ކޮރަޕްޝަނުން ހޯދާފައިވާ މުދަލާއި ފައިސާ ދައުލަތަށް އަނބުރާ ރައްދު ކުރާ މީހުންނަށް މައާފު ދިނުމާ މެދު ވިސްނަވަމުން ގެންދަވާ ކަމުގައި އިންޑޮނޭޝިޔާގެ ރައީސް ޕްރަބޮވޯ ސުބިއަންތޯ ވިދާޅުވެއްޖެއެވެ.
ސުބިއަންތޯ އެކަން ހާމަކުރައްވާފައި ވަނީ މިސްރަށް ކުރައްވަމުން ގެންދަވާ ދަތުރުފުޅުގައި އެ ރަށުގައި ހުންނަ ޔުނިވާސިޓީއެއްގައި ތައުލީމު ހާސިލު ކުރަމުންދާ އިންޑޮނޭޝިޔާގެ ދަރިވަރުންނާ މުޚާތަބު ކުރައްވައި ވާހަކަފުޅު ދައްކަވަމުންނެވެ.
އެކަމުގެ ތަފްސީލެއް ނުދެއްވި ނަމަވެސް ސުބިއަންތޯ ވިދާޅުވީ ކޮރަޕްޝަނުން ހޯދާފައިވާ މުދަލާއި ފައިސާގެ މައުލޫމާތު އިތުރު ބަޔަކަށް ހާމަ ނުކޮށް އަނބުރާ ދައުލަތަށް ރައްދު ކުރެވޭނެ ގޮތްތަކެއް އިންތިޒާމު ކުރައްވާނެ ކަމުގައެވެ.
އޮކްޓޫބަރު 20 ވަނަ ދުވަހު އިންޑޮނޭޝިޔާގެ ވެރިކަމާ ހަވާލުވެ ވަޑައިގެންނެވި ޕްރަބޮވޯ ވަނީ ކޮރަޕްޝަނާ ދެކޮޅަށް ގިނަގުނަ މަސައްކަތްތަކެއް ކުރައްވާނެ ކަމަށް ވިދާޅުވެފައެވެ. އެގޮތުން ކޮރަޕްޝަންގެ މައްސަލަ ހައްލުކުރުމަށް ހުށަހަޅުއްވާފައިވާ އެއް ސިޔާސަތަކީ، ދައުލަތާއި ސަރުކާރުގެ އިދާރާތަކުގެ ބައެއް މުވައްޒަފުންގެ މުސާރަ ބޮޑު ކޮށްދެއްވުމެވެ.
މަސްރަހު ދިރާސާ ކުރާ ފަރާތްތަކުން ބުނާ ގޮތުގައި އިންޑޮނީޝިޔާގެ ކުރީގެ ރައީސް ޖޮކޯ ވިޑޯޑޯގެ 10 އަހަރުގެ ވެރިކަމުގެ ތެރޭގައި ކޮރަޕްޝަން ނައްތައިލުމަށް ހަރުދަނާ މަސައްކަތްތަކެއް ކުރައްވާފައެއް ނުވެއެވެ.
މިދިޔަ ހަފުތާ ސުބިއަންތޯ ވަނީ، އިންޑޮނީޝިޔާގެ ޖަލުތަކުގައި ޙުކުމް ތަންފީޒު ކުރަމުންދާ ކުށްވެރިންގެ ތެރެއިން 44,000 ގައިދީންނަށް މައާފު ދެއްވާފައެވެ. އެއީ، އިންޑޮނީޝިޔާގެ ޖަލުތަކުގައި ހުކުމް ތަންފީޒު ކުރަމުންދާ މީހުންގެ އާބާދީގެ 30 ޕަސެންޓެވެ. ޕްރަބޮވޯ މަޢާފު ދެއްވާފައިވާ މީހުންގެ ތެރޭގައި މަސްތުވާތަކެތީގެ ކުށްތަކަށް އަރައިގަނެފައިވާ ކުށްވެރިންނާއި، މީހުންނަށް އަބުރަށް އަރައިގަނެފައިވާ މީހުންގެ އިތުރުން ސަރުކާރާ ދެކޮޅު ޝުއޫރުތައް ފާޅުކުރުމުގެ ކުށް ސާބިތުވެ، ޖަލަށް ލާފައިވާ މީހުން ހިމެނެއެވެ.