އުމްރާ ގްރޫޕެއް ކަމަށްވާ ޔަލަމްލަމްގެ ހަވާލުގައި އުމްރާގެ އަޅުކަމަށް ގޮސް އުޅެނިކޮށް 63 އަހަރުގެ ދިވެހި ފިރިހެނަކު ގެއްލިއްޖެއެވެ.
ގެއްލިގެން ހޯދަމުން އަންނަނީ ޏ. ފުވައްމުލަކު، ސްޓެއްލާ (ދޫޑިގަން) މުހައްމަދު ދީދީއެވެ.
ޔަލަމްލަމްއިން ބުނީ، މުހައްމަދަކީ އެ ގްރޫޕުގެ ހަވާލުގައި އިއްޔެ މެންދުރުފަހު ސައުދީ ފްލައިޓު SV839އިން ދަތުރުކުރި އުމްރާވެރިންގެ ތެރޭގައި ހިމެނޭ މީހެއް ކަމަށެވެ. އުމްރާގެ އަޅުކަން ފުރިހަމަ ކުރުމަށް ސަޢީ ކުރަނިކޮށް މުހައްމަދު އާއިލާއާ ވަކިވެ ގެއްލިފައިވާ ކަމަށް އެ ގްރޫޕުން ވަނީ ބުނެފައެވެ.
މުހައްމަދު ގެއްލުނުއިރު، އޭނާ ހުރީ އިހްރާމުގައި ކަމަށާއި، އޭނާގެ ކަރުގައި ޔަލަމްލަމް ޖަމާއަތުގެ ފާސް ވެސް އަޅާފައި އޮންނާނެ ކަމަށް ބުނެފައިވެއެވެ.
އެހެން ކަމުން މުހައްމަދު ދީދީއާ ގުޅޭ އެއްވެސް މައުލޫމާތެއް މައްކާއިން ލިބިއްޖެ ނަމަ، 593709493 966+ ނުވަތަ 565836862 966+ އަށް ގުޅުމަށް ޔަލަމްލަމް ގްރޫޕުން އެދިފައިވެއެވެ. އަދި 7901612 ނުވަތަ 9199919އަށް ގުޅައިގެން ވެސް މައުލޫމާތު ހިއްސާ ކުރެއްވޭނެއެވެ.
ހައްޖާއި އުމްރާގެ އަޅުކަމަށް މައްކާއަށް ގޮސް އުޅުމުގެ ތެރޭގައި މީހުން ގެއްލިގެން މީގެ ކުރިން ވެސް ރިޕޯޓު ކޮށްފައިވެއެވެ.