ރަށްރަށުގައި ވެމްކޯއިން ދެމުން އަންނަ ކުނިނެގުމުގެ ޚިދުމަތުން ނަގާ ފީ، ކަރަންޓު ބިލުގައި ހިމަނާގޮތަށް އެ ކުންފުނިން ނިންމި ނިންމުން ރައީސް ޑރ. މުހައްމަދު މުއިއްޒުގެ ލަފާފުޅަކާ ގުޅިގެން ބަދަލުކޮށްފިއެވެ.
މީގެ ކުރިން ވެމްކޯއިން ބުނެފައިވަނީ، މި އަހަރުން ފެށިގެން ވެމްކޯއިން ޚިދުމަތްދޭ ރަށްރަށުގައި ކުނި ނެގުމުގެ ފީ ނަގާނީ ކަރަންޓު ބިލާއެކުގައި ކަމަށެވެ.
ވެމްކޯއިން މިއަދު ބުނީ، ރައީސް މުއިއްޒުގެ ލަފާފުޅުގެ މަތިން އެ ނިންމުން ބަދަލު ކުރެވިފައިވާ ކަމަށެވެ. މި ބަދަލާއެކު ވެމްކޯއިން ޚިދުމަތް ދޭނީ، އަދި ޚިދުމަތުން ބިލުކުރާނީ ވެމްކޯގެ ޚިދުމަތްތައް ރަޖިސްޓްރީކޮށްފައިވާ ފަރާތްތަކަށް އެކަނި ކަމަށް އެ ކުންފުނިންވަނީ ބުނެފައެވެ.
އަދި ބިލަށް ފައިސާ ދެއްކުމުގެ ކަންކަން ވެމްކޯގެ އަތޮޅު ތެރޭގެ ރަށްރަށުގައި ގާއިމްކޮށްފައިވާ އޮފީސްތަކުންނާއި ވެމްކޯގެ އަވަސްޕޭ ޕޯޓަލް މެދުވެރިކޮށް އިންތިޒާމް ކުރެވިފައިވާ ކަމަށް ވެސް ބުނެފައިވެއެވެ.
މީގެ ކުރިން ކުނިނެގުމުގެ ފީ ކަރަންޓު ބިލުގައި ހިމަނަން ވެމްކޯއިން ނިންމީ، ރައްޔިތުންނަށް އެ ކަމުގެ ސަބަބުން ބޮޑެތި ލުއިފަސޭހަތަކެއް ވެސް ލިބިގެންދާނެތީއެވެ.