އާއިލާއެއް ފަށައި ދަރިއެއް ލިބޭ ހިސާބުން އެކްޓުކުރުން ހުއްޓާލައި ސެލެބްރިޓީއެއްގެ ދުނިޔެއިން ދުރަށް ޖެހިލާނެ ކަމަށް ސްޕައިޑަމޭންގެ ރޯލުން ފެންނަ ޓޮމް ހޮލެންޑް ބުނެފިއެވެ.
ވަރަށް ކުޑައިރުން ފެށިގެން ކެމެރާގެ ކުރިމަތީގައި މަސައްކަތްކުރަމުން އަންނަ ޓޮމް އެންމެ ގިނަ ބައެއްގެ މެދުގައި މަގުބޫލުކަން ހޯދާފައިވަނީ މާވެލްގެ އެންމެ ފަހުގެ ސްޕައިޑާމޭންގެ ރޯލުންނެވެ. މިހާރު އޭނާ ނޭނގޭ ބަޔަކު މަދުވާނެއެވެ.
އިނގިރޭސިވިލާތު އެކްޓަރު މީގެ ކުރީން ވެސް ވަނީ ހޮލީވުޑަށް އެހާ ގަޔާނުވާ ކަމަށް ހިޔާލު ފާޅު ކޮށްފައެވެ. އެމެރިކާއާއި ހޮލީވުޑްގެ ދުނިޔެއަކީ ޓޮމަށް އެންމެ ކަމުދާ ދުނިޔެ ނޫން ކަމަށް އޭނާ ކުރީން ބުނެފައިވެއެވެ. އެއާއެކު ހޮލީވުޑްގެ އިވެންޓުތަކަށް ވެސް އޭނާ ވަރަށް ގޮސް ނުހަދައެވެ.
ދާދި ފަހުން "މެންސް ހެލްތު"އަށް ދިން އިންޓަވިއުއެއްގައި ޓޮމް ބުނެފައިވަނީ ދަރިއެއް ލިބޭ ހިސާބުން އެކްޓިން ހުއްޓާލާނެ ކަމަށެވެ. އެއަށް ފަހު އުޅެން ބޭނުންވާނީ މީޑިއާއާއި ސެލެބްރިޓީންގެ ދުނިޔެއާ ދުރުގައި ވަކީން ކަމަށް ވެސް އޭނާ ފާހަގަކޮށްފައިވެއެވެ.
ނަމަވެސް، އެކްޓިން ހުއްޓާލާނެ ސީދާ ދުވަހެއް އޭނާ ހާމަކޮށްފައެއް ނުވެއެވެ. އެކަމަކު، އަމިއްލަ އާއިލާއެއް ފެށުމަށް ރެޑީ ކަމަށް ވެސް އޭނާ ފާހަގަކޮށްފައިވެއެވެ.
އެކްޓިންއާ ދުރަށް ދާން ގާތް ކަމަށް އިޝާރާތް ކޮށްފައިވާއިރު ޓޮމާއި އޭނާގެ ބައިވެރިޔާ ޒެންޑެޔާ އެންގޭޖްވާން އުޅޭ ކަމުގެ ވާހަކަތަކެއް ވަނީ ދެކެވެން ފަށާފައެވެ. މަޝްހޫރު އެކްޓަރު ޒެންޑެޔާއާއި ޓޮމް އެކީގައި ދިމާވީ ސްޕައިޑާމޭންގެ ސެޓު ތެރެއިންނެވެ.