އަޒަރުބައިޖާނުގެ ބޯޓެއް މިއަދު ކަޒަކިސްތާނަށް ވެއްޓުނު ހާދިސާގައި މިހާތަނަށް 38 މީހުން މަރުވެފައިވާ ކަމަށް އަލް ޖަޒީރާއިން ރިޕޯޓުކޮށްފިއެވެ.
ފަސްދޮޅަސް ދެ ފަސިންޖަރުންނާއި ފަސް ފަޅުވެރިންނާއެކު ބޯޓު ވެއްޓުނީ ކަޒަކިސްތާނުގެ އަކްތައު ސިޓީއާ ގާތްގަނޑަކަށް ތިން ކިލޯމީޓަރު (1.8 މޭލު) ދުރަށް އެމަޖެންސީގައި ޖައްސަން އުޅުމުގެ ތެރޭގައެވެ.
"ހާލަތު މާ ރަނގަޅެއް ނޫން، 38 މީހުން މަރުވެއްޖެ،" ކަޒަކިސްތާނުގެ ބޮޑުވަޒީރުގެ ނާއިބު ކަނާތު ބޮޒުމްބަޔޭވްއާ ހަވާލާދީ ރަޝިޔާގެ އިންޓަފެކްސް ނިއުސް އެޖެންސީން ބުނެފައިވެއެވެ.
އެމްބްރޭއާ 190 މަތިންދާބޯޓު ވެއްޓުނީ އަޒަރުބައިޖާނުގެ ވެރިރަށް ބާކޫ އިން ރަޝިޔާގެ ސިޓީއެއް ކަމަށްވާ ގްރޮޒްނީ އަށް ދަތުރުކުރަމުން ދަނިކޮށެވެ.
އަޒަރުބައިޖާންގެ ޕްރޮސިކިއުޓާ ޖެނެރަލްގެ އޮފީހުން ކުރިން ބުނެފައި ވަނީ ބޯޓުގައި ތިބި 67 މީހުންގެ ތެރެއިން 32 މީހުން ސަލާމަތްވެފައިވާ ކަމަށެވެ.
"އަޒަރުބައިޖާންގެ ޑެޕިއުޓީ ޕްރޮސިކިއުޓާ ޖެނެރަލް އިސްކޮށް ހުންނަވައިގެން ތަހުގީގު ޓީމެއް ކަޒަކިސްތާނަށް ގޮސް، ބޯޓު ވެއްޓުނު ސަރަހައްދުގައި މަސައްކަތް ކުރަމުން އެބަދޭ،" އެ އޮފީހުން ނެރުނު ބަޔާނެއްގައި ބުނެފައިވެއެވެ.
އަޒަރުބައިޖާން އެއާލައިންސްއާ ހަވާލާދީ ރަޝިއާގެ ދައުލަތުގެ ނޫސް އޭޖެންސީ ޓާސް އިން ބުނީ އެ ހާދިސާގެ ތަހުގީގު ނިމެންދެން ބާކޫ އިން ރަޝިޔާގެ ޗެޗްނިއާ ސަރަހައްދަށް ކުރާ ހުރިހާ ދަތުރުތަކެއް މެދުކަނޑާލާފައިވާ ކަމަށެވެ.
ބޯޓު ވެއްޓުން ސަރަހައްދުގެ ޑްރޯން ވިއު އެއް. ފޮޓޯ/ރޮއިޓާސް
އަލް ޖަޒީރާއިން ބުނީ ޕްރިލިމިނަރީ ރިޕޯޓްތަކަށް ބަލާއިރު، ގްރޮޒްނީގައި ވަރަށް ބޮޑަށް ދުން ފިނި އުފެދިފައި ހުރުމުގެ ސަބަބުން އެކްސިޑެންޓްގެ ކުރިން އެހެން އެއާޕޯޓަކަށް ބޯޓު ޖެއްސުމަށް އެ ބޯޓުން އެދުނެވެ.
ރަޝިއާގެ ވައިގެދަތުރުފުރުގެ ކަންތައްތައް ބަލަހައްޓާ އިދާރާއިން ނެރުނު ބަޔާނެއްގައި ކުރިން ވަނީ، ބޯޓުގެ ބުރަފަތީގައި ދޫންޏެއް ޖެހުމުން އިމަޖެންސީކޮށް ޖައްސަން ޕައިލެޓް މަސައްކަތް ކުރި ކަމަށް ދޭހަވާ މައުލޫމާތު ލިބިފައިވާ ކަމަށް ބުނެފައެވެ.
ބޯޓުގައި ތިބި މީހުންގެ ތެރޭގައި އަޒަރުބައިޖާން، ރަޝިޔާ، ކަޒަކިސްތާން އަދި ކިރްގިސްތާނުގެ ރައްޔިތުން ހިމެނެއެވެ.
އެ އެއާލައިނުން ވަނީ ފަސިންޖަރުންގެ އާއިލާގެ މެމްބަރުންނަށް ގުޅޭނެ ހޮޓްލައިނެއް ގާއިމްކޮށްފައެވެ.
އެ ހާދިސާއާ ގުޅިގެން އަޒަރުބައިޖާނުގެ ރައީސް އިލްހާމް އަލިޔޭވް ވަނީ މިއަދު ބާއްވާ ސަމިޓެއްގައި ބައިވެރިވެވަޑައިގަތުމަށް ރަޝިޔާއަށް ކުރައްވަން ހަމަޖެހިފައިވާ ދަތުރުފުޅު ވެސް ކުރު ކުރައްވާފައެވެ.