އައު ސެކިއުރިޓީ ފީޗާތައް ހިމެނޭހެން، ޓްރާންސްޕޯޓް މިނިސްޓްރީން ޑޮމެއިން ރަޖިސްޓްރީ ސެޓްފިކެޓްތައް ދޫކުރަން ފަށައިފިއެވެ.
ސެކިއުރިޓީ ވަރުގަދަކޮށްފައިވާ ފުރަތަމަ ސެޓްފިކެޓް ދޫކުރުމަށް ޓްރާންސްޕޯޓް މިނިސްޓްރީން މިއަދު ވަނީ ރަސްމިއްޔާތެއް ބާއްވައިފައެވެ.
އެ ރަސްމިއްޔާތުގައި ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވީ ޑޮމެއިން ދޫކުރުމުގެ މަސައްކަތް ގަވައިދުގެ ތެރެއަށް ފައްތައި، އައު ސެޓްފިކެޓާއި ރަޖިސްޓްރީ ދެވޭނޭ އުސޫލުތަކެއް މި އަހަރުތެރޭ ކަނޑައަޅާފައި ވާކަމަށެވެ. އެގޮތުން މިހާތަނަށް ދޫކޮށްފައި ހުރި ޑޮމެއިން ރަޖިސްޓްރީތައް މިހާރުގެ ގަވައިދަށް ފައްތަން، ރަޖިސްޓްރީކުރަން މިދިޔަ މަހުގެ 17ގައި ހުޅުވާލުމުން 600 އެއްހައި ފަރާތަކުން އެޕްލިކޭޝަން ހުށަހެޅި ކަމަށް އޭނާ ވިދާޅުވިއެވެ.
އަމީން ވިދާޅުވީ މިހާރު ހަވާލުކުރާ ޑޮމެއިން ރަޖިސްޓްރީއަކީ ސެކިއުރިޓީ ގޮތުން ވަރަށް ވަރުގަދަ އަދި އޭގެ ކޮޕީ ނެހެއްދޭނެ ފެންވަރަށް ތައްޔާރުކޮށްފައި ހުރި ސެޓްފިކެޓްތަކެއް ކަމަށެވެ.
އޭނާ ވިދާޅުވީ މިހާރު މި ހަވާލުކުރަނީ، މިވަގުތު ތައްޔާރުކުރެވެން އޮތް އެންމެ ރަނގަޅު ފެންވަރުގެ ރަޖިސްޓްރީތައް ކަމަށެވެ.
އަޅުގަނޑުމެން މި މައްސަލަ ހައްލުކުރުމުގައި ވެސް އަމަލުކޮށްފައި އޮންނާނީ ރައްޔިތުންނަށް ވަރަށް ފަސޭހައިން މައްސަލަ ހައްލުކުރެވޭނެ ނިޒާމެއްގެ ތެރެއިން. ޓްރާންސްޕޯޓް މިނިސްޓަރު މުޙައްމަދު އަމީން
ޓްރާންސްޕޯޓް މިނިސްޓްރީން ޑޮމެއިންގެ ޚިދުމަތް ދިނުން ހުއްޓައިލީ، ޑޮމެއިން ނަންބަރުތަކާ ގުޅޭ ގިނަ މައްސަލަތަކެއް މިދިޔަ ސަރުކާރުގައި ފެންމަތިވުމުންނެވެ. އެއާއެކު އެ މައްސަލަތައް ވަކި ގޮތަކަށް ނިމެންދެން ޑޮމެއިންގެ ހުރިހާ ޚިދުމަތެއް ހުއްޓުވީ މިދިޔަ ސަރުކާރުގައި ރައީސް އޮފީހުންނެވެ.
މި ސަރުކާރުން، ޑޮމެއިން ދޫކުރުން މިދިޔަ މަހު ފެށޭނެ ކަމަށް ބުނެފައިވީ ނަމަވެސް، މިހާތަނަށް އެ މަސައްކަތް ފެށިފައިނުވެއެވެ.
ޑޮމެއިންގެ ޚިދުމަތަކީ، ދިވެހިންގެ މެދުގައި އަދި ވަކިން ޚާއްސަކޮށް ޒުވާނުންގެ މެދުގައި، މަޤުބޫލުކަން ލިބިފައިވާ ޚިދުމަތެކެވެ. ޑޮމެއިން ގަތުމަށާއި އެކަމާ ގުޅުންހުރި ޚިދުމަތް ހޯދުމަށް އެ ފަރާތްތަކުން ބޮޑެތި ހޭދަތައް ވެސް ކުރެއެވެ.