ކ. ގުރައިދޫގައި ނިޔާވި ހަތަރު މަހުގެ ތުއްތު ކުއްޖާގެ ހަށިގަނޑު އޮޓޮޕްސީ ހެދުމަށްޓަކައި މިއަދުގެ ފްލައިޓުން އިންޑިއާއަށް ފޮނުވައިފިއެވެ.
ތުއްތު ކުއްޖާ ނިޔާވެފައި ވަނީ މިދިޔަ ހުކުރު ދުވަހުގެ ރޭ ދަންވަރުގެ ވަގުތެއްގައެވެ.
ގުރައިދޫގައި ނިޔާވި ތުއްތު ކުއްޖާގެ ހަށިގަނޑު އޮޓޮޕްސީ ހެދުމަށްޓަކައި ފޮނުވަން ނިންމީ މަރުގައި ޝައްކުކުުރެވޭ ކަންތައްތަކެއް ހުރިކަމަށް ފެންނާތީ ކަމަށް ފުލުހުން ވަނީ ބުނެފައެވެ.
ގުރައިދޫ ކައުންސިލް މެމްބަރު އިބްރާހިމް ޝަލީޒް މީގެ ކުރިން "ސަން"އަށް ވިދާޅުވީ އެ ކުއްޖާ ޚަބަރު ހުސްވެފައި އޮތުމުން ސިއްހީ މަރުކަޒަށް ގެންދިޔައީ އެރޭ ދަންވަރު 12:30 ހާއިރު ކަމަށާއި، ސިއްހީ މަރުކަޒަށް ގެނައިއިރު ވެސް ކުއްޖާ އޮތީ ނިޔާވެފައި ކަމަށް ޑޮކްޓަރުން ބުނި ކަމަށެވެ.
އަދި ކުއްޖާގެ ނޭފަތުން ލޭ އައިސްފައި ހުރި ނަމަވެސް ބޭރުފުށުން އެއްވެސް އަނިޔާއެއް އެ ކުއްޖާއަށް ލިބިފައިވާ ތަން ފެންނަން ނެތްކަމަށް އޭނާ ފާހަގަކުރެއްވިއެވެ.
ޝަލީޒް އިތުރަށް ވިދާޅުވި ގޮތުގައި އެ ކުއްޖާގެ އާއިލާއާ މެދު ވެސް ޝައްކުކުރެވޭ ކަމެއް ނެތެވެ. އެއާއެކު އާއިލާ ވެސް މި ވަގުތު ތިބީ ކަންބޮޑުވުމެއްގައިކަން ފާހަގަކުރެއްވިއެވެ.
އޮޓޮޕްސީ ހެދުމަށް ތުއްތު ކުއްޖާގެ ހަށިގަނޑު ރާއްޖެއިން ބޭރަށް މި ފޮނުވުނީ ފަސް ދުވަސްފަހުންއެވެ.