ފިލްމު އިންޑަސްޓްރީއިން ދުވަސްކޮޅަކަށް 'ބްރޭކެއް' ނެގިކަން ދާދިފަހުން އިއުލާނުކުރި އެކްޓަރު ވިކްރާންތު މަސޭގެ ފިލްމު "ދަ ސަބަރުމަތީ ރިޕޯޓު" ބެލުމަށްފަހު އިންޑިއާގެ ބޮޑުވަޒީރު ނަރެންދުރަ މޯދީގެ ލޮލުން ކަރުނަ އޮހޮރުނު މަންޒަރު ފެނުނު ކަމަށް އެކްޓަރު ބުނެފިއެވެ.
ޓައިމްސް ނެޓްވޯކް އިންޑިއާ އިކޮނޮމިކް ކޮންކްލާވްއަށް ދިން އިންޓަވިއުއެއްގައި ވިކްރާންތު ބުނެފައި ވަނީ ބޮޑުވަޒީރު ނަރެންދުރަ މޯދީއާ އެކު ފިލްމު ބަލާފައި ވަނީ އެ ކަމަށް ޓަކައި އިންޑިއާގެ ޤާނޫނޫ ހަދާ މަޖިލީހުގެ އޮޑިޓޯރިއަމްގައި ބޭއްވި ހާއްސަ ސްކްރީނިންއެއްގައި ކަމަށެވެ.
ފިލްމު ބަލަމުންދިޔަ ވަގުތު ބޮޑުވަޒީރު މޯދީ ވަރަށް ބޮޑަށް ޖަޒުބާތުގައި ޖެހިވަޑައިގެންނެވި ކަމަށާއި ފިލްމުގެ ބައެއް މަންޒަރުތަކުން ބޮޑުވަޒީރަށް ވަރަށް އަސަރުކުރުވި ކަމަށް އެކްޓަރު ވަނީ ބުނެފައެވެ.
ފިލްމު "ދަ ސަބަރުމަތީ ރިޕޯޓު"ގެ ސްކްރީނިންގައި އިންޑިއާގެ ބޮޑުވަޒީރު ނަރެންދުރަ މޯދީ އަދި ބައެއް މިނިސްޓްރަުންނާއި ޕާލަމެންޓްރީ މެމްބަރުން ބައިވެރިވެވަޑައިގަންނަވަނީ--ފޮޓޯ/އިންޑިއަންއެކްސްޕްރެސް
މީގެ 22 އަހަރުކުރިން އިންޑިއާގައި ހިނގާދިޔަ ހަގީގީ ހާދިސާއެއްގެ މައްޗަށް ބިނާކޮށް އުފެއްދި އެ ފިލްމުގައި ވިކްރާންތުގެ އިތުރުން ފިލްމުގެ ކާސްޓުން ދެއްކި ހުނަރަށް ބޮޑުވަޒީރު މޯދީ ވަރަށް ބޮޑަށް ތައުރީފުކުރެއްވި ކަމަށް ވެސް މި އިންޓަވިއުގައި ވިކްރާންތު ވަނީ ބުނެފައެވެ.
މޯދީ ދެކެވަޑައިގަންނަވާ ގޮތުގައި ވިކްރާންތަކީ ވަރަށް މޮޅު އެކްޓަރެއް ކަމަށާއި ފިލްމުގައި ވިކްރާންތު ކުޅުނު ރޯލް މޮޅުކަމުން އެކަމަށް ވަރަށް ބޮޑަށް ބޮޑުވަޒީރު ތައުރީފުކުރެއްވި ކަމަށް ފިލްމު "ޓުވެލްތު ފެއިލް"ގެ އެކްޓަރު ވަނީ ބުނެފައެވެ.
ފިލްމު "ދަ ސަބަރުމަތީ ރިޕޯޓު"ގެ ސްކްރީނިންގައި އެ ފިލްމުގެ މުހިއްމު ތަރިން ބައިވެރިވަނީ-ފޮޓޯ/އިންޑިއަންއެކްސްޕްރެސް
އެއީ މިހާތަނަށް ފިލްމު އިންޑަސްޓްރީގައި ލިބުނު އެންމެ ބޮޑު ޝަރަފު ކަމަށާއި އެއީ ކެރިއަރުގައި މިހާތަނަށް ކުރެވުނު އެންމެ ހާއްސަ ތަޖުރިބާ ކަމަށް ވިކްރާންތު ވަނީ ބުނެފައެވެ.
މޯދީގެ އަރިހުގައި ފިލްމު "ދަ ސަބަރުމަތީ ރިޕޯޓު"ގެ ސްކްރީނިންގައި މޯދީގެ ކެބިނެޓުގެ ބައެއް މިނިސްޓަރުންގެ އިތުރުން މަޖިލިސް މެމްބަރުން ވެސް ބައިވެރިވެވަޑައިގެންނެވިއެވެ.