މި އަހަރުގެ އޮކްޓޫބަރުމަހުގައި ގައުމީ އެއާލައިން، މޯލްޑިވިއަނުން ގެންނަ ވައިޑް-ބޮޑީ މަތިންދާބޯޓު، އެއާބަސް އޭ-330ގެ ދެވަނަ ބޯޓުގެ އުދުހުންތައް ފަށާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ މޯލްޑިވިއަނުން މުޅީން އަލަށް ވައިޑް-ބޮޑީ އެއާކްރާފްޓު އޮޕަރޭޝަން ފެށުމަށް ޓަކައި މިއަދި ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ގައުމީ އެއާލައިންގެ ފްލީޓަށް ވައިޑް-ބޮޑީ މަތިންދާބޯޓު، އެއާބަސް އޭ-330ގެ ދެ ބޯޓު ގެނެސް، ޚިދުމަތް ފެށުމަކީ ރައީސްގެ ރިޔާސީ ވައުދެކެވެ. އޭގެ ތެރެއިން ފުރަތަމަ ބޯޓު މިއަދު ވަނީ ރާއްޖެ ގެނެސްފައެވެ. ރައީސް ވިދާޅުވީ ދެވަނަ ބޯޓު ރާއްޖެ ގެނެސް، ހުރިހާ މަރުހަލާއެއް ނިމި، އޮކްޓޫބަރުގައި އުދުހުންތައް ފަށާނެ ކަމަށެވެ.
މޯލްޑިވިއަންގެ ފުރަތަމަ ވައިޑްބޮޑީ އެއާކްރާފްޓް އޭ330-200 ގެނައުމުގެ ރަސްމިއްޔާތުގައި ރައީސް ވާހަކަފުޅުދައްކަވަނީ -- ފޮޓޯ: ރައީސް އޮފީސް
މިއަދު ގެނައި ބޯޓާއެކު ވެސް ޗައިނާގެ ތިން މަންޒިލަކަށް ދަތުރުތައް ފެށުމަށް ވަނީ ހަމަޖެހިފައެވެ. އެއީ ބެއިޖިން، ޝަންގްހާއި އަދި ޗެންގްޑޫއަށެވެ.
ރައީސް ވިދާޅުވީ އައު މަންޒިލްތަކަށް ދަތުރުތައް ފެށުމަކީ އިތުރު ޓޫރިސްޓުން ރާއްޖެއަށް ގެނެވި، އިގުތިސާދު ފުޅާކުރުމަށް ލިބޭ ވަރަށް ބޮޑު ކުރިއެރުމެއް ކަމަށެވެ.
"ކުރިޔަށް މި އޮތް ދުވަސްތަކުގައި އައިލެންޑް އޭވިއޭޝަނަށް ވެސް އަދި އެމްއޭސީއެލްއަށް ވެސް އިތުރު ކުރިއެރުންތައް އަޅުގަނޑުމެން ގެނެސް، ވަރަށް ގިނަ ހަރުފަތްތަކެއް ކުޑަ ދުވަސްކޮޅެއްގެ ތެރޭގައި، މި އަހަރުގެ ތެރޭގައި ގިރާކުރާނެ" ރައީސް ވިދާޅުވިއެވެ.
ރައީސް ވިދާޅުވި ގޮތުގައި މި އަހަރުގެ ތެރޭގައި ރައްޔިތުންނަށް އަމަލީ ގޮތުން ތަރައްގީ ފެނިގެންދާނެއެވެ.
މި އަހަރުގެ ތެރޭގައި ޗައިނާއާއި ޔޫރަޕްގެ މަންޒިލްތައް ހިމެނޭހެން އިތުރު ހަތް މަންޒިލަކަށް ދަތުރުތައް ފަށަން މޯލްޑިވިއަންއިން ވަނީ ނިންމައިފައެވެ.
އޭގެ ތެރޭގައި ޗައިނާގެ ތިން ސިޓީގެ އިތުރުން، ސައުތު އެފްރިކާގެ ޖޮހޭނަސްބާގާއި ޔޫރަޕްގެ ތިން ސިޓީއެއް ހިމެނެއެވެ.
މޯލްޑިވިއަންގެ ފުރަތަމަ ވައިޑްބޮޑީ އެއާކްރާފްޓް އޭ330-200 އާއެކު ސަރުކާރުގެ ވެރިންނާއި، މޯލްޑިވިއަންގެ ވެރިން ނެގި ގްރޫޕްފޮޓޯ -- ފޮޓޯ: ރައީސް އޮފީސް
މީގެ ކުރިން މޯލްޑިވިއަން އެއާލައިންގެ އެއާބަސް ބޭނުންކޮށްގެން ޗައިނާ އާއި ސައުތު އެފްރިކާއަށް ދަތުރުކުރިއެވެ. ނަމަވެސް، އޭރު ގެންގުޅުނީ ދިގު ދަތުރުތައް ކުރެވޭ ވަރުގެ ބޯޓުތަކަކަށް ނުވުމުން ދަތުރުތައް ކުރީ އެހެން މަންޒިލްތަކަށް ޓްރާންސިޓް ކޮށްގެންނެވެ.
މި ވަގުތު މޯލްޑިވިއަންގެ ފްލީޓުގައި 13 ބޯޓު އެބައޮތެވެ. އޭގެ ތެރޭގައި އެއާބަސް އޭ320 މަރުކާގެ އެއް ބޯޓާއި އޭޓީއާރްގެ ހަތަރު ބޯޓު ހިމެނެއެވެ. ބާކީ ހުރީ ޑޭޝް މަރުކާގެ ބޯޓުތަކެވެ. ބޭރު ދަތުރުތައް ކުރުމުގައި ގެންގުޅެނީ އެއާބަސް އޭ320 މަރުކާގެ ބޯޓެވެ.