އާ އަހަރު ފާހަގަކުރުމުގެ ގޮތުން ހުޅުމާލޭގައި، ކުލަގަދަ ޚާއްސަ ހަރަކާތްތަކެއް ބާއްވަން މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)އިން ތައްޔާރުވެއްޖެއެވެ.
އެމްއެމްޕީއާރްސީން މިރޭ ބުނީ އާ އަހަރު ފާހަގަކުރުމަށް މި މަހު 31ވަނަ ދުވަހުގެ ރެއާއި، ޖެނުއަރީ އެއްވަނަ ދުވަހު ވެސް ހަރަކާތްތައް ބާއްވަން ނިންމައިފައިވާ ކަމަށެވެ. މި ހަރަކާތްތައް އޮންނާނީ ހުޅުމާލޭ ސެންޓްރަލް ޕާކުގައެވެ.
އެގޮތުން 31ވަނަ ދުވަހުގެ ރޭ ހަރަކާތްތައް އޮންނާނީ ރޭގަނޑު 20:00 އިން 00:00 އަށެވެ. އެ ރޭ ފަތުރުވެެރިއެއްގެ ދަތުރު ދައްކުވައިދޭ 15 މިނެޓުގެ ޚާއްސަ ޑްރޯން ޝޯއެއް އޮންނާނެއެވެ. ހަމައެއާއެކު ބޮޑުބެރުގެ އައިޓަމްތައް ވެސް ކުރިއަށްދާނެއެވެ. މީގެ އިތުރުން ގަޑިން 00:00 ވުމާއެކު ހަވާއެރުވުން ވެސް އެ ސަރަހައްދުގައި އޮންނާނެއެވެ.
މި ހަރަކާތްތަކުގެ އިތުރުން އާ އަހަރާ ދިމާކޮށް ފުޑް ފެސްޓިވަލެއް ވެސް އޮންނާނެއެވެ. ފުޑް ފެސްޓިވަލް އޮންނާނީ މި މަހުގެ 31 ވަނަ ދުވަހާއި ޖެނުއަރީ އެއްވަނަ ދުުވަހެވެ.
އާ އަހަރު ފާހަގަކުރުމުގެ ހަރަކާތްތައް ކުލަގަދަކޮށް މާލޭގައާއި، ރާއްޖޭގެ އެކި ސަރަހައްދުތަކުގައި އަބަދު ވެސް ކުރިއަށް ގެންދެއެވެ.