ބޭރު ތޮށި ލާފައި ނެތުމުން ރޭ އުދަ އަރައި ށ. ނަރުދޫގައި ވަރަށް ބޮޑަށް ފެންބޮޑުވެ، ބޮޑެތި ގެއްލުންތަކެއް ވެއްޖެއެވެ.
"ސަން"އަށް މައުލޫމާތު ދެމުން ނަރުދޫ ކައުންސިލުގެ ރައީސް މުޙައްމަަދު މުސްތަރުސިދު ވިދާޅުވީ، ނަރުދޫއަކީ އާންމުކޮށް އުދައަރާ ރަށެއް ކަމަށެވެ. ނަމަވެސް، މި ފަހަރު އާދަޔާޚިލާފަށް އުދައިގެ އަސަރުކުރީ އެ ރަށުގެ ބަނދަރުގައި ބޭރުތޮށި ނުޖެހި އޮތުމުންކަން އޭނާ ވަނީ ފާހަގަކޮށްފައެވެ.
މުސްތަރުސިދު ވިދާޅުވީ، ރޭ ދިޔަވަރު ބޮޑުވި ވަގުތު އާދަޔާޚިލާފަށް އުދައަރާ، ރަށުގައި ފެންބޮޑުވި ކަމަށެވެ. ފެން ހިންދަން އެމްއެންޑީއެފްގެ ޓީމަކުން އަންނަނީ ހަރަކާތްތެރިވަމުންނެވެ.
އޭނާ ވިދާޅުވީ، ފެންބޮޑުވުމުގެ ސަބަބުން 12 ވަރަކަށް ގެއަށް ބޮޑެތި ގެއްލުންތަކެއް ލިބިފައިވާ ކަމަށެވެ.
"ފެންބޮޑުވެފައި މި އޮތީ. އަށް ވަރަކަށް 12 ވަރަކަށް ގެއަށް ބޮޑެތި ގެއްލުންތަކެއް ހަމަ ލިބިފައިވަނީ. ގޭ ތެރޭގައި ހިފާ ގެންގުޅޭ ތަކެއްޗަށާއި ބަދިގެ ތެރޭގައި ގެންގުޅޭ ސާމާނުތަކަށް ވެސް. އިންދާފައި ހުރި ކާބޯތަކެތި ވެސް ހަލާކުވެ ފެންބޮޑުވެ އެކި ވަރުގެ ގެއްލުންތައް ލިބިފައި ވަނީ،" ކައުންސިލްގެ ރައީސް ވިދާޅުވިއެވެ.
ނަރުދޫގައި ފެން ބޮޑުވެފައި: އެ ރަށަށް ވަނީ އުދަ އަރާ ބޮޑެތި ގެއްލުންތަކެއް ލިބިފައި --
މުސްތަރުސިދު ވިދާޅުވީ، މި ދުވަސްވަރު މިގޮތަށް ކަންތައް ވާނޭ ކަމަށް ގަބޫލުކުރެވޭތީ އިރުވައިގެ ކުރީން ބަނދަރުގެ ބޭރުތޮށި ޖަހައިދިނުމަށް ކައުންސިލުން މިނިސްޓްރީގައި އެދިފައިވާނެ ކަމަށެވެ. އެ ކަމާ ގުޅޭ މަޝްވަރާތައް ވެސް މިނިސްޓްރީގެ ބޭފުޅުންނާ އެކު ކޮށްފައިވާކަން ފާހަގަކޮށް، މިއީ ވެފައިވާ އިހުމާލެއްގެ ގޮތުގައި އޭނާ ވަނީ ސިފަކޮށްފައެވެ.
"އަޅުގަނޑުމެން ވަގުތު އޮއްވައި ވާނީ މިކަން ސަމާލުކަމަށް ގެނެސްފައި. އިރުވައިގެ ކުރީން މި ކަންތައް ކުރަން އެބަޖެހެއޭ ނުކޮށްފިނަމަ މިގޮތަށް ކަންތައް ދިމާވެދާނެ ކަމަށް އަޅުގަނޑުމެން ވާނީ ބުނެފައި. އެކަމަކު، މިކަން ނުވެ، މިގޮތަށް ކަންތައްވީމާ އަޅުގަނޑު ދެކެނީ މިއީ ވެފައި އޮތް އިހުމާލެއް ކަމަށް،" ކައުންސިލްގެ ރައީސް ވިދާޅުވިއެވެ.
މުސްތަރުސިދު ވަނީ ނަރުދޫގެ ކުރީގެ ބަނދަރާ އެ ބަނދަރުގެ ނެރު ވެސް ބޭނުންނުކުރެވޭ ވަރަށް ހަލާކުވެފައިވާކަން ފާހަގަކޮށްފައެވެ. މި ހާލަތުގައި ރަށަށް ބޭނުންވާ ކާބޯތަކެތި ރަށަށް އެތެރެ ނުކުރެވޭނެ ކަމަށާއި ބޯޓުތައް ނުލަފާނެކަން ސަމާލުކަމަށް ގެނައިކަން އޭނާ ފާހަގަކުރެއްވިއެވެ.
ށ. ނަރުދޫގެ ބަނދަރު ހެދުމަށް އެމްޓީސީސީން އެ ރަށަށް ގެންދިޔަ ސާމާނު އެ މަޝްރޫއު ނުނިމެނީސް ގެންދަން އުޅުމުން ވެސް އެ ރަށުގެ ކައުންސިލުން ވަނީ އެކަން ހުއްޓުވާފައެވެ.
އާބާދީގައި ގާތްގަނޑަކަށް 700 އަށްވުރެ މީހުން ތިބި ނަރުދޫގެ ބަނދަރު ހެދުމަށް އެމްޓީސީސީއާ ހަވާލުކޮށް އަމަލީ މަސައްކަތް ފަށާފައިވަނީ 2023 ވަނަ އަހަރުގެ ތެރޭގައެވެ. އެއީ، އެއް އަހަރު ދުވަހަށް ނިންމުމަށް 41.34 މިލިއަން ރުފިޔާއަށް ހަވާލުކުރި ބަނަދަރެކެވެ.