މީލާދީ އާ އަހަރުގެ ފެށުމާ ދިމާކޮށް 'މޯލްޑިވްސް ކަލްޗާ އެންޑް ފުޑް ފެސްޓިވަލް' ނަމުގައި ބާއްވާ ހަރަކާތުގެ ޕާޓްނަރެއްގެ ގޮތުގައި އުރީދޫ މޯލްޑިވްސްއިން ސޮއިކޮށްފިއެވެ.
މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ން ހުޅުމާލޭ ސެންޓްރަލް ޕާކުގައި ބާއްވާ މި ފެސްޓިވަލް ރޭ ފަށައިފައިވާއިރު، މިއަދު ހަވީރާއި ރޭގަނޑު ވެސް ފެސްޓިވަލް ބާއްވާނެއެވެ.
އުރީދޫއިން ވަނީ މި ފެސްޓިވަލްގައި ބައިވެރިވާ ފަރާތްތަކަށް ލަކީޑްރޯއެއްގައި ބައިވެރިވެވޭނެ ފުރުސަތު ހުޅުވާލައިފައެވެ. އެ ލަކީޑްރޯގައި ބައިވެރިވެވޭނީ އުރީދޫއިން އެ ފެސްޓިވަލްގައި ބަހައްޓާފައި ހުންނަ ކިއުއާރު ކޯޑު ސްކޭން ކޮށްގެންނެވެ.
އެ ލަކީޑްރޯއިން ހޮވޭ ނަސީބުވެރިންނަށް ހުށަހަޅާފައިވާ އިނާމުތަކުގެ ތެރޭގައި 10 މައިފައި ޑިވައިސްއާއި 1 އެއާފައިބާ ކަނެކްޝަން ހިމެނެއެވެ.
ރޭ ބޭއްވި ފެސްޓިވަލްގައި ޑްރޯން ޝޯއެއް ބާއްވައި، ހަވާ އަރުވައިފައިވެއެވެ.
މިއަދު އޮންނަ ހަރަކާތްތަކުގެ ތެރޭގައި، ކާބޯތަކެއްޗާއި ސަގާފީ ސްޓޯލްތައް ދައްކައިލުމުގެ އިތުރުން، ފުލުހުންނާއި ފަޔާ ޓްރަކްގެ ހުށަހެޅުމަކާއި ކްލައިމްބިން ވޯލް އާއި ބައުންސް ހައުސް އަދި ޓްރާންސްފޯމާސް ޑިސްޕްލޭއެއް ވެސް ހިމެނެއެވެ. އަދި ބޮޑުބެރުގެ ހަރަކާތްތައް ވެސް އޮންނާނެއެވެ.
މިއަދުގެ ހަރަކާތްތައް ސެންޓްރަލް ޕާކުގައި ކުރިއަށްދާނީ 16:00އިން 22:00އަށެވެ.