މަސްތުވާތަކެތީގެ މައްސަލައެއްގައި 50 އަހަރުގެ ޖަލު އަދަބެއް ކަނޑައެޅެން އޮއްވައި ދައުލަތާއެކު އެއްބަސްވުން ހަދައިގެން ޖަލު އަދަބުން 25 އަހަރު އުނިކޮށްދީފިއެވެ.
މިއީ މަސްތުވާތަކެތީގެ ބާވަތެއް ކަމަށްވާ ކެނެބިސް އަދި ޑައިމޯފިން ޓްރެފިކު ކުރި ކަމަށްބުނެ، މާލޭ، މއ. ސޭބޫގޭ މުހައްމަދު ހަސަންގެ މައްޗަށް ކޮށްފައިވާ ދެ ދައުވާއެކެވެ. މި މައްސަލައިގައި ކެނެބިން އަދި ޑައިމޯފިން ޓްރެފިކް ކުރި ކަމުގެ ދައުވާ ވެސް ކޮށްފައި ވަނީ ވަކިންނެވެ.
ދައުވާގައި ބުނެފައިވާ ގޮތުން މި އަހަރުގެ މެއިމަހުގެ ދެވަނަ ދުވަހު 15:11 އެހާކަންހާއިރު، އިތުރު ބަޔަކާ ބައިވެރިވެގެން، މަސްތުވާތަކެތީގެ ވިޔަފާރިކުރާ ކަމަށް ކައުންޓަ ނާކޮޓިކްސް އިންޓެލިޖެންސުން ދިން މައުލޫމާތާއެކު، ކޯޓު އަމުރެއްގެ ދަށުން މުހައްމަދު ހަސަންވަނީ ހައްޔަރުކޮށްފައެވެ. އެ އަމުރުގެ ދަށުން އޭނާ ދިރިއުޅޭގެ ބަލައިފާސްކުރިއިރު، އޭނާގެ ކޮޓަރީގައި ހުރި އެނދު ދަށުން ޓައިލްސްގަނޑު މަތީގައި އޮތް ފޮތިކޮތަޅެއްގެ ތެރެއިން 1.08 ކިލޯގެ ޑައިމޯފިން ވަނީ ފެނިފައެވެ.
ހަމަ އެ ތަނުން 1.7 ކިލޯގެ ކެނެބިސް ވެސް ވަނީ ހޯދައިފައެވެ.
މީގެ އިތުރުން މުހައްމަދު ހަސަން ދިރިއުޅޭ ތަނާއި އޭނާގެ ހަށިގަނޑު ބަލައިފާސްކުރުމުގެ ތެރެއިން 9،485 ރުފިޔާ ވެސް ވަނީ ހޯދައިފައެވެ. އެ ފައިސާއަކީ މަސްތުވާތަކެތީގެ ވިޔަފާރިކޮށްގެން ހޯދި ފައިސާ ކަމަށްވާތީ، އެ ފައިސާ ދައުލަތަށް ނަގައިދިނުމަށް ވެސް ދައުވާގައި އެދިފައިވެއެވެ.
މި ދެ މައްސަލައިގައި ވެސް ހަސަން ވަނީ ދައުލަތާއެކު އިއުތިރާފުގެ އެއްބަސްވުމެއް ހަދައިފައެވެ.
މަސްތުވާތަކެއްޗާބެހޭ ގާނޫނުގެ ދަށުން، ޑައިމޯފިން އަދި ކެނެބިސް ޓްރެފިކް ކުރުމުގެ ކުށުގެ އަދަބަކީ އުމުރަށް (25 އަހަރަށް) ޖަލަށްލުމާއެކު، 100،000 ރުފިޔާއާ 10،000،000 ރުފިޔާއާ ދެމެދުގެ އަދަދަކުން ޖޫރިމަނާ ކުރުމެވެ.
އަދި މި ފަދަ ކުށެއް ކުރަން ކުރަން އުޅުމަކީ، ނުވަތަ އެ ކަމުގައި އެހީތެރިވެދީ ނުވަތަ އެއްވެސް ސިފައެއްގައި ބައިވެރިވުމަކީ ވެސް ކުށެކެވެ. އެ ކުށުގެ އަދަބަކީ 18 އަހަރަށް ޖަލަށްލުމާއެކު، 75،000 ރުފިޔާއާ 7،500،000 ރުފިޔާއާ ދެމެދުގެ އަދަދަކުން ޖޫރިމަނާ ކުރުމެވެ.
އެހެން ކަމުން މި މައްސަލައިގައި މުހައްމަދު ހަސަންގެ މައްޗަށް ކަނޑައެޅޭނެ އަދަބަކީ 50، އަހަރަށް ޖަލަށްލުމާއެކު 20 މިލިއަން ރުފިޔާއަށްވުރެ ކުޑަ އަދަދަކުން ޖޫރިމަނާ ކުރުމެވެ.
އެހެން ނަމަވެސް އިއުތިރާފުގެ އެއްބަސްވުމުގެ ދަށުން، މި ދެ މައްސަލައިގައި ވެސް އޭނާ ތަންފީޒު ކުރަންޖެހޭ އަދަބަކީ 12 އަހަރާ ހަ މަސްދުވަހުގެ ޖަލު އަދަބެއް ކަމަށް ވަނީ އެއްބަސްވެފައެވެ. ދެ ދައުވާ އެއްކޮށްލައިގެން އެއީ، އުމުރުދުވަހުގެ ޖަލު އަދަބެކެވެ. އަދި މި ދެ މައްސަލައިގެ ޖޫރިމަނާ އެއްކޮށްލައިގެން އޭނާ ދައުލަތަށް ދައްކަންޖެހެނީ 100،000 ރުފިޔާއެވެ.
މި މައްސަލައިގައި ކްރިމިނަލް ކޯޓުން ހުކުމްކޮށްފައި ވަނީ، ދައުލަތުން މުހައްމަދު ހަސަނާއެކު ހަދާފައިވާ އެއްބަސްވުމާ އެއްގޮތަށް ދެ މައްސަލަ އެއްކޮށްލައިގެން 25 އަހަރަށް، ނުވަތަ އުމުރަށް ޖަލަށްލުމާއެކު 100،000 ރުފިޔާއިން ޖޫރިމަނާ ކުރުމަށެވެ. އަދި އޭނާ ދިރިއުޅޭތަން ބަލައިފާސްކުރުމުގެ ތެރެއިން ފެނުނު 9،485 ރުފިޔާ ދައުލަތަށް ނެގުމަށެވެ.