މި ސަރުކާރުގެ ފުރަތަމަ ފިނޭންސް މިނިސްޓަރު ޑރ. މުޙައްމަދު ޝަފީގު ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ)ގެ ބޯޑަށް އައްޔަންކޮށްފިއެވެ.
ޕްރައިވެޓައިޒޭޝަން އެންޑް ކޯޕަރައިޓައިޒޭޝަން ބޯޑު (ޕީސީބީ)ގެ ވެބްސައިޓުގައި އެ ކަން ވަނީ ހާމަކޮށްފައެވެ. ސައިޓުން ފެންނަ ގޮތުގައި އޭނާ ބޯޑަށް އައްޔަންކޮށްފައިވަނީ މި މަހުގެ ދެވަނަ ދުވަހެވެ.
މީގެ ކުރިން ޝަފީގު ވަނީ އެޗްޑީއެފްސީގެ ޗީފް ފައިނޭންޝިއަލް އޮފިސަރު (ސީއެފްއޯ)ގެ މަގާމު އަދައިކުރައްވައިފައެވެ. އެއީ 2021 އިން 2023 އަށެވެ. އޭގެ ކުރިން ވެސް އެ ކުންފުނީގެ އިސް މަގާމުތައް ޝަފީގު އަދައިކުރެއްވިއެވެ.
ޝަފީގަކީ ރައީސް ޑރ. މުޙައްމަދު މުއިއްޒުގެ ކެބިނެޓުގައި ހިމެނުއްވި ފުރަތަމަ މާލީ ވަޒީރެވެ. އެ މަނިކުފާނު ކެބިނެޓަށް ގެންނެވި ބަދަލާއެކު ޝަފީގު އިސްތިއުފާ ދެއްވީ ސެޕްޓެމްބަރު މަހުގެ 30ވަނަ ދުވަހެވެ.