މާލެ އަތޮޅު ގުޅިފަޅުގައި ހިއްކާފައިވާ ބިމުގައި މަގުތައް ހެދުމާއި، މުނިސިޕަލް އިންފްރާސްޓްރަކްޗާގެ ޚިދުމަތްތައް ގާއިމް ކުރުމަށް, ޗައިނާ މެޝިނަރީ އިންޖިނިއަރިން ކޯޕަރޭޝަން (ސީއެމްއީސީ)އާއި ދިވެހި ސަރުކާރާ ދެމެދު އެއްބަސްވުމެއްގައި މިއަދު ސޮއިކޮށްފިއެވެ.
މި ކަމަށް ޓަކައި ރައީސް އޮފީހުގައި މިއަދު ބޭއްވި ރަސްމިއްޔާތުގައި ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ އިންފްރާސްޓްރަކްޗަރު މިނިސްޓަރު ޑރ. އަބްދުﷲ މުއްތަލިބެވެ. އަދި ސީއެމްއީސީގެ ފަރާތުން ސޮއިކުރެއްވީ، އެ ކުންފުނީގެ ރީޖަނަލް ޖެނެރަލް މެނޭޖަރު ކިއަން ހައޮޖުން އެވެ.
މި ރަސްމިއްޔާތުގައި ވާހަކަ ދައްކަވަމުން، މިނިސްޓަރު ޑރ. މުއްތަލިބު ވިދާޅުވީ، މިއީ ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ދަތުރުފުޅުގައި ސޮއިކުރެއްވި, އެއްބަސްވުމެއްގެ ދަށުން ކުރެވޭ މަސައްކަތެއް ކަމަށެވެ.
މުއްތަލިބު ވިދާޅުވީ ސީއެމްއީސީއާއި އިންފްރާސްޓްރަކްޗަރު މިނިސްޓްރީއާ ދެމެދު ވަރަށް ގިނަ މަސައްކަތް ކުރެވިފައިވާ ކަމަށެވެ. އޭގެ ތެރޭގައި ޕްރޮޖެކްޓު ސްކޯޕިން ތައްޔާރުކުރުމުގެ އިތުރުން، ޓެކްނިކަލް ސްޕެސިފިކޭޝަން އަދި ޑިޒައިންގެ މަސައްކަތްތަކެއް ހިމެނެއެވެ.
މި މަޝްރޫއާގުޅޭ އެއްބަސްވުމަކަށް އައިސްފައިވަނީ ސީއެމްއީސީން ހުށަހެޅި ޕްރޮޕޯޒަލް އިވެލުއޭޓްކޮށް، އެއާމެދު މަޝްވަރާކުރުމަށް ފަހުގައެވެ. މި މަސައްކަތް އެ ކުންފުންޏާ ހަވާލުކޮށްފައިވަނީ ކޮންޓްރެކްޓާ ފައިނޭންސް އުސޫލުންނެވެ.
މި މަޝްރޫއުގެ ދަށުން ކުރިޔަށް ގެންދާނެ މަސައްކަތުގެ ތެރޭގައި:
- އިލެކްޓްރިސިޓީ ޑިސްޓްރިބިއުޝަން ނެޓްވޯކް ގާއިމުކުރުން
- ފެނާ ނަރުދަމާގެ ނިޒާމު ގާއިމުކުރުން
- ޑީވޯޓަރިން ސިސްޓަމް ގާއިމްކުރުން
- މަގުތައް ޒަމާނީ ފެންވަރަށް ހެދުން
- ޖީޕޮން ޑަކްޓިން ސިސްޓަމް ގާއިމްކުރުން
- ގޭސް ސްޓޯރެޖާއި ޑިސްޓްރިބިއުޝަން ސިސްޓަމް ގާއިމްކުރުން
މުއްތަލިބު ވިދާޅުވީ މިއަދު މި އެއްބަސްވުމުގައި ސޮއިކުރެވުމާއެކު، މަޝްރޫއުގެ ސާވޭ އަދި ޑީޓެއިލް ޑިޒައިންގެ މަސައްކަތް ކޮންޓްރެކްޓަރު ފަށާނެ ކަމަށާއި، މަސައްކަތު ސައިޓު ތައްޔާރު ކުރުމުގެ މަސައްކަތް ވެސް ލަސްތަކެއްނުވެ ފަށާނެ ކަމަށެވެ.
ގުޅިފަޅުން ވަނީ ގާތްގަނޑަކަށް 300 ހެކްޓަރުގެ ބިން ހިއްކައިފައެވެ. އެ ބިމުގެ ތެރެއިން ވަރަށް ބޮޑު ބައެއް ތިލަމާލެ ބްރިޖުގެ މަސައްކަތަށް ބޭނުންކުރަމުންދާތީ، މަސައްކަތް ކުރެވެންހުރި ބިންތަކުގައި މަސައްކަތް ފަށައިގަތުމަށް ނިންމާފައިވާ ކަމަށް މުއްތަލިބު ވިދާޅުވިއެވެ.
މި ރަސްމިއްޔާތުގައި ވާހަކަ ދައްކަވަމުން ސީއެމްއީސީގެ ޑެޕިއުޓީ ޖެނެރަލް މެނޭޖަރު ވަނީ އެ ކުންފުނިން ރާއްޖޭގެ މަޝްރޫއުތައް ހިންގުމުގައި 14 އަހަރަށްވުރެ ގިނަ ދުވަސްވެފައިވާ ކަމާއި، މިދިޔަ ދިހަ ވަރަކަށް އަހަރުގެ ތެރޭގައި މުހިންމު މަސައްކަތްތަކެއް ފުރިހަމަކޮށްފައިވާކަން ފާހަގަ ކުރައްވައިފައެވެ. އޭގެ ތެރޭގައި ހައުސިން އިންފްރާސްޓްރަކްޗާގެ މަސައްކަތްތަކާއި، މަގުހެދުމާއި ހަކަތައާ ގުޅޭ މަޝްރޫއުތައް ހިމެނެއެވެ.
ސީއެމްސީން ވަނީ އައްޑޫ ސިޓީގައި ޓޫރިޒަމް ކޮމްޕްލެކްސްއެއް ގާއިމް ކުރުމުގެ އެއްބަސްވުމެއްގައި ވެސް ސަރުކާރާ އެކު ސޮއިކޮށްފައެވެ. ސީއެމްސީއީއަކީ، 46 އަހަރުގެ އިންޖިނިއަރިން ދާއިރާގެ ތަޖުރިބާ ލިބިފައިވާ ކުންފުންޏެކެވެ. އަދި އެ ކުންފުނިންދަނީ 150 ގައުމެއްގައި އޮޕަރޭޓް ކުރަމުންނެވެ.