ސްޕޮޓިފައިގެ ތާރީޚުގައި މިހާތަނަށް މަހެއްގެ މައްޗަށް އެންމެ ގިނަ ބަޔަކު އަޑުއަހާ އާޓިސްޓުގެ ރެކޯޑު ބްރޫނޯ މާސް މުގުރާލައިފިއެވެ.
މަޝްހޫރު ލަވަކިޔުންތެރިޔާ ބްރޫނޯ މާސް ލަވައެއް ރިލީޒްނުކޮށް ގިނަ ދުވަހު މަޑު ކުރުމަށް ފަހު މި އަހަރު ތެރޭގައި ވަނީ ދެ ސިންގަލް ނެރެފައެވެ. މި ސިންގަލްއާ އެކު ބްރޫނޯ ވަނީ މަހުގެ އެންމެ ގިނަ ބަޔަކު އަޑުއަހާ ލަވަކިޔުންތެރިޔަށްވެފައެވެ.
ބްރޫނޯ މި އަހަރު އެންމެ ފުރަތަމަ ރިލީޒްކޮށްފައިވަނީ ލޭޑީ ގާގާއާ އެކު "ޑައި ވިތު އަ ސްމައިލް" ނަމުގައި ސިންގަލްއެކެވެ. އެއަށް ފަހު ބްލެކްޕިންކްގެ ރޮޒޭއާ އެކު "އޭޕީޓީ" ނަމުގައި ވަނީ ސިންގަލްއެއް ރިލީޒްކޮށްފައެވެ. މި ދެ ސިންގަލް ވެސް ވެފައިވަނީ ބޮޑު ހިޓުތަކަށެވެ.
މި ދެ ހިޓާ އެކު ބްރޫނޯ ވަނީ ސްޕޮޓިފައިގެ ރިކޯޑު ވެސް މުގުރާލައި މުޅީން އާ ރެކޯޑެއް ގާއިމުކޮށްފައެވެ.
އެގޮތުން، ބްރޫނޯއަށް މަހެއްގެ މައްޗަށް އެވަރެޖުކޮށް 140 މިލިއަން ސްޓްރީމްސް ސްޕޮޓިފައިއިން ލިބެއެވެ. މިއީ މިހާތަނަށް ތަރިއަކަށް އެންމެ ގިނައިން މަހެއްގެ މައްޗަށް ލިބިފައިވާ ސްޓްރީމިންއެވެ. މި އަދާ ގާތްކުރާ ވަރަށް އެއްވެސް ތަރިއަކަށް އެރިފައެއް ނުވެއެވެ.
ސްޕޮޓިފައިގައި އެކަނި ވެސް ގާގާއާ އެކު ކިޔާފައިވާ ސިންގަލް ވަނީ އެއް ބިލިއަން ސްޓްރީމް ފަހަނައަޅާ ގޮސްފައެވެ. ރޮޒޭއާ އެކު ރިލީޒްކުރި ސިންގަލް ވެސް 700 މިލިއަން ސްޓްރީމްއާ ގާތް ކުރާއިރު ދުވަސްކޮޅެއްގެ ތެރޭގައި އެއް ބިލިއަނަށް އަރާނެއެވެ.
ސްޕޮޓިފައިއިން މަހެއްގެ މައްޗަށް 100 މިލިއަނާ އެކު އެންމެ ގިނަ ސްޓްރީމް ލިބޭ ތަރިއަކަށް އެންމެ ފުރަތަމަ ރިކޯޑު ހޯދީ "ދަ ވީކެންޑް"އެވެ. އޭނާއަށް އެ ރެކޯޑު ގާއިމުވެފައިވަނިކޮށް އެ ރިކޯޑު މުގުރާލީ ޓޭލާ ސްވިފްޓެވެ. ޓޭލާގެ ރިކޯޑުގައި މި ވަގުތު އޮތީ 118 މިލިއަން ސްޓްރީމެވެ.