އަޒަރުބައިޖާނު އެއާލައިންސްގެ ބޯޓެއް މިއަދު ކަޒަކިސްތާނަށް ވެއްޓި، ގިނަ އަދަދެއްގެ މީހުން މަރުވެފައިވާ ކަމުގެ ބިރު އުފެދިއްޖެއެވެ.
ރޮއިޓާސްއިން ރިޕޯޓުކޮށްފައިވާ ގޮތުގައި، އެ ބޯޓު ވެއްޓުނީ ކަޒަކިސްތާނުގެ އަކްތައު ސިޓީ ކައިރިއަށެވެ.
ކަޒަކިސްތާނުގެ ޓްރާންސްޕޯޓް މިނިސްޓްރީން ވަނީ ބޯޓުގައި 62 ފަސިންޖަރުންނާއި ފަސް ކުރޫއިން ތިބި ކަމަށް ބުނެފައެވެ. އެ ބޯޓުން 27 މީހުން ސަލާމަތްކޮށް، އެ ސަރަހައްދާ ކައިރީ ހޮސްޕިޓަލަކުން ފަރުވާ ދޭން ފަށައިފައިވާ ކަމަށް ވެސް މިނިސްޓްރީން ބުންޏެވެ.
ރަޝިއާގެ ނޫސްތަކުގައިވާ ގޮތުން އެ ބޯޓު ދަތުރުކުރަމުންދިޔައީ އަޒަރުބައިޖާނުގެ ވެރިރަށް ބާކޫއިން ޗެޗްނިއާގެ ގްރޮޒްނީއަށެވެ.
އެ ހާދިސާގެ ވީޑިއޯތަކެއް ކަމަށް ބުނާ ވީޑިއޯތަކެއް ސޯޝަލް މީޑިއާގައި ދައުރުވަމުން އަންނައިރު، ބޯޓު ވެއްޓި، ރޯވާ މަންޒަރު ފެނެއެވެ. އަދި ބޯޓު ވެއްޓޭ ފަހުން އަނިޔާވެފައިވާ ފަސިންޖަރުންތަކެއް ބޯޓުން ފައިބާ މަންޒަރު ވެސް ވީޑިއޯތަކުން ފެނެއެވެ.
އެ ހާދިސާގައި މަރުވި މީހުންނާއި އަނިޔާވި މީހުންގެ ތަފުސީލެއް މިހާތަނަށް ހާމަކޮށްފައިނުވެއެވެ. އަދި ބޯޓު ވެއްޓުނު ސަބަބެއް ވެސް މިހާތަނަށް އެއްވެސް ގައުމަކުން ބުނެފައިނުވެއެވެ.
ރަޝިއާގެ ވައިގެދަތުރުފުރުގެ ކަންތައްތައް ބަލަހައްޓާ އިދާރާއިން ނެރުނު ބަޔާނެއްގައި ވަނީ، ބޯޓުގެ ބުރަފަތީގައި ދޫންޏެއް ޖެހުމުން އެމާޖެންސީކޮށް ޖައްސަން ޕައިލެޓް މަސައްކަތް ކުރި ކަމަށް ދޭހަވާ މައުލޫމާތު ލިބިފައިވާ ކަމަށް ބުނެފައެވެ.