ރާއްޖޭގައި ފުޅާ ދާއިރާއެއްގައި ހަށި ވިއްކި ބިދޭސީންތަކަކާއި އެޖެންޓުންތަކެއް އިމިގްރޭޝަނުން އަތުލައިގެންފިއެވެ.
އިމިގްރޭޝަނުން ކުރި ޕޯސްޓެއްގައި ބުނީ، އެމީހުން އަތުލައިގަތީ ރާއްޖޭގައި ހަށިވިއްކުމުގެ ވިޔަފާރި ކުރަމުން ދިޔަ ބިދޭސީން ހޯދުމަށް ފުލުހުންނާ ގުޅިގެން ހިންގި ޚާއްސަ އިންސްޕެކްޝަނެއްގެ ތެރެއިން ކަމަށެވެ.
އެގޮތުން، އެ އިންސްޕެކްޝަންތަކުގައި ހަތް ބިދޭސީ އަންހެނުންނާއި ދެ ބިދޭސީ އެޖޭންޓުން އަތުލައިގަނެފައި ވާއިރު، އޭގެތެރެއިން ތިން އަންހެނަކު ރާއްޖެއަށް އަނބުރާ ނާދެވޭ ގޮތަށް ޑީޕޯޓުކޮށްފައިވާ ކަމަށް އިމިގްރޭޝަނުން ބުނެއެވެ.
އަދި، ބާކީ ހަ މީހުން ޑީޕޯޓު ކުރުމުގެ މަސައްކަތް ކުރަމުން އަންނަ ކަމަށް އިމިގްރޭޝަނުން ވަނީ ބުނެފައެވެ.
އިމިގްރޭޝަނުން މިދިޔަ މަހު ވެސް ވަނި ހަށިވިއްކުމުގެ ވިޔަފާރި ކުރި ހަ ބިދޭސީން އަތުލައިގަނެ ޑީޕޯޓު ކޮށްފައެވެ.
މި ސަރުކާރުން ދަނީ ގަވާއިދާ ޚިލާފަށް އުޅޭ ބިދޭސީން އަތުލައިގަތުމަށް ޚާއްސަ އޮޕަރޭޝަންތައް ކުރިއަށް ގެންދަމުންނެވެ. އަދި ހަށި ވިއްކާ ބިދޭސީން އަތުލައިގަތުމަށް ވެސް އޮޕަރޭޝަންތައް ކުރިއަށް ގެންދެއެވެ.