އާ އަހަރާ ދިމާކޮށް މޫސުން ގޯސްވާނެކަމަށް ލަފާކުރެވޭކަމަށް މޫސުމާ ބެހޭ ގައުމީ އިދާރާ، (މެޓު) އޮފީހުން މިއަދު ބުނެފިއެވެ.
މެޓުން މިއަދު ބުނީ މެދު ރާއްޖެ ތެރެއަށާއި އުތުރުގެ އަތޮޅުތަކަށް މާދަމާއިން ފެށިގެން ކުރިޔަށް އޮތް ތިން ދުވަހަށް މޫސުން ގޯސްވާނެ ކަމަށެވެ.
ރާއްޖޭގެ ދެކުނަށް ކޮންމެ ވެސް ވަރަކަށް ކެރި އުޅޭނެކަމަށާއި އެހެން ނަމަވެސް ޖުމްލަ ގޮތެއްގައި ބޮޑަށް ވިއްސާރަކުރާނެ ކަމަށް ލަފާކުރެވެނީ މެދު ރާއްޖެ ތެރެއަށާއި އުތުރުގެ އަތޮޅުތަކަށް ކަމަށް މެޓުން ވަނީ ބުނެފައެވެ.
ފާއިތުވި ހަފުތާ ބަންދު ތެރޭގައި ރާއްޖެއަށް ބޯކޮށް ވިއްސާރަވެފައިވާއިރު މާލެއާއި ބައެއް ރަށްތަކުގައި ފެންބޮޑުވެ، ގެއްލުންތައް ވެސް ވަނީ ލިބިފައިވެއެވެ.
މި ދުވަސްވަރަކީ ސްކޫލް ބަންދު ދުވަސްތައް ކަމަށްވުމުން އަތޮޅު ތެރެއަށް ގިނަ ބަޔަކު ދަތުރުކުރަމުންދެއެވެ.
އެހެންކަމުން މޫސުން ގޯސްވާ ދުވަސްވަރު، ކަނޑު ދަތުރުކުރުމުގެ ކުރިން މެޓު އޮފީހުން ނެރޭ އެލާޓުތަކަށް ސަމާލުވުމަށް އެ އިދާރާއިން އަބަދު ވެސް އިލްތިމާސް ކުރެއެވެ.