އެންވަޔަމެންޓް މިނިސްޓްރީގެ އެންދެރި ޕްރޮޖެކްޓުގެ ދަށުން ބޭސިކް ރޭންޖާސް ޓްރެއިނިން ކޯސް ފަރުމާކޮށް ހިންގުމަށް ގައުމީ ޔުނިވާސިޓީ (އެމްއެންޔޫ)އާ މިއަދު ހަވާލުކޮށްފިއެވެ.
އެމްއެންޔޫގައި ބޭއްވި ރަސްމިއްޔާތެއްގައި އެ ކޯސް ހިންގައި ފަރުމާކުރަން ހަވާލުކުރުމަށް ވަނީ އެއްބަސްވުމެއްގައި ސޮއިކޮށްފައެވެ. އެގޮތުން، އެއްބަސްވުމުގައި ސޮއިކުރެއްވީ މިނިސްޓްރީގެ ޑިރެކްޓާ ޖެނެރަލް މުޙައްމަދު ޒާހިރުއާއި އެމްއެންޔޫގެ ވައިސް ޗާންސެލާ ޑރ. އައިޝަތު ޝެހެނާޒް އަލީއެވެ.
އެންވަޔަމެންޓް މިނިސްޓްރީގެ ޑިރެކްޓާ ޖެނެރަލް މުޙައްމަދު ޒާހިރު ---- ސަން ފޮޓޯ/ އަހުމަދު މާނިއު މުޙައްމަދު
އެއްބަސްވުމުގައި ސޮއިކުރައްވައި، ޒާހިރު ވިދާޅުވީ، މިއީ ތިމާވެށީގެ ދާއިރާއިން ތައުލީމު އުނގަންނައިދިނުމަށް ރާއްޖޭގައި އަލަށް ފެށޭ މުހިންމު ހަރަކާތެއް ކަމަށާއި މިއީ ވަރަށް ތަފާތު ކޯހެއް ކަމަށެވެ.
މި ކޯސް ފަރުމާ ކުރާއިރު އެމްއެންޔޫއިން ވިސްނަންޖެހޭ ކަންތައްތަކެއް ޒާހިރު ވަނީ ކިޔައިދެއްވާފައެވެ. އެގޮތުން، ޖަނަވާރުތައް އުޅޭ ގޮތާއި ތަފާތު ދިރުންތައް ހުންނާނެ ފަދަ ތަންތަނަށް ވިސްނަން ޖެހޭނެ ކަމަށް ޒާހިރު ވިދާޅުވިއެވެ.
"ރާއްޖޭގެ ތިމާވެށީގެ މައްސަލަތަކުގެ ތެރޭގައި ވަރަށް ބޮޑެތި މައްސަލަތަކެއް ކުރިމަތިވާ އެއް ދާއިރާ އަޅުގަނޑުމެންގެ ކޮރަލް ރީފްތަކަކީ. ކޮރަލް ރީފް ހިމެނޭ ގޮތަށް އެބަ ހުރި ޕްރޮޓެކްޓެޑް އޭރިއާސް. އެހެންކަމަށްވެއްޖިއްޔާ އެ ޕްރޮޓެކްޓެޑް އޭރިއާއެއް ބަލަހައްޓާ ބަޔަކަށް ކިޔަވާދެވޭއިރު، އެ ޕްރޮޓެކްޓެޑް އޭރިއާގައި ހުންނަ މުހިންމު އޮބްޖެޓުތައް ދެނެގަންނަން ޖެހޭނެ" އޭނާ ވިދާޅުވިއެވެ.
އޭގެއިތުރުން، ހިމާޔަތްކޮށްފައިވާ ސަރަހައްދުތަކުގައި އުޅޭ ދިރުންތަކާއި އެތަންތަނާ ބެހޭ މައުލޫމާތު ކޯހުގެ ދަރުވަރުންނަށް ދިނުމަށް އޭނާ ވަނީ އެދިވަޑައިގެންފައެވެ.
ހުވާކުރުމަށް ބޭއްވި ރަސްމިއްޔާތުގެ ތެރެއިން --- ސަން ފޮޓޯ/ އަހުމަދު މާނިއު މުޙައްމަދު
ޒާހިރު ވިދާޅުވީ، ރޭންޖާސްއަށް ކޯސްތައް އަމާޒުކޮށްގެން މުސްތަގުބަލުގައި ކުރިއަށްގެންދޭވޭ ނަމަ ދާއިރާގެ ނަތީޖާތައް އެއް ފެންވަރެއްގައި ހިފެހެއްޓޭނެ ކަމަށާއި މިދާއިރާގައި ރަނގަޅު މީހުން ކުރިއަރަން މަގުފަހިވާނެ ކަމަށެވެ.
ކޮލެޖް އޮފް ފިޝަރީސް އެންޑް އޯޝަން ސައިންސަސްގެ ޑީން ޑރ. އަހުމަދު ރިޔާޒް ޖައުހަރީ ވަނީ ކޯސް ކުރިއަށް ގެންދާނެ ގޮތް ކިޔައިދެއްވާފައެވެ. އެހެން ކޯސްތަކާ އަޅާބަލާއިރު، މި ކޯހުގައި އަމަލީ މަސައްކަތުގެ ބައި ބޮޑުވާނެ ކަމަށާއި ކޯސް ފުރިހަމަ ކުރާ ދަރިވަރުންނަށް އުޅަނދުފަހަރު ދުއްވުމުގެ ލައިސަންސް ލިބޭނެ ކަމަށް ރިޔާޒް ވިދާޅުވޮއެވެ.
އެއާއެކު، ޑައިވިންކޮށްގެން ސާވޭތައް ހެދުމާއި ފަރުތަކާއި ޗަސްބިންތަކުގައި ދަރިވަރުން އަމިއްލައަށް ސާވޭ ހިންގައި، ކުދި ރިސާޗުތައް ހިންގުމުގެ ގާބިލުކަން ހުންނާނެ ވަރަށް މައުލޫމާތު ފޯރުކޮށްދޭނެ ކަމަށް ރިޔާޒް ވަނީ ވިދާޅުވެފައެވެ.