އަންނަ އަހަރުން ފެށިގެން ވޭސްޓް މެނޭޖްމަންޓް ކޯޕަރޭޝަން (ވެމްކޯ)އިން އަތޮޅު ތެރޭގެ ރަށްތަކަށް ވެސް ބިލްކުރާނީ ކަރަންޓުބިލާ އެއްކޮށް ކަމަށް އެ ކުންފުނިން ބުނެފިއެވެ.
އަންނަ އަހަރުން ފެށިގެން ވެމްކޯއިން އަތޮޅު ތެރޭގެ ސަރަހައްދުތަކުގައި ޚިދުމަތްދޭ އުސޫލަށް ބަދަލުތަކެއް ގެނައުމަށް ވަނީ ނިންމައިފައެވެ. އެ ގޮތުން 2025ގެ ޖެނުއަރީމަހުގެ ބިލުން ފެށިގެން މާލެ ސަރަހައްދާ އެއްގޮތަށް، ރަށްރަށުގައި ވެސް ވެމްކޯގެ ބިލު، އެ ތަނެއްގެ ކަރަންޓު ބިލާ މާޖުކުރާނެއެވެ. އަދި ގިނަ ދުވަހަށް ރަށުން ބޭރަށް ދާ ހާލަތްތަކުގައި، ކަރަންޓު ބިލަށް 34 ޔުނިޓު ނާރާނަމަ، އެ މަހެއްގައި ވެމްކޯއިން އެ ގޭބިސީއަކަށް ބިލެއް ނުކުރާނެއެވެ
ދައުލަތުގެ މީޑިއާ، ޕީއެސްއެމްގައި ވާހަކަ ދައްކަވަމުން ވެމްކޯ، ސަދަން އޮޕަރޭޝަންސްގެ މެނޭޖިން ޑިރެކްޓަރު އަހުމަދު ޝާފިއު ވިދާޅުވީ ރަށްތަކުގައި ވެމްކޯގެ ޚިދުމަތް ފަށަނީ، ކުނި މެނޭޖުކުރުމުގެ ޚިދުމަތް ފަށަން އެ ރަށެއްގެ ކައުންސިލުން ވެމްކޯއާއެކު ޕާޓްނާޝިޕް އުސޫލުން ކުރާނެ އިންވެސްޓަށް ވެސް ބެލުމަށް ފަހު ކަމަށެވެ.
އޭނާ ވިދާޅުވި ގޮތުގައި މި ފެށޭ 2025ވަނަ އަހަރު ވެސް ވެމްކޯގެ ޚިދުމަތް އިތުރު ރަށްތަކަށް ފުޅާކުރުމުގެ މަސައްކަތް ކުރިޔަށްދާނެއެވެ. އެހެން ނަމަވެސް މި ވަގުތު އެ ކުންފުނިން އަލަށް ރަށެއްގައި ޚިދުމަތް ފެށުން ބިނާވެފައި އޮތީ ކައުންސިލުން އެކަމަށް އެދޭ މިންވަރަކުން ކަމަށް ވިދާޅުވިއެވެ.
"...ޕާޓްނާޝިޕް އުސޫލަކުން މި ދަނީ. އަޅުގަނޑުމެންނަކަށް ހަމަ ސީދާ ގޮސްފައި، [ޚިދުމަތް] ނުއެއް ފެށޭ. ކައުންސިލްތަކުން ކިހާވަރެއްގެ އިންވެސްޓްމަންޓެއް، ނޫނީ ކިހާ ވަރަކަށް ރެޑީތޯ އަޅުގަނޑުމެން ޝާމިލްކޮށްގެން ޚިދުމަތް އެ ރަށެއްގައި ފަށަން. އެ ކޮންޓްރިބިއުޝަނަށް ވެސް ބޭސްކޮށްފައި އަޅުގަނޑުމެން މި ޚިދުމަތް ފަށަނީ" ޝާފިއު ވިދާޅުވިއެވެ.
މީގެ އިތުރުން އިތުރުން ވެސް އަތޮޅު ތެރޭގައި ވެމްކޯއިން ދޭ ޚިދުމަތަށް ގެންނަ ބަދަލުތަކުގެ ތެރެއިން، ކޮންމެ ދުވަހަކު ވެސް ގޭބިސީތަކުގެ ކުނިނަގާއިރު، އޭގެ ތެރެއިން އެންމެ އިސްކަމެއް ދޭނީ ކުނިވާ ޒާތުގެ ކުންޏަށް ކަމަށް ވެމްކޯއިން ބުނެއެވެ. ރަށްތަކުގައި ވެސް ކުނި އުކައިލުމުގެ މަސައްކަތް ކުރާނީ، ގާނޫނާ އެއްގޮތަށް ވަކިކުރަންޖެހޭ ބާވަތްތަކުގެ ކުނި ވަކިކޮށްގެންނެވެ.
އަންނަ އަހަރުން ފެށިގެން ވެމްކޯގެ ރީޖަންތަކުގެ ޚިދުމަތްތަކަށް ގެންނަ ބަދަލުތަކުގެ ތެރެއިން، ވިޔަފާރިތަކަށް ޗާޖުކުރާނީ ލިޓަރަކަށް 20 ލާރިންނެވެ. އެއީ އެ ތަނަކުން ވެމްކޯގެ ޚިދުމަތް ބޭނުންކުރާ ދުވަސްތަކަށް އެކަންޏެވެ.
ދެހާސް ސޯޅައިން ފެށިގެން ވެމްކޯއިން އަންނަނީ ރާއްޖޭގައި ކުނި މެނޭޖުކުރުމުގެ ޚިދުމަތް ދެމުންނެވެ. ފާއިތުވި އަހަރުތަކުގައި އެ ކުންފުނިން އެންމެ ބޮޑު އިސްކަމެއް ދީފައިވަނީ މާލެ ސަރަހައްދުގެ އިތުރުން، އައްޑޫ އަދި ފުވައްމުލައް ސިޓީގައި ކުނި މެނޭޖުކުރުމަށެވެ. މި އަހަރު އެ ކުންފުނިންވަނީ އެ ޚިދުމަތް ގދ. ތިނަދޫއާއި ހދ. ކުޅުދުއްފުށްޓަށް ވެސް ފުޅާކޮށްފައެވެ.