މި ޑިސެންބަރު މަހު އެކިއެކި ޖަމާއަތްތަކުގެ ޙަވާލުގައި 6،373 އަށް ވުރެ ގިނަ މީހުން ޢުމްރާގެ އަޅުކަން އަދާކުރަން މައްކާއަށް ގޮސްފިއެވެ.
އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު ވިދާޅުވީ، މި ޑިސެންބަރު މަހު ރާއްޖެއިން ޢުމްރާއަށް ގޮސްފައިވާ އެންމެހައި އަޚުންނާއި އުޚުތުންގެ ޙާލު ވެސް ރަނގަޅު ކަމަށެވެ.
މިނިސްޓަރު ވިދާޅުވީ، މި މަހު 6،373 މީހުން ޢުމްރާއަށް ގޮސްފައިވާ ކަމަށެވެ.
ޙައްޖު ކޯޕަރޭޝަނުން ވެސް މީހުން ޢުމްރާއަށް ގެންދާއިރު މިހާރު ޖުމުލަ 57 ކުންފުންޏަކުން މީހުން ޢުމްރާއަށް ގެންދެއެވެ. އެއީ، މި އަހަރު އަލަށް ހުއްދަ ދިން 14 ކުންފުންޏާ އެކުގައެވެ.
މި މަހު ޙައްޖު ކޯޕަރޭޝަންގެ ހަވާލުގައި 800 އަށްވުރެ ގިނަ މީހުން ޢުމްރާއަށް ގެންގޮސްފައިވެއެވެ.
ޢުމްރާގެ އަޅުކަން އަދާކުރަން ކޮންމެ ޑިސެމްބަރު މަހަކު ވެސް ރާއްޖެއިން ވަރަށް ގިނަ ދިވެހީން މައްކާއަށް ދެއެވެ.
މި ފަހުން އިސްލާމިކް މިނިސްޓްރީން ވަނީ މީހުން ޢުމްރާއަށް ގެންދިއުމާ ގުޅޭ ގަވާއިދަށް ވެސް ބަދަލުތަކެއް ގެނެސްފައެވެ. އެ ގޮތުން، މީހުން ޢުމްރާއަށް ގެންދިއުމާ ގުޅޭ ހުއްދައަށް އެދުމުގެ ކަންކަން ވަނީ ފަސޭހަކޮށްފައެވެ.
ގަވާއިދާ އެއްގޮތަށް އަމަލުނުކުރާ ޢުމްރާ ގްރޫޕުތަކާ މެދު ފިޔަވަޅު އަޅާނެ ކަމަށް އިސްލާމިކް މިނިސްޓްރީން މީގެ ކުރިން ވަނީ ބުނެފައެވެ.