ވިލާގަނޑުގައި ގަޑިއަކު 40 މޭލަށް ވައިގަދަވެ، ކަނޑުތައް ވެސް ގަދަވާނެ ކަމަށް ލަފާކޮށް މޫސުމާބެހޭ ގައުމީ އިދާރާ (މެޓް)އިން ޔެލޯ އެލާޓު ނެރެފިއެވެ.
އެލާޓު ނެރެފައިވަނީ ށ. އަތޮޅުން ފެށިގެން ވ. އަތޮޅަށް މިއަދު ހެނދުނު 10:45އިން މެންދުރުފަހު 14:30ގެ ނިޔަލަށެވެ.
މެޓުން ބުނީ ބައެއް އަތޮޅުތަކަށް ބޯކޮށް ވިއްސާރަކޮށް، ގުގުރުން އެކަށީގެންވާ ކަމަށެވެ. ހުޅަނގު އުތުރާއި އުތުރުން ގަޑިއަކު ފަސްމޭލާއި 15 މޭލާ ދެމެދުގެ ބާރުމިނުގައި ވައިޖެހޭނެ ކަމަށް މެޓުން ލަފާކުރެއެވެ.
ކަނޑުތައް އާދައިގެ ވަރަކަށް މަޑުވާނެ ކަމަށް ލަފާކުރާއިރު، ރާޅުގެ އުސްމިން ހުންނާނެ ކަމަށް އަންދާޒާކޮށްފައިވަނީ ދެ ފޫޓާއި ހަތަރު ފޫޓާ ދެމެދުގައެވެ.
މިހާރު ހިނގަމުން މި ދަނީ ހުވަން ނަކަތެވެ. މިއީ އިރުވައި މޫސުމުގެ ހަތަރުވަނަ ނަކަތެވެ. މިއީ އިރުމަތީ އަތޮޅުތަކަށް މަސްވެރިކަން ރަނގަޅުވާ ދުވަސްވަރެކެވެ. އިރުވައި މޫސުމުގައި އަދި ފަސް ނަކަތް ބާކީ އެބަ އޮތެވެ.
އިރުވައި މޫސުން ފެށިއްޖެ ކަމަށް ނިންމަނީ ވައިގެ މިސްރާބު އިރުމަތިން ހުރެފައި ގަޑިއަކު 10 ނޯޓިކަލް މޭލަށްވުރެ ބާރަށް ވައި ގަދަވެ، ދެ ދުވަހަށް ނުވަތަ އެއަށްވުރެ ގިނަ ދުވަހަށް ދެމިގެންދިއުމުންނެވެ.
އިރުވައި މޫސުން އާންމު ގޮތެއްގައި މާޗު މަހުގެ ނިޔަލަށް ދެމިގެންދެއެވެ. އަދި، ހުޅަނގު މޫސުން އާންމު ގޮތެއްގައި މޭ މަހު ފެށޭއިރު، ނޮވެމްބަރު މަހާ ހަމައަށް ދެމިގެންދެއެވެ.
ދެ މޫސުން ފައްތަރުވީ ދުވަސްވަރު ރާއްޖެއަށް ކުރި ބޯ ވިއްސާރައާ އެކު މި އަހަރުގެ އިރުވައި ފެށުނީ ލަހުން ކަމަށް މެޓުން ބުނެފައިވެއެވެ.