ރާއްޖެއަށް ކުރަމުންދާ ވިއްސާރައިގައި ގެއްލުން ލިބުނު ގޭގެއަށް ގޮސް ޑެމޭޖް އެސެސްމެންޓު ހެދުމުގެ މަސައްކަތް މާދަމާ ފަށާނެ ކަމަށް ނޭޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ)އިން ބުނެފިއެވެ.
އިއްޔެ މެންދުރު ފަހު ވެހެން ފެށި ވާރޭގައި މުޅި މާލޭގައި ފެންބޮޑުވުމުގެ ސަބަބުން 36 ގެއެއްގެ 226 މީހަކަށް ވަގުތީ ބޯހިޔާވަހިކަމާއި ކެއިންބުއިމުގެ އެހީތެރިކަން އެންޑީއެމްއޭއިން ވަނީ ފޯރުކޮށްދީފައެވެ.
"ސަން"އަށް މައުލޫމާތު ދެއްވަމުން އެންޑީއެމްއޭގެ ސީއީއޯ ހިސާން ހަސަން ވިދާޅުވީ ވިއްސާރައިގައި ގެތަކަށް ލިބުނު ގެއްލުމާ ގުޅިގެން އެހީތެރިކަން ފޯރުކޮށްދިން 226 މީހުންނަށް ބޯހިޔާވަހިކަން ހަމަޖައްސައިދީފައިވަނީ ހޮޓެލްތަކުން ކަމަށެވެ. އެއީ އެއް ދުވަހުގެ މުއްދަތަކަށެވެ.
ގެއްލުން ލިބުނު ފަރާތްތަކުން މިހާރުދަނީ އެ މީހުންގެ ގެތަކަށް ލިބުނު ގެއްލުންތައް ދެނެގަންނަމުން ކަމަށާއި، އެންޑީއެމްއޭއިން އެ ގެތަކަށް ގޮސް އެސެސްމެންޓު ހަދަން ފަށާނީ މާދަމާއިން ފެށިގެން ކަމަށް އޭނާ ވިދާޅުވިއެވެ. ހިސާން ވިދާޅުވި ގޮތުގައި ޑެމޭޖް އެސެސްމެންޓުގެ ކުރިން ވަގުތުކޮޅެއް ދެނީ، ގެތަކުގެ ވެރިފަރާތުން ލިބުނު ގެއްލުންތައް ދެނެގަތުމުން، އެންޑީއެމްއޭއަށް އެސެސްމެންޓު ފުރިހަމަކުރުމަށް ފަސޭހަވާނެތީއެވެ.
މި ގޮތަށް ލިބޭ ގެއްލުންތަކަށް އެހީތެރިކަން ފޯރުކޮށްދޭއިރު، އެއްވެސް އިރެއްގައި ވިޔަފާރިތަކަށް ލިބުނު ގެއްލުންތައް ވަޒަންކޮށް، އެންޑީއެމްއޭއިން ބަދަލެއް ނުދެއެވެ. މީގެ ތެރޭގައި ފިހާރަތަކާއި ކެފޭ އަދި ހޮޓާ ރެސްޓޯރެންޓުތަކުގެ އިތުރުން ގުދަން ފަދަ ތަންތަން ހިމެނެއެވެ.
ހިސާން ވިދާޅުވި ގޮތުގައި އެ ތަންތަނަށް ލިބުނު ގެއްލުމުގެ ބަދަލު ހޯދަން ޖެހޭނީ އިންޝޫރެންސް މެދުވެރިކޮށެވެ.
"އެއްވެސް އިރެއްގައި ފިހާރަ، ވިޔަފާރި، ރެސްޓޯރެންޓުތަކަކީ އެސެސްމެންޓު ހަދައި، ސަރުކާރުން ބަދަލުދޭ ތަންތަނެއް ނޫން. އެ ފަރާތްތަކަށް ބަދަލު ހޯދުމަކީ އިންޝޫރެންސްގެ ތެރެއިން ހޯދަން ޖެހޭ ކަންކަން," ހިސާން ވިދާޅުވިއެވެ.
މާލޭގެ އިތުރުން އަތޮޅު ތެރޭގެ ރަށްތަކަށް ވެސް މި ވިއްސާރައިގައި އެކިވަރުގެ ގެއްލުންތައް ލިބިފައިވެއެވެ. އެ ގެއްލުންތައް ދެނެގަތުމަށް ރަށު ކައުންސިލްތަކާ ގުޅިގެން މަސައްކަތް ކުރަމުން އަންނަ ކަމަށް ހިސާން ވިދާޅުވިއެވެ.
މާލޭގައި ފެންބޮޑުވެ، 500 އަށްވުރެ ގިނަ ތަނަކަށް ފެން ވަންނާތީ ރިޕޯޓުކޮށްފައިވެއެވެ.
އެންޑީއެމްއޭއިން ބުނީ، ފެން ބޮޑުވުމުގެ ސަބަބުން 774 ތަނަކުން އެކިއެކި އެހީތެރިކަމަށް އެދި ރިޕޯޓުކޮށްފައިވާ ކަމަށެވެ. އޭގެ ތެރެއިން، 554 ރިކުއެސްޓަކީ ވެލި ބަސްތާ ޖަހައިދިނުމަށް އެދި ކޮށްފައިވާ ރިކުއެސްޓެވެ.
ޒަރޫރީ ބޭނުންތަކަށް ހުރަސްއެޅިގެން 53 ގެއަކުން ރިޕޯޓުކުރިއިރު އެ ތަންތަނުގެ ރެޕިޑް އެސެސްމަންޓު ހަދާފައިވާ ކަމަށް އެންޑީއެމްއޭއިން ބުންޏެވެ. އޭގެ ތެރެއިން އާންމު ދިރިއުޅުމަށް ހުރަސްއެޅޭ ހާލަތުގައި ހުރި 36 ގެއަކުން 226 މީހަކަށް ވަގުތީ ބޯހިޔާވަހިކަން ފޯރުކޮށްދީ، ކެއިންބުއިމުގެ އެހީތެރިކަން ފޯރުކޮށްދީފައިވާ ކަމަށް އެންޑީއެމްއޭއިން ބުންޏެވެ.