ދިވެހިރާއްޖޭގައި ހައި އިމްޕެޓް ކޮމިއުނިޓީ ޑިވޮލޮޕްމެންޓް ޕްރޮޖެކްޓްސް އެޗްއައިސީޑީޕީގެ ތިންވަނަ ފިޔަވަހި ތަންފީޒުކުރުމަށް އިންޑިއާއާއެކު ސޮއިކޮށްފިއެވެ.
މި އެއްބަސްވުމުގައި ސޮއިކޮށްފައި ވަނީ ފޮރިން މިނިސްޓަރު އަބްދުﷲ ޚަލީލް މިހާރު އިންޑިއާއަށް ކުރައްވަމުން ގެންދަވާ ތިން ދުވަހުގެ ރަސްމީ ދަތުރުފުޅުގައި އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރާ ބައްދަލުރެއްވުމަށް ފަހުގައެވެ.
އެޗްއައިސީޑީޕީގެ ތިންވަނަ ފިޔަވަހި ތަންފީޒުކުރަން ރާއްޖެއިން އިންޑިއާޔާއެކު ސޮއިކޮށްފި ----
އެ ބައްްދަލުވުމަށްފަހު ޖައިޝަންކަރުގެ ރަސްމީ އެކައުންޓުން އެކްސްގައި ކޮށްފައިވާ ޕޯސްޓެއްގައި ވަނީ މިނިސްޓަރު ޚަލީލާއެކު ބޭއްވުނު ބައްދަލުކުރެއްވުމުގައި ތަރައްގީގެ އެއްބާރުލުމާއި އިގްތިސޯދީ، ސަލާމަތީ، ފިންޓެކް އަދި ރައްޔިތުންގެ މެދުގައި އޮންނަ ގުޅުންތަކާ ބެހޭގޮތުން މަޝްވަރާކުރައްވާފައިވާ ކަމަށެވެ.
އަދި ރާއްޖޭގައި ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސް އެޗްއައިސީޑީޕީގެ ދެވަނަ ފިޔަވަހި ތަންފީޒުކުރުމާ ބެހޭ އެއްބަސްވުމެއްގައި ސޮއި ކުރެވިފައިވާކަމަށް ވެސް އެ ޕޯސްޓުގައި ވަނީ ބުނެފައެވެ.
އަދި އިންޑިއާގެ އަވަށްޓެރި ގައުމުތަކަށް އިސްކަންދޭ ސިޔާސަތު (އެސްއޭޖީއޭއާރު) ވިޝަންއާ އެއްގޮތްވާ ގޮތުގެމަތިން ރާއްޖޭގެ ކުރިއެރުމާއި ފާގަތިކަމަށް އިންޑިއާއިން ދެމިހުންނާނީ ވަރުގަދަ އެހީތެރިއެއްގެ ގޮތުގައި ކަމަށް ވެސް އެ ޕޯސްޓުގައި ވަނީ ބުނެފައެވެ.
ޚަލީލް އިންޑިއާއަށް ކުރައްވާ ރަސްމީ ދަތުރުފުޅުގައި ފުރާފައި ވަނީ އިއްޔެއެވެ. ސަރުކާރު ފެށުނުއިރު ހެލްތު މިނިސްޓަރުގެ ގޮތުގައި ހުންނެވި ނަމަވެސް މިދިޔަ ސެޕްޓެމްބަރު މަހުގެ 30ގައި ފޮރިން މިނިސްޓްރީއާ ހަވާލުވެވަޑައިގަތުމަށް ފަހު ސަމޯއާ އާއި ސައުދީ އަރަބިއްޔާގެ އިތުރުން އޮމާންއަށް ވެސް ޚަލީލް ވަނީ ރަސްމީ ދަތުރުފުޅުތައް ކުރައްވާފައެވެ.
އެޗްއައިސީޑީޕީގެ ދެވަނަ ފިޔަވަހި ތަންފީޒުކުރަން ރާއްޖެއިން އިންޑިއާޔާއެކު ސޮއިކޮށްފި ----
ރާއްޖޭގައި ތިބި އިންޑިއާ ސިފައިން އަނބުރާ ގައުމަށް ފޮނުވާލުމުގެ ވައުދާއެކު ވެރިކަމަށް ވަޑައިގެން ރައީސް ޑރ. މުޙައްމަދު މުއިއްޒު ވަނީ އެ ވައުދު ފުއްދަވާފައެވެ.
އިންޑިއާގެ ސިފައިންނާ ގުޅޭ ގޮތުން ކުރިއަށް ގެންދިޔަ 'އިންޑިއާ އައުޓް' ކެމްޕެއިނާ ގުޅިގެން ރާއްޖެއާއި އެގައުމާ ދެމެދު ނުތަނަސްކަން އުފެދިފައި ވަނިކޮށް، މި އަހަރުގެ ކުރީކޮޅު ނައިބު ވަޒީރުންތަކެއް އިންޑިއާގެ ބޮޑުވަޒީރާއި ރައްޔިތުންނަށް ކުޑައިމީސް ކުރުމާ ގުޅިގެން ދެގައުމުގެ ގުޅުން ވަރަށް ބޮޑަށް ގޯސްވިއެވެ.
އެޗްއައިސީޑީޕީގެ ދެވަނަ ފިޔަވަހި ތަންފީޒުކުރަން ރާއްޖެއިން އިންޑިއާޔާއެކު ސޮއިކޮށްފި ----
އެ މައްސަލައާ ގުޅިގެން އިންޑިއާގައި ރާއްޖޭގެ ފަތުރުވެރިކަން ބޮއިކޮޓް ކުރުމަށް ބޮޑު ކެމްޕެއިނެއް ފެށިއިރު، މި އަހަރު އައި ފަތުރުވެރިންނަށް ބަލާއިރު އެގައުމުގެ މާކެޓް ހިއްސާ ވަނީ ކުޑަވެފައެވެ. ނަމަވެސް އިންޑިއާއާ ގުޅުން ބަދަހިކުރުމަށް ސަރުކާރުން ގިނަ މަސައްކަތްތަކެއްކޮށް، ގުޅުން ރަނގަޅުވެފައިވާ ކަމަށް މި ސަރުކާރުން ވަނީ ބުނެފައެވެ.