މައިކްރޯސޮފްޓުން އެ ކުންފުނީގެ 365 ކޯޕައިލެޓް އުފެއްދުމަށް އޯޕަން އޭއައި ނޫން އެހެން ކުންފުނިތަކުގެ މޮޑެލްތައް ބޭނުންކުރަން ނިންމައިފިއެވެ.
މި މަޢުލޫމާތު ހާމަކޮށްފައިވަނީ ރޯއިޓާސް އިންނެވެ.
ރޮއިޓާސްއިން ރިޕޯޓްކޮށްފައިވާ ގޮތުގައި މައިކްރޯސޮފްޓުން މިގޮތަށް ނިންމީ އޯޕަން އޭއައިގެ ޖީޕީޓީ-4 މޮޑެލް އަގުބޮޑުވުމާއި، އެ ކުންފުނީގެ ވިޔަފާރި ކަސްޓަމަރުންނަށް އެކަށީގެންވާ ވަރަށް އަވަސް ނޫން ކަމަށް ފެންނާތީއެވެ. 365 ކޮޕައިލެޓަކީ މައިކްރޯސޮފްޓުގެ އުފެއްދުންތެރިކަމުގެ ސޮފްޓްވެއާތަކުގައި ހިމެނޭ އޭއައި އެހީތެރިއެކެވެ.
ނަމަވެސް، މި އުފެއްދުމާ މެދު ކަސްޓަމަރުންނާއި މައިކްރޯސޮފްޓުގެ މުވައްޒަފުން ހިތްހަމަނުޖެހޭ ކަމަށް ވެސް ވަނީ ފާހަގަކުރެވިފައެވެ. ބިޒްނަސް އިންސައިޑާ އިން ރިޕޯޓުކުރި ގޮތުގައި މައިކްރޯސޮފްޓުގެ ބައެއް މުވައްޒަފުން ވަނީ މި އާލާތްތައް އެކަށީގެންނުވާ ކަމަށް ސިފަކޮށްފައެވެ. އަދި 75 އިންސައްތަ ވަގުތު ރަނގަޅަށް މަސައްކަތް ނުކުރާ ކަމަށް ވެސް ބުނެފައިވެއެވެ.
މި ބަދަލާ ގުޅިގެން މައިކްރޯސޮފްޓާއި އޯޕަން އޭއައި އާ ދެމެދު އޮތް ގުޅުން އިތުރަށް ހީނަރު ވެދާނެ ކަމަށް ބެލެވެއެވެ. ކުރިން މި ދެ ކުންފުނި ވަނީ ގާތް ގުޅުމެއް ބާއްވާފައެވެ.
މައިކްރޯސޮފްޓުން އޯޕަން އޭއައި އަށް ބިލިއަން ޑޮލަރުގެ އިންވެސްޓްމަންޓް ދީފައިވާއިރު، އޭގެ ބަދަލުގައި އެންމެ ފަހުގެ އޭއައި މޮޑެލްތަކަށް އަވަހަށް ވާސިލުވުމުގެ ފުރުސަތު ލިބިފައިވެއެވެ.
ބިޒްނަސް އިންސައިޑާ އާ ވާހަކަދެއްކި ބައެއް ކަސްޓަމަރުން ވަނީ 365 ކޯޕައިލެޓްގެ އަގު މާ ބޮޑުކަމަށް ފާހަގަކޮށްފައެވެ.
އޯޕަން އޭއައިގެ ޗެޓްޖީޕީޓީއަކީ ވަރަށް ގިނަ މަޢުލޫމާތުތަކެއްގެ މައްޗަށް ތަމްރީނުކޮށްފައިވާ އާންމު މޮޑެލެއް ކަމުން، އޭގެ ބޭނުންކުރުން އަގުބޮޑުވެ ލަސްވެއެވެ. އެހެންކަމުން ގިނަ މޮޑެލްތައް ހުންނަނީ "ލައިޓް" ވާޝަންގައެވެ.
މައިކްރޯސޮފްޓުން މިހާރު ވަނީ ފައި-4 ފަދަ ކުދި މޮޑެލްތައް އަމިއްލައަށް ތަމްރީނުކުރަން ފަށާފައެވެ. އަދި 365 ކޯޕައިލެޓް އަވަސްކޮށް ހަރުދަނާކުރުމަށް އެހެން އޯޕަން-ވެއިޓް މޮޑެލްތައް ބޭނުންކުރަން ބަލާކަމަށް ރޮއިޓާސް އިން ރިޕޯޓުކޮށްފައިވެއެވެ.
މައިކްރޯސޮފްޓުން އޯޕަން އޭއައި އަށް ބިލިއަން ޑޮލަރުގެ އިންވެސްޓްމަންޓް ދީފައިވާއިރު، އެ އިންވެސްޓްމަންޓް އަނބުރާ ލިބެންދެން އޯޕަން އޭއައިގެ ފައިދާގެ 75 އިންސައްތަ ލިބޭނެއެވެ.
އަދި އޭގެ ފަހުން ވެސް އެ ކުންފުނީގެ ބޮޑު ހިއްސާއެއް އޮންނާނެއެވެ. މިގޮތުން މައިކްރޯސޮފްޓަށް އަމިއްލަ މޮޑެލްތައް ތަރައްގީކުރުމާއެކު، އޯޕަން އޭއައިގެ ކުރިއެރުމުގެ ފުރުސަތު ވެސް ހޯދިދާނެއެވެ.