އެއް ދުވަހުގެ މުއްދަތަކަށެވެ.
އެއާއެކު ގެއްލުން ލިބުނު ގޭގެއަށް ގޮސް ޑެމޭޖް އެސެސްމެންޓު ހެދުމުގެ މަސައްކަތް އެންޑީއެމްއޭއިން ފެށީ ހޮނިހިރު ދުވަހެވެ.
'އެކްސް'ގައި ކުރި ޕޯސްޓެއްގައި އެންޑީއެމްއޭއިން ބުނީ ހުކުރު ދުވަހު މާލެއަށް ކުރި ވިއްސާރައާއި ގުޅިގެން ޑެމޭޖް އެސެސްމަންޓް ހަދަންޖެހޭ ކަމަށް އެ އޮތޯރިޓީއަށް ފާހަގަކުރެވުނު 141 ގޭގެ ތެރެއިން 112 ގޭގެ އެސެސްމަންޓް މިހާތަނަށް ވަނީ ހަދާ ނިމިފައި ކަމަށެވެ. އަދި 13 ގެއަކުން އެސެސްމަންޓް ހަދަން ބޭނުން ނުވާ ކަމަށް އަންގާފައިވާ ކަމަށް އެ އޮތޯރިޓީން ބުންޏެވެ.
އަދި އެކި ސަބަބުތަކާ ހެދި 16 ގެއެއެއްގެ އެސެސްމަންޓް ހަދާ އަދިވެސް ނުނިމޭ ކަމަށް އެންޑީއެމްއޭއިން ބުންޏެވެ. އެ ގެތަކަށް ޒިޔާރަތްކޮށް އެސެސްމަންޓް ހެދުން މާދަމާގެ ނިޔަލަށް އެއްކޮށް ފުރިހަމަކުރެވޭނެ ކަމަށް ލަފާ ކުރެވޭ ކަމަށް ވެސް އެންޑީއެމްއޭއިން ބުންޏެވެ.
އެ މަސައްކަތުގައި އެންޑީއެމްއޭގެ އިތުރުން މިނިސްޓްރީ އޮފް ސޯޝަލް އެންޑް ފެމެލީ ޑިވިލޮޕްމެންޓް އަދި ދިވެހި ރެޑް ކްރެސެންޓުން ބައިވެރިވެފައިވެއެވެ.
މާލޭގެ އިތުރުން އަތޮޅު ތެރޭގެ ރަށްތަކަށް ވެސް މި ވިއްސާރައިގައި އެކިވަރުގެ ގެއްލުންތައް ލިބިފައިވެއެވެ. އެ ގެއްލުންތައް ދެނެގަތުމަށް ރަށު ކައުންސިލްތަކާ ގުޅިގެން މަސައްކަތް ކުރަމުން އަންނަ ކަމަށް އެންޑީއެމްއޭއިން މީގެ ކުރިން ވަނީ ބުނެފައެވެ.
މާލޭގައި ފެންބޮޑުވެ، 500 އަށްވުރެ ގިނަ ތަނަށް ފެން ވަންނާތީ ރިޕޯޓުކޮށްފައިވެއެވެ.
އެންޑީއެމްއޭއިން ބުނީ، ފެން ބޮޑުވުމުގެ ސަބަބުން 774 ތަނަކުން އެކިއެކި އެހީތެރިކަމަށް އެދި ރިޕޯޓުކޮށްފައިވާ ކަމަށެވެ. އޭގެ ތެރެއިން، 554 ރިކުއެސްޓަކީ ވެލި ބަސްތާ ޖަހައިދިނުމަށް އެދި ކޮށްފައިވާ ރިކުއެސްޓެވެ.
ޒަރޫރީ ބޭނުންތަކަށް ހުރަސްއެޅިގެން 53 ގެއަކުން ރިޕޯޓުކުރިއިރު އެ ތަންތަނުގެ ރެޕިޑް އެސެސްމަންޓު ހަދާފައިވާ ކަމަށް އެންޑީއެމްއޭއިން ބުންޏެވެ. އޭގެ ތެރެއިން އާންމު ދިރިއުޅުމަށް ހުރަސްއެޅޭ ހާލަތުގައި ހުރި 36 ގެއަކުން 226 މީހަކަށް ވަގުތީ ބޯހިޔާވަހިކަން ފޯރުކޮށްދީ، ކެއިންބުއިމުގެ އެހީތެރިކަން ފޯރުކޮށްދީފައިވާ ކަމަށް އެންޑީއެމްއޭއިން ބުންޏެވެ.