ތައިލެންޑުން ރާއްޖެ އައި ދެ ދިވެއްސެއްގެ ހަށިގަނޑުގައި މަސްތުވާތަކެތި ރައްކާކޮށްގެން ރާއްޖެ އެތެރެކުރަން އުޅެނިކޮށް ހިފަހައްޓައިފިއެވެ.
ކަސްޓަމުން ބުނީ އެއީ 41 އަހަރުގެ ދިވެހި ފިރިހެނަކާއި 21 އަހަރުގެ ދިވެހި ފިރިހެނެއް ކަމަށެވެ. މިދިޔަ ބުރާސްފަތި ދުވަހު މި ދެ މީހުން ރާއްޖެ އައީ ތައިލެންޑުންނެވެ.
ކަސްޓަމުން ބުނީ، އެ ދެމީހުންގެ އަމަލުތައް ހުރި ގޮތުން ޝައްކު ކުރެވިގެން އިތުރަށް ބަލައިފާސް ކުރުމުގެ ތެރެއިން، ދެ މީހުންގެ ހަށިގަނޑުގައި މަސްތުވާތަކެތި ރައްކާކޮށްފައި ހުއްޓައި ފެނިފައިވާ ކަމަށެވެ. ފުރަތަމަ މަރުހަލާގައި އެ ތަކެތި ތަހުލީލުކުރިއިރު، މަސްތުވާތަކެތީގެ ދެ ބާވަތެއް ކަމަށްވާ ހެރޮއިން އަދި މެފެޑްރޯންއަށް ޕޮޒިޓިވްވެފައިވާ ކަމަށް ކަސްޓަމްސްއިން ބުންޏެވެ. އެއީ 0.32 ކިލޯގެ ހެރޮއިންއާ 2.1 ކިލޯގެ މެފެޑްރޯނެވެ.
ޕެކިންއާ އެކު އެ ތަކެތީގެ ބަރުދަނުގައި 2.4 ކިލޯ ހުރިކަމަށާއި، އެ ތަކެތީގެ މަގުމަތީ އަގު، 5.5 މިލިއަން ރުފިޔާއަށް އަރާނެ ކަމަށް ކަސްޓަމުން ލަފާކުރެއެވެ.
މި މައްސަލަ ތަހުގީގު ކުރުމަށް ޓަކައި، މައްސަލައިގައި އަތުލި މަސްތުވާތަކެއްޗާއި އެ ތަކެތި ހަށިގަނޑުގައި ރައްކާކޮށްގެން އެތެރެކުރަން އުޅުނު ދެ މީހުން ވެސް ފުލުހުންނާ ހަވާލުކޮށްފައިވާ ކަމަށް ކަސްޓަމުން ބުނެއެވެ.
ރާއްޖެއަށް މަސްތުވާތަކެތި އެތެރެކުރަން އުޅުމަކީ އާންމުވެފައިވާ ކަމެކެވެ. މި ފަދަ މައްސަލަތަކުގައި ފަތުރުވެރިންނާއި ދިވެހީން ވެސް ހައްޔަރުކުރެއެވެ.