ސަރުކާރުގެ ތެޔޮ ކުންފުނި، އެފްއެސްއެމްގެ ތެޔޮ ބޯޓެއް، ގއ. ނިލަންދޫ ހުޅަނގު އުތުރު ފަރަށް މިއަދު އަރައިފިއެވެ.
މި ތެޔޮ ބޯޓު ފަރަށް އަރާފައިވަނީ މިއަދު ހެނދުގެ ވަގުތެއްގައެވެ.
"ސަން"އަށް މައުލޫމާތުދެމުން ނިލަންދޫ ކައުންސިލްގެ ރައީސް ނާސިހު އިބްރާހިމް ވިދާޅުވީ، އެ ބޯޓު ފަރަށް އެރުމުގެ ސަބަބުން ލިބުނު ގެއްލުންތައް ވަޒަންކުރަމުން އަންނަ ކަމަށެވެ.
އެ ބޯޓު ފުންކުރަން އެފްއެސްއެމްގެ އިތުރު ބޯޓެއް އަންނަ ކަމަށާއި އެ ކަމަށް ކައުންސިލްގެ އެހީތެރިކަން ބޭނުންނުވާ ކަމަށް ބުނެފައިވާ ކަމަށް އޭނާ ވިދާޅުވިއެވެ. ނާސިހް ވިދާޅުވީ، މޫދަށް ތެޔޮ ލީކުވީ ކަމަށް މައުލޫމާތު ލިބިފައިނުވާ ކަމަށާއި އެއްވެސް މީހަކަށް އަނިޔާއެއް ވެސް ލިބިފައިނުވާ ކަމަށެވެ.
މީގެ ކުރިން ވެސް ތެޔޮ ބޯޓުތައް ފަރަށް އަރާފައި އެބަހުއްޓެވެ. އެ ފަދަ ހާދިސާތައް ހިނގުމުން އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ)އިން ލިބިފައިވާ ގެއްލުން ވަޒަންކުރުމަށް ފަހު، ޖޫރިމަނާ ވެސް ކުރެއެވެ.