މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި މާލޭ ސިޓީ ކައުންސިލްގެ ލިޔެކިޔުންތަކެއް ހިމެނޭ އޮފީހަށް ގެއްލުންވިއިރު، މާލޭގެ މަންޒަރުތަކެއް ގެއްލުމާ ގުޅިގެން ޑްރޯން ބޭނުންކޮށްގެން މާލޭ މެޕްކުރުމުގެ މަސައްކަތް ފަށައިފިއެވެ.
އަލިފާނުގެ ހާދިސާ ހިނގި ދެ އިމާރާތުގައި ސިޓީ ކައުންސިލްގެ އިދާރާއެއްގެ އިތުރުން ހައުސިން މިނިސްޓްރީއާއި އެންވަޔަރަމެންޓް މިނިސްޓްރީއާއި އިންފްރާންސްޓަކްޗަރު މިނިސްޓްރީގެ އިތުރުން އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ)އެވެ.
މިއަދު ހައުސިން މިނިސްޓްރީން ކުރި ޕޯސްޓެއްގައި ބުނީ، އެ ހާދިސާގައި މާލޭގެ މެޕުގެ މުހިންމު ބައެއް މަންޒަރުތައް ގެއްލުނު ކަމަށެވެ. އެހެންވެ، ޑްރޯން ބޭނުންކޮށްގެން މާލޭގެ މެޕިންގެ މަސައްކަތް ކުރަމުން އަންނަ ކަމަށް މިނިސްޓްރީން ބުނެފައިވެއެވެ.
ޑްރޯން ބޭނުންކޮށްގެން ނަގާފައިވާ މާލޭގެ މަންޒަރެއް: އަލިފާނުގެ ހާދިސާގައި މުހިންމު މަންޒަރުތަކެއް ގެއްލުމުން ޑްރޯންއިން މާލެ މެޕު ކުރަން ވަނީ ފަށާފައި ---- ފޮޓޯ/ ހައުސިން މިނިސްޓްރީ
އެ ހަތަރު އޮފީހުގެ މަސައްކަތް އިއްޔެ ވަނީ ދަރުބާރުގޭގައި ފަށާފައެވެ.
ރޯވި އިމާރާތުގައި ހުރި ކައުންސިލްގެ އޮފީހުން ރަށްވެހިންގެ އުފަންދުވަހުގެ ސެޓްފިކެޓާއި، ގޯތީގެ ރަޖިސްޓްރީފަދަ މުހިންމު ލިޔެކިޔުންތަކެއް ގެއްލިދާނެ ކަމުގެ ކަންބޮޑުވުން މީގެ ކުރިން ކައުންސިލުން ފާހަގަކޮށްފައިވެއެވެ.
އެ އިމާރާތުގައި ކައުންސިލުން ދެމުން އައި ޚިދުމަތްތައް ވަނީ ކައުންސިލްގެ ހުޅުމާލޭ ސެކްޝަނުން ދޭ ގޮތަށް އިންތިޒާމުކޮށްފައެވެ.
މާލޭ މޭޔަރު އާދަމް އާޒިމް މިއަދު ވަނީ، ކައުންސިލުގެ އެންމެ ބޮޑު އަމާޒަކީ ކުރިއަށް އޮތް ތަނުގައި އަލިފާނުގެ ހާދިސާއެއް ދިމާވި ނަމަވެސް ލިޔެކިޔުންތަކަށް ގެއްލުން ނުވާނެ ގޮތަކަށް ކަންތައްތައް ބައްޓަންކުރުން ކަމަށް ވިދާޅުވެފައެވެ.