ރާއްޖެއިން ޗައިނާއާ އެކު ހަދައިފައިވާ މިނިވަން ވިޔަފާރީގެ އެއްބަސްވުން (އެފްޓީއޭ)އާއެކު މަސްވެރިންގެ ދިރިއުޅުމުގެ ފެންވަރު ރަނގަޅުވާނެ ކަމަށް ފިޝަރީސް މިނިސްޓްރީން މިއަދު ބުނެފިއެވެ.
ފިޝަރީސް މިނިސްޓްރީން މިއަދު ނެރުނު ބަޔާނެއްގައި ވަނީ، މިރެއިން ފެށިގެން އެފްޓީއޭއަށް އަމަލުކުރަން ފަށާއިރު އެކަމަށް އެ މިނިސްޓްރީން މަރުހަބާ ކިޔާ ކަމަށެވެ. އެ މިނިސްޓްރީން ބުނީ އެ އެއްބަސްވުމަކީ ރާއްޖެއާއި ޗައިނާއާ ދެމެދު އޮތް އިގުތިސާދީ ގުޅުން ރަމްޒުކޮށްދޭ މުހިންމު މޭލުގާއެއް ކަމަށެވެ.
އެ އެއްބަސްވުމުގެ ސަބަބުން މަސްވެރިކަމުގެ ދާއިރާގެ އިންވެސްޓްމެންޓުތަކަށް ފުރުސަތު ހުޅުވި، ރާއްޖޭގެ މަހުގެ އުފެއްދުންތަކުގެ ވިޔަފާރި ކުރިއަރައިގެން ދާނެ ކަމަށް ފިޝަރީސް މިނިސްޓްރީން ބުންޏެވެ. އަދި އެފަދަ އެއްބަސްވުމެއްގެ މައިގަނޑު މަގުސަދުތަކަކީ އެކްސްޕޯޓް އިތުރުކުރުމާއި ވިޔަފާރީގެ މަދުކުރުމާއި ރާއްޖެއާއި ޗައިނާގެ ވިޔަފާރިތަކަށް އައު ފުރުސަތުތައް އުފައްދައި ފަހިކޮށްދިނުން ކަމަށް މިނިސްޓްރީން ފާހަގަކުރިއެވެ.
އެ އެއްބަސްވުމުގެ ދަށުން، ރާއްޖޭގެ މަސްވެރިކަމުގެ ހުރިހާ އުފެއްދުންތަކެއްހެން ޗައިނާއަށް ސުން ޓެކުހުގައި އެކްސްޕޯޓް ކުރެވެއެވެ. އަދި މަހުގެ އުފެއްދުންތައް ރީއެކްސްޕޯޓް ކުރުމަށް ވެސް މަގުފަހިވެއެވެ.
އެކަމުގެ ސަބަބުން ޗައިނާގެ ވިޔަފާރިތަކަށް ރާއްޖެއިން ސީފުޑް ހޯދުމަށް ފަސޭހަވާނެ ކަމަށް މިނިސްޓްރީން ބުންޏެވެ. އަދި މިދިޔަ އޮކްޓޯބަރު މަހުގެ 29ގައި ޗައިނާއާއި ރާއްޖެއާ ދެމެދު ސޮއިކުރި ގުދުރަތީ ކަނޑުގެ އުފެއްދުންތައް ބަލައި ފާސްކުރުމާއި ކަރަންޓޯނު ކުރުމުގެ ޕްރޮޓޮކޯލްގެ ސަބަބުން ސީފުޑް އުފެއްދުންތައް ބޭރުކުރަން ފަސޭހަވެ، އެ ބާވަތްތަކުގެ ވިޔަފާރި އިތުރަށް ފުޅާވާނެ ކަމަށް ފިޝަރީސް މިނިސްޓްރީން ލަފާކުރިއެވެ.
"މި އެއްބަސްވުމުގެ ސަބަބުން މަސްވެރި ސިނާއަތު ކުރިއަރުވައި ސިންދަފާތު ކުރުމަށް ގިނަގުނަ ފުރުސަތުތައް ހުޅުވިގެން ދާނެއެވެ. މި އެއްބަސްވުން ތަންފީޒުކުރެވުމުން މަސްވެރިކަމުން ޖީޑީޕީއަށް ހިއްސާކުރާ މިންވަރު އިތުރުވެ، ސީދާ މަސްވެރިޔާގެ ދިރިއުޅުމުގެ ފެންވަރު ރަނގަޅުވެގެން ދާނެއެވެ." މިނިސްޓްރީން ބުންޏެވެ.
ފިޝަރީސް މިނިސްޓަރު އަހުމަދު ޝިޔާމް: އެ މިނިސްޓްރީން ވަނީ އެފްޓީއޭއާއެކު މަސްވެރިކަމުން ލިބޭ އާމްދަނީ އިތުރުވާނެ ކަމަށް ބުނެފައި -- ފޮޓޯ/ ފިޝަރީސް މިނިސްޓްރީ
އެ އެއްބަސްވުމުގެ ދަށުން، ކުރިއަށް އޮތް ފަސް އަހަރު ތެރޭގައި ރާއްޖެ އެތެރެކުރާ ގިނަ ބާވަތްތަކުގެ މުދަލުން 90 އިންސައްތައާ ހަމައަށް ޑިއުޓީ މާފުވާނެއެވެ.
އެ އެއްބަސްވުމާ ގުޅޭ ގޮތުން މީގެ ކުރިން އިކޮނިމިކް މިނިސްޓަރު މުހައްމަދު ސައީދު ވަނީ، އެފްޓީއޭއާ އެކު ދިވެހި ވިޔަފާރިވެރިންނަށް ފަހިވަނީ ދުވަހަކު ވެސް ފަހިނުވާ ވަރުގެ ތަނަވަސް ފުރުސަތެއް ކަމަށް ވިދާޅުވެފައެވެ.
ދެ އަހަރު ދުވަހުގެ ދިގު މަޝްވަރާތަކަކާށް ފަހު ރާއްޖެއިން ޗައިނާއާ އެކު މިނިވަން ވިޔަފާރީގެ އެއްބަސްވުމެއްގަައި ސޮއިކުރީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި 2014 ވަނަ އަހަރުގެ ޑިސެމްބަރު މަހުގެ ތެރޭގައެވެ. އެކަމަކު، އެ އެއްބަސްވުމަށް އަމަލުކުރަން މަޖިލީހުން ފާސްވީ 2017 ވަނަ އަހަރުގެ ނޮވެމްބަރު މަހެވެ.
އެކަމަކު، އެއަށް ފަހުގައި އައި ރައީސް އިބްރާހިމް މުހައްމަދު ޞާލިޙްގެ ސަރުކާރުން މިނިވަން ވިޔަފާރީގެ އެއްބަސްވުމަށް އަމަލުކުރަން ފަށައިފައެއް ނުވެއެވެ.
ރައީސް ޔާމީންގެ ވެރިކަމުގައި ހައުސިން މިނިސްޓަރުކަން ކުރެއްވި ރައީސް ޑރ. މުޙައްމަދު މުއިއްޒު ވެރިކަމަށް ވަޑައިގެން ޗައިނާއާ ގާތް ގުޅުމެއް ބާއްވަމުން ގެންދަވާއިރު، އެ އެފްޓީއޭއަށް އަމަލުކުރަން ތައްޔާރަށް ހުންނެވި ކަމަށް އެ މަނިކުފާނު ކުރިން ވިދާޅުވެފައިވެއެވެ.
ޗައިނާއާ ދެމެދު މިހާރު 700 މިލިއަން ޑޮލަރުގެ ވިޔަފާރި ކުރާއިރު، އެފްޓީއޭއާ އެކު އެ އަދަދު އެއް ބިލިއަން ޑޮލަރަށް އަރާނެ ކަމަށް ސަރުކާރުން ލަފާކޮށްފައިވެއެވެ.