އިންޑިއާގައި ލައިވް ޝޯތައް ބާއްވާ ސަރަހައްދުތައް ހަދައިފައިވާ ގޮތް ރަނގަޅު ނޫން ކަމަށް ބުނެ އެ ގައުމުގައި ޝޯތައް ނުބާއްވާނެ ކަމަށް މަޝްހޫރު ލަވަކިޔުންތެރިޔާ ދިލްޖީތު ދޮސާންޖު ބުނެފިއެވެ.
މިދިޔަ ހޮނިހިރު ދުވަހު އިންޑިއާގެ ޗަންދިގަރުގައި ބޭއްވި މިއުޒިކް ޝޯއެއްގައި ވާހަކަ ދައްކަމުން ދިލްޖީތު ބުނެފައި ވަނީ އިންޑިއާގެ އިންފްރާސްޓްރަކްޗަ މިހާރަށްވުރެ ތަރައްގީވާން ޖެހޭ ކަމަށާއި ލައިވް ޝޯތައް ބާއްވާ ސަރަހައްދުތަކުގެ ފެންވަރު މިހާރަށްވުރެ ރަނގަޅު ކުރަންޖެހޭ ކަމަށެވެ.
އިންޑިއާއަކީ މިއުޒިކީ ފަންނާނުން ގިނަ ގައުމަކަށް ވެފައި އެފަދަ ފަންނާނުންގެ ކުރިމަގަށް ވިސްނުމަށްފަހު ކަމާބެހޭ އިދާރާއިން ސްޓޭޖް ޝޯތައް ބާއްވާ ފެސިލިޓީތައް ރަނގަޅު ފެންވަރުގައި ގާއިމުކުރުމަށް ދިލްޖީތު ވަނީ ގޮވާލާފައެވެ.
މީގެ ފަހުން ދިލްޖީތުގެ ޝޯތައް ބާއްވާއިރު ލަވަކިޔުންތެރިޔާ ހުންނަ ސްޓޭޖް އޯޑިއަންސްގެ މެދުގައި ބެހެއްޓުމަށް ލަފާ ދޭނެ ކަމަށާއި އޭރުން އޯޑިއަންސްގެ މީހުން ތިބޭނީ ލަވަކިޔުންތެރިޔާ ހުންނަ ސްޓޭޖް ވަށައިގެން ކަމަށާއި ކޮންމެ ދިމާލަކުން ވެސް އޯޑިއަންސާ މުހާތަބް ކުރުމުގެ ފުރުސަތު ފަންނާނުންނަށް ލިބުމަށް މަގުފަހިވާނެ ކަމަށް ލަވަކިޔުންތެރިޔާ ވަނީ ބުނެފައެވެ.
ލަވަކިޔުންތެރިޔާ ދިލްޖީތު ދޮސާންޖް ދާދިފަހުން ބޭއްވި މިއުޒިކް ޝޯއެއްގައި ބޮލީވުޑްގެ ބަތަލާ ދީޕިކާ ޕަދުކޯން ބައިވެރިވަނީ--ފޮޓޯ/ޕިންކްވިލާ
މިފަދަ ޝޯތަކަށް ބޮޑު އަގު ދީގެން މީހުން ދާއިރު އެ މީހުންގެ ސަލާމަތާއި ރައްކާތެރިކަމަށް ވިސްނަންޖެހޭ ކަމަށާއި އިންޑިއާގައި އުފެދޭ މިއުޒިކީ ފަންނާނުންނަށް އިތުރު އާމްދަނީ ލިބޭނެ ގޮތް މަގުފަހިވާނީ ވެސް ފެންވަރު ރަނގަޅު ސްޓޭޖް ފެސިލިޓީތައް ގާއިމުކޮށްގެން ކަމަށް، ބައެއް ފިލްމުތަކުން ވެސް ފެނިފައިވާ ލަވަކިޔުންތެރިޔާ ވަނީ ބުނެފައެވެ.
ދިލްޖީތަކީ އިންޑިއާގެ އިތުރުން ބޭރު ގައުމުތަކުގައި ވެސް މިއުޒިކް ޓުއާތައް ބާއްވަމުން އަންނަ ލަވަކިޔުންތެރިއެކެވެ. އިންޑިއާގައި މިހާރު ފަށާފައިވާ މިއުޒިކް ޓުއާ ދިލްޖީތު ނިންމާލަން ހަމަޖެހިފައި ވަނީ މި މަހުގެ 29 ވަނަ ދުވަހު އިންޑިއާގެ ގުވަހަތީގައި ބާއްވާ ޝޯއަކުންނެވެ.