މިހާރު ރާއްޖެއަށް ކުރަމުން މި ދާ ވިއްސާރައިގައި ފެންބޮޑުވެފައިވާ މާލޭގެ މަގުތަކުން މިހާތަނަށް 10،000އެއްހައި ޓަނުގެ ފެން ހިންދައިފިއެވެ.
އެމްއެންޑީއެފުން އަންނަނީ ފެންބޮޑުވެފައިވާ މާލޭގެ ހަ ސަރަހައްދެއްގައި 16 ޕަމްޕެއް ބަހައްޓައިގެން ފެންހިންދިމުގެ މަސައްކަތް ކުރަމުންނެވެ.
އެއީ ވެސްޓް ޕާކުގައި ފަސް ޕަމްޕު، އައިޖީއެމްއެޗް ސަރަހައްދުގައި ފަސް ޕަމްޕު، ސަލްމާން މިސްކިތް ސަރަހައްދުގައި ތިން ޕަމްޕު، ބޮޑު ވަޅު ސަރަހައްދުގައި އެއް ޕަމްޕުގެ އިތުރުން މާފަންނު ފެރީ ޓާމިނަލް ސަރަހައްދުގައި އެއް ޕަމްޕު އަދި ދިވެހިރާއްޖޭގެ އަޑު ސަރަހައްދުގައި ބަހައްޓާފައިވާ ޕަމްޕެވެ.
މާލޭ މަގުތަކުން ފެންހިންދުމުގެ އިތުރުން، ފެންބޮޑުވެފައިވާ މަގުތަކުގައި ވެލިބަސްތާ ޖެހުމުގެ މަސައްކަތް ވެސް އެމްއެންޑީއެފުން އަންނަނީ ކުރަމުންނެވެ.
މާލެއަށް ބޯކޮށް ވާރޭވެހި، މުޅި މާލެ އޮތީ ފެނު އަޑީގައެވެ.
މި ވިއްސާރައިގައި މާލޭގެ އިތުރުން އަތޮޅު ތެރޭގެ ބައެއް ރަށްތަކުގައި ވެސް ފެންބޮޑުވެ، ވަރަށް ބޕޑެތި ގެއްލުން ލިބިފައިވެއެވެ. އަދި އުދައެރުމުގެ ސަބަބުން އެކިވަރުގެ ގެއްލުންތައް ވަމުންދާތީ، އެމްއެންޑީއެފުން އެ ރަށްތަކުގައި ވެސް އަންނަނީ ހަރަކާތްތެރިވަމުންނެވެ.
މިހާރު ކުރަމުން މިދާ ވިއްސާރައިގެ މައުލޫމާތު ދެމުން މެޓު އޮފީހުން ބުނީ، ވިއްސާރަ އަލިވާނެ ކަމަށް ލަފާކުރެވެނީ އަންނަ ހޯމައިގައި ކަމަށެވެ. ނަމަވެސް އޭގެ ފަހުން ވެސް ވައި ގަދަވެ، ކަނޑުތައް ގަދަވާނެ ކަމަށް ލަފާކުރެއެވެ.
މޫސުން ގޯސްވުމާ ގުޅިގެން މެޓު އޮފީހުން މެދު ރާއްޖެތެރެއަށް މިއަދު 15:00އިން 19:00އަށް ނެރުނު އޮރެންޖު އެލާޓު މިރޭ 23:00އާ ހަމައަށް ވަނީ ދިގުދަންމާލާފައެވެ.