މައިކްރޯސޮފްޓުން އޭއައި ތަރައްގީކުރަން 80 ބިލިއަން ޑޮލަރު ހޭދަކުރަން ނިންމައިފިއެވެ.
މައިކްރޯސޮފްޓުން ނެރުނު ބްލޮގް ޕޯސްޓެއްގައި ބަޔާންކޮށްފައި ގޮތުގައި މި އަހަރު އޭއައި މޮޑެލްތައް ތަމުރީނުކުރުމާއި އޭއައި އަދި ކްލައުޑް ބިނާކުރެވިފައިވާ އެޕްލިކޭޝަންތައް ބޭނުންކުރުމަށްޓަކައި ޑޭޓާ ސެންޓަރުތައް ތަރައްގީކުރަަން 80 ބިލިއަން ޑޮލަރު އެ ކުންފުނިން ހޭދަކުރަން ވަނީ ނިންމާފައެވެ.
ކުރިން 2022 ވަނަ އަހަރު އޯޕަންއޭއައިއިން ޗެޓްޖީޕީޓީ ތައާރަފުކުރި ފަހުން އޭއައިއަށް ކުރާ އިންވެސްޓްމަންޓް އިތުރުވެފައިވެއެވެ. މިހާރު ގިނަ ކުންފުނިތަކުން އަންނަނީ އެ ފަރާތްތަކުގެ އުފެއްދުންތަކާއި ޚިދުމަތްތަކުގައި އޭއައި ހިމެނުމަށް މަސައްކަތް ކުރަމުންދެއެވެ.
މައިކްރޯސޮފްޓުގެ ވައިސް ޗެއާ އަދި ޕްރެޒިޑެންޓް ބްރެޑް ސްމިތު ވިދާޅުވި ގޮތުގައި 80 ބިލިއަން ޑޮލަރުގެ ތެރެއިން ދެބައިކުޅަ އެއްބަޔަށްވުރެ ގިނަ އަދަދެއް އިންވެސްޓްކުރާނީ އެމެރިކާގައެވެ.
އޭއައިއަށް ވަރަށް ބޮޑު ކޮމްޕިއުޓިން ޕަވާއެއް ބޭނުންވާތީ، ޓެކް ކުންފުނިތަކަށް އެތައް ހާސް ޗިޕްތައް އެއްކޮށްލުމަށް މަގުފަހިކޮށްދޭ ޚާއްސަ ޑޭޓާ ސެންޓަރުތަކަށް ޑިމާންޑް އިތުރުވެފައިވެއެވެ.
މައިކްރޯސޮފްޓުން ވަނީ އޭއައި އިންފްރާސްޓްރަކްޗާ ވަރުގަދަކުރުމަށާއި ޑޭޓާ ސެންޓަރުތަކުގެ ނެޓްވޯކް ފުޅާކުރުމަށް ވޭތުވެދިޔަ އަހަރުތަކުގައި ވެސް އެތައް ބިލިއަން ޑޮލަރެއް އިންވެސްޓްކޮށްފައެވެ.
އެނަލިސްޓުން ލަފާކުރާ ގޮތުގައި މައިކްރޯސޮފްޓުގެ މި އަހަރުގެ ކެޕިޓަލް އެކްސްޕެންޑިޗާއާއި ކެޕިޓަލް ލީސްތައް ޖުމްލަކޮށް 84.24 ބިލިއަން ޑޮލަރަށް އަރާނެއެވެ.