ތ. ތިމަރަފުށީގައި އިއްޔެ ގެޔަކަށް ވަދެ ހިންގި މާރާމާރީއާ ގުޅިގެން ފަސް މީހަކު ހައްޔަރުކޮށްފިއެވެ.
އިއްޔެ ފުލުހުން ބުނީ، ފަސް މީހަކު ތިމަރަފުށީގެ ގެޔަކަށް ވަދެ މާރާމާރީއެއް ހިންގި ކަމަށް ރިޕޯޓުކޮށްފައިވާ ކަމަށެވެ. ނަމަވެސް އެ މައްސަލައާ ގުޅޭ އިތުރު ތަފުސީލެއް ނުދެއެވެ.
އެ މައްސަލައާ ގުޅޭ ގޮތުން ފުލުހުން މިއަދު ބުނީ ކޯޓު އަމުރެއްގެ ދަށުން ފަސް މީހަކު ހައްޔަރުކޮށްފައިވާ ކަމަށެވެ. އަދި އެ މީހުންނަށް މިހާރު ބަންދު މުއްދަތު ވެސް ޖަހައިފައިވާ ކަމަށެވެ. އެގޮތުން ހައްޔަރުކޮށްފައިވާ ފަސް މީހުންނާއި އެ މީހުންނަށް ޖެހި މުއްދަތަކީ:
- 36 އަހަރުގެ އަހުމަދު އަމީން، ޖަހާމުގުރިގެ، ތ. ތިމަރަފުށި / ހަތް ދުވަސް
- 38 އަހަރުގެ އަހުމަދު ޝަހުދީ، ސަލްވާ، ތ. ތިމަރަފުށި / ފަސް ދުވަސް
- 54 އަހަރުގެ މުހައްމަދު ރައޫފު، ވ. ވަވަތް، ކ. މާލެ / 10 ދުވަސް
- 39 އަހަރުގެ އަބްދުﷲ އަޝްރަފް، ގުލްބަކާވިލާ، ތ. ތިމަރަފުށި / 10 ދުވަސް
- 32 އަހަރުގެ ޢާޞް އިބްރާހީމް، ހިރި، ތ. ތިމަރަފުށި / 10 ދުވަސް
ފުލުހުން ބުނީ މި މައްސަލަ ފުލުހުން އަދިވެސް ތަހުގީގުކުރަމުން ގެންދާ ކަމަށެވެ.
ތިމަރަފުށިން "ސަން"އަށް މައުލޫމާތު ދިން މީހަކު ބުނި ގޮތުގައި ހަމަނުޖެހުން ހިނގާފައި ވަނީ އެ ރަށުގެ ޒުވާން ދެ ފިރިހެނެއްގެ މެދުގައެވެ. އެގޮތުން ހަމަނުޖެހުމުގެ ތެރެއިން އެކަކު، އަނެއް މީހާގެ ބުރަކަށްޓަށް ވަޅިން ހަމަލާ ދިން ކަމަށް އެނގިފައިވާ ކަމަށް އޭނާ ބުންޏެވެ.
އެ ހަމަލާގައި އަނިޔާވި މީހާއަށް ފަރުވާ ދިނުމަށް ފަހު ދޫކޮށްލައިފައިވާ ކަމަށް މީގެ ކުރިން ފުލުހުން ބުންޏެވެ. އޭނާއަށް ފަރުވާ ދިނީ ތިމަރަފުށީ ހެލްތު ސެންޓަރުގައެވެ.