އިންޑިއާގެ މަގުބޫލު އެކްޓަރު ޝާހިދު ކަޕޫރު އާއިލާއާ އެކު ރާއްޖެ އަތުވެއްޖެއެވެ.
މި ފެށުނު އާ އަހަރުގެ މުނާސަބާއާ ގުޅިގެން ޝާހިދާއި މީރާ ރާއްޖެ އައިސްފައިވަނީ މީގެ ދެތިން ދުވަސް ކުރިންނެވެ. ބެލެވޭ ގޮތުގައި ޝާހިދު، އާއިލާއާ އެކު ރާއްޖެއަށް ކުރި މި ދަތުރަކީ އެކްޓަރުގެ ކުރިއަށް އޮތް ފިލްމު "ދޭވާ"ގެ ޕްރޮމޯޝަން މަސައްކަތް ފެށުމުގެ ކުރިން އާއިލާއާ އެކު ވަގުތު ހޭދަކޮށްލާ އަރާމު ކޮށްލުމަށް ކުރި ދަތުރެކެވެ.
ޕަޓީނާ މޯލްޑިވްސްގައި ނަގާފައިވާ ބައެއް ފޮޓޯތައް ސޯޝަލް މީޑިއާގައި ހިއްސާ ކުރަމުން ކެޕްޝަންގެ ގޮތުގައި ޝާހިދު ލިޔެފައިވަނީ 'އިޓް އޯލް ސްޓާޓްސް ޓުމޯރޯ...ވެއިޓިން' މިހެންނެވެ.
ޝާހިދުގެ ކުރިއަށް އޮތް ފިލްމު "ދޭވާ"ގެ ޕޯސްޓަރެއް--ފޮޓޯ/ބޮލީވުޑްހަންގާމާ
މި ކެޕްޝަނާ އެކު ޕޯސްޓުކުރި ފޮޓޯއަށް ފަހު ޖެހިގެން އައި ދުވަހު ޝާހިދު ވަނީ އޭނާގެ ކުރިއަށް އޮތް ފިލްމު "ދޭވާ"ގެ ފުރަތަމަ ޕޯސްޓަރު ބެލުންތެރިންނަށް ދައްކާލާފައެވެ. ޝާހިދު ވަރަށް ތަފާތު އެކްޝަން ރޯލަކުން ފެންނާނެ މި ފިލްމު ޕްރިމީއާކުރަން ތާވަލުކޮށްފައިވަނީ މި މަހުގެ 30 ވަނަ ދުވަހަށެވެ.
ރާއްޖޭގެ މަޝްހޫރު ރިސޯޓު ޕަޓީނާ މޯލްޑިވްސްގައި ނަގާފައިވާ ބައެއް ފޮޓޯތައް ސޯޝަލް މީޑިއާގައި ދެމަފިރިން އާންމުކޮށްފައިވާއިރު މިހާތަނަށް ދެ މީހުންގެ އިންސްޓަގްރާމްގައި ހިއްސާކޮށްފައިވާ އެއްވެސް ފޮޓޯއަކުން ޝާހިދާއި މީރާގެ ދެ ކުދިން ފެނިފައިނުވުމުން ބޮޑަށް ބެލެވެނީ މިއީ ދެމަފިރިން ވަކިން ކުރި ދަތުރެއް ކަމަށެވެ.
ޝާހިދު ޕަޓީނާ މޯލްޑިވްސްގައި ނަގާފައިވާ ފޮޓޯއެއް--ފޮޓޯ/އިންސްޓަގްރާމް
ޝާހިދާއި މީރާ އެންމެ ފަހުން ރާއްޖެ އައިސްފައިވަނީ 2021ވަނަ އަހަރެވެ. އެ ދަތުރުގައި މި އާއިލާއިން ޗުއްޓީ ހޭދަކޮށްފައިވަނީ ރާއްޖޭގެ ލަގްޒަރީ ރިސޯޓެއް ކަމަށްވާ ސޮނެވާ ފުށީގައެވެ.