އެމެރިކާގެ މަޝްހޫރު ތަރިން ޖެނިފާ ލޮޕޭޒް (ޖޭލޯ)އާއި ބެން އެފްލެކްގެ ކައިވެނި ރޫޅި ވަރި ފައިނަލްވުމުގެ މަރުހަލާގައި އޮއްވައި ޖޭލޯ އާ ދިރިއުޅުމަކާ ދިމާލަށް މިސްރާބު ޖަހައިފި ކަމަށް ވާހަކަތަކެއް ދެކެވެން ފަށައިފިއެވެ.
އެފްލެކް ގާތުން ވަރިވުމަށް ޖޭލޯ ވަނީ ލޮސް އެންޖެލެސް ކައުންޓީ ސުޕީރިއާ ކޯޓަށް މައްސަލަ ހުށަހަޅާފައިވަނީ މިދިޔަ އަހަރުގެ އޭޕްރިލް މަހުގެ ތެރޭގައެވެ. ކައިވެންޏަށް ދެ އަހަރު ފަހުން ދެ މީހުން ވަރިވާން އުޅޭކަން އާންމުންނާ ހިއްސާކުރީ މިދިޔަ އޯގަސްޓް މަހުގެ ތެރޭގައެވެ.
އެކީގައި ލޯބިން އުޅެ އެންގޭޖުވުމަށް ފަހު، އެ ރޫޅި ދެ މީހުން އެތައް އަހަރެއްގެ ފަހުން ދިމާވެ، އަލުން ކައިވެނިކުރީ 2022 ވަނަ އަހަރެވެ. އެއާއެކު ޖޭލޯ ބުނަމުން ދިޔައީ ދެ މީހުން ދިމާވީ ވަރަށް ވަރުން އުޅެމުން ކަމަށެވެ. އަދި، އެތައް އަހަރެއް ވަންދެން، ކާމިޔާބުނުވެ އޮތް ލޯތްބަށް އުފާވެރި ނިމުމެއް ލިބި އާ ފެށުމެއް ފެށޭތީ ދުވަހަކު ނުވާ ފަދަ އުފަލެއްވެފައިވާ ކަމަށް ޖޭލޯ މީގެ ކުރީން ބުނަމުން ދިޔައެވެ.
ދެ މީހުންގެ ކައިވެންޏަށް އެއް އަހަރު ފުރުމުން ދެ މީހުންގެ ކައިވެނީގެ ހުވާތައް އާކޮށް އަލުން ކައިވެންޏެއް ކޮށްފައިވަނީ މިދިޔަ އަހަރެވެ. މިއީ 17 ވަރަކަށް އަރު ފަހުން ދެ މީހުން ދިމާވެ، ލޯބި އަލުން ފެށުމުގެ ހެއްކެއް ކަމުގައި ދެމަފިރިން ބުނަމުން ދިޔައެވެ.
ނަމަވެސް، މިހާރު ދެ މީހުންގެ ވަރި ފައިނަލްވަމުންދާއިރު ޖޭލޯ މިހާރު މިސްރާބު ޖަހާފައިވަނީ އޭނާއަށް ހިތް ހަމަޖެހޭ ދިރިއުޅުމަކަށް ބަދަލުވުމަކަށް ދިޔުމަށް ކަމަށް އެމެރިކާގެ ބައެއް ނޫސްތަކުން ބުނެއެވެ.
ޖޭލޯ މިހާރު ލޯބީގެ ގޮތުން މީހަކާ ގުޅިގެން އުޅޭ ކަމަށް ވެސް ބައެއް މީޑިއާތަކުން ބުނެއެވެ. އެގޮތުން، މަޝްހޫރު ތަރި ކަމަށްވާ ކެވިން ކޮޒްނާއާ އެކު ދާދި ފަހުން ފެނިފައިވުމާ އެކު އެއީ ޖޭލޯގެ ލޯބީގެ ވާހަތަކަށް ބާރުއަޅާ ކަމެއް ކަމަށް ބައެއް މީޑިއާތަކުން ބުނެއެވެ. ނަމަވެސް މިއިން އެއްވެސް ވާހަކައަކަށް ޖޭލޯ ރައްދެއް ދީފައެއް ނުވެއެވެ.
އޭނާ އަންނަނީ އޭނާގެ އަމިއްލަ ދިރިއުޅުމުގެ ވާހަކަ ސޯޝަލް މީޑިއާގައި ހިއްސާ ކުރަމުންނެވެ. އޭގެ ތެރޭގައި ޕްރޮޑަކްޓުތައް ލޯންޗުކުރުމާއި ދަތުރުތަކުގެ ވާހަކައް ހިމެނެއެވެ. ނަމަވެސް ލޯބީގެ އެއްވެސް ވާހަކައެއް އޭނާ ހިއްސާކޮށްފައެއް ނުވެއެވެ.