ސީރިއާގައި ދިގު މުއްދަތަކަށް ވެރިކަން ކުރެއްވި ރައީސް ބައްޝާރުލްއަސަދުގެ ވެރިކަން ވައްޓާލި، ހަޔާތު ތަހްރީރު އަލް ޝާމް (އެޗްޓީއެސް) ރާއްޖެއިން ކަނޑައަޅާ ޓެރަރިސްޓު ޖަމައާތްތަކުގެ ލިސްޓުގައި އަނެއްކާ ވެސް ހިމަނައިފިއެވެ.
ޓެރަރިޒަމްގެ މަނާކުރުމުގެ ގާނޫނުގެ ދަށުން ރާއްޖެއިން ޓެރަރިސްޓު ޖަމާއަތްތަކާއި ހަނގުރާމަވެރި ސަރަހައްދުތަކުގެ ގޮތުގައި ކަނޑައަޅާ ގުރޫޕުތަކާއި ތަންތަނުގެ ލިސްޓު ރައީސް އޮފީހުން މިއަދު ވަނީ ގެޒެޓުކޮށްފައެވެ.
އެ އިއުލާނުގައިވަނީ، މިދިޔަ އަހަރުގެ އޮކްޓޯބަރު ނުވަ ވަނަ ދުވަހު ކަނޑައަޅައިފައިވާ ލިސްޓަށް އިތުރު އިސްލާހެއް ގެންނަން ނުޖެހޭ ކަމަށް ގައުމީ ސަލާމަތާ ބެހޭ މަޖިލީހުން ނިންމައިފައިވާ ކަމަށެވެ.
އެ ލިސްޓުގެ އެންމެ ކުރީގައި ހިމަނައިފައިވަނީ ދުނިޔޭގެ އެކި ސަރަހައްދުތަކުގައި ހަރަކާތްތެރިވާ އަލްގައިދާގެ ޖަމާއަތްތަކާއި, ބައްޝާރުގެ ވެރިކަމާ ދެކޮޅަށް ހަނގުރާމަ ކުރި އަލް ނުސްރާ ފްރޮންޓް ނުވަތަ ޖަބްހަތު އަލް ނުސްރާއެވެ.
އެއަށްފަހު އެ ލިސްޓުގައި އޮތީ އެޗްޓީއެސް ކަމަށްވާއިރު، އެ ލިސްޓު އެންމެ ފުރަތަމަ އެކުލަވާލި ތާރީޚު ކަމަށްވާ އޮކްޓޯބަރު 31، 2019އިން ފެށިގެން އެޗްޓީއެސް އެ ލިސްޓުގައި އޮވެއެވެ.
މީގެ އިތުރުން 2019ގައި އޮތް ގޮތަށް، ސީރިއާގެ ހުރިހާ ސަރަހައްދެއް ވެސް އަދިވެސް ކަނޑައަޅައިފައިވަނީ ހަނގުރާމަވެރި ސަރަހައްދުތަކުގެ ގޮތުގައެވެ.
ޓެރަރިޒަމްގެ މަނާކުރުމުގެ ގާނޫނުގައި ޓެރަރިސްޓު ޖަމާއަތެއްގެ ލިޔެކިޔުން ފެތުރުމާއި ޝާއިއުކުރުން މަނާކޮށްފައިވާއިރު، އެ ކުށް ސާބިތުވެއްޖެ ނަމަ ހަތް އަހަރާއި 10 އަހަރާ ދެމެދުގެ މުއްދަތަކަށް ޖަލަށް ލެވޭނެއެވެ. އަދި ޓެރަރިސްޓު ޖަމާއަތެއްގައި ބައިވެރިވާ މީހަކަށް 10 އަހަރާއި 15 އަހަރާ ދެމެދުގެ ޖަލު ހުކުމެއް ކުރެވޭނެއެވެ.
ސީރިއާގެ ރައީސް ކަމަށް ބައްޝާރު ވަޑައިގަތީ 2000 ވަނަ އަހަރެވެ. އެއީ އޭގެ ކުރިން ވެރިކަމުގައި ހުންނެވި ބައްޕާފުޅު، ހާފިޒް އަލް އަސަދު އަވަހާރަވުމާ ގުޅިގެންނެވެ. އުމުރުން 69 އަހަރުގައި ހާފިޒް ހާޓް އެޓޭކެއް ޖެހިގެން އަވަހާރަވީ ވެރިކަން ކުރައްވާތާ 29 އަހަރުވީ ފަހުންނެވެ.
ދެހާސް އެގާރައިގައި ސީރިއާގެ ދާޚިލީ ހަނގުރާމަ ފެށުނީ އެގައުމަށް ޑިމޮކްރަސީ ގެނައުމަށް ގޮވާލައި ސަރުކާރާ ދެކޮޅަށް ފެށި މުޒާހަރާތައް ބާރުގެ ބޭނުން ކޮށްގެން ރޫޅާލައި، އެ ހަމަނުޖެހުންތަކުގައި އެތައް ހާސް މީހުން މަރުވުމާ ގުޅިގެންނެވެ.
އެ ހަނގުރާމައަށް އެތައް އަހަރެއްވެ، ގިނަ އަދަދެއްގެ މީހުން މަރުވެ، ގެދޮރު ގެއްލުނު ފަހުން މި މަހުގެ އަށް ވަނަ ދުވަހު އެޗްޓީއެސްއިން ދިމިޝްގަށް އެރިއެެވެ. އެއާއެކު އަސަދު ރައީސް ކަމުން އިސްތިއުފާ ދެއްވުމަށްފަހު ރަޝިއާއަށް ވަޑައިގެން އެގައުމުން ހިމާޔަތް ހޯއްދެވިއެވެ.
ފާހަގަކޮށްލެވޭ ގޮތުގައި، އެޗްޓީއެސް ޓެރަރިސްޓުގެ ޖަމާއަތްތަކުގެ ލިސްޓުން ނެގުމަށް އދ. އާއި އެމެރިކާއިން ވިސްނަމުންދާ ކަމަށް ބޭރުގެ ބައެއް މީޑިއާތަކުން ރިޕޯޓުކޮށްފައިވެއެވެ. އެގޮތުން އދ.އިން ސީރިއާއަށް ކަނޑައަޅާފައި ހުންނަވާ ޚާއްސަ މަންދޫބު ގައިރު ޕެޑާސަން ވަނީ، އެޗްޓީއެސްއިން ވެރިކަން ކުރާ ގޮތަކަށް ބަލައި، އދ.ގެ ޓެރަރިސްޓު ޖަމާއަތްތަކުގެ ލިސްޓުން އެ ޖަމާއަތް އުނިކުރުން އެކަށީގެންވާ ކަމަށް ވިދާޅުވެފައެވެ.
މީގެ އިތުުރުން އދ.އާ އެއްގޮތަށް އެމެރިކާއިން ވެސް އެފަދަ ވިސްނުމެއް ގެންގުޅޭ ކަމަށް ރިޕޯޓުތަކުގައިވެއެވެ.