އައްޑޫ ސިޓީން ފުރައިގެން މާލެއަށް ދަތުރުކުރި "ސީމެކްސް" ބޯޓުން ގެއްލުނު ފަޅުވެރިޔާ ހޯދަން 104 ނޯޓިކަލް މޭލުގެ ސަރަހައްދެއް ބަލައިފައި ވާކަމަށާއި އަދިވެސް އޭނާ ނުފެންނަ ކަމަށް އެމްއެންޑީއެފުން ބުނެފިއެވެ.
ރޭގެ ވަގުތެއްގައި މި ބޯޓުން ގެއްލުނު ފަޅުވެރިޔާއަކީ ނޭޕާލްގެ ރައްޔިތެއް ކަމަށްވާ ރާޖު ކުމާރެވެ.
އޭނާ ހޯދަން ކުރާ މަސައްކަތާ ގުޅިގެން އެމްއެންޑީއެފުން މީޑިއާއާ ހިއްސާކުރި މެސެޖެއްގައި ވަނީ، މިހާދިސާއާ ގުޅިގެން ގެއްލުނު މީހާ ހޯދުމަށް ފުވައްމުލަކުގެ އިރުއުތުރުން ކަނޑުގެ ސަރަހައްދުން 104 ނޯޓިކަލް މޭލުގެ ސަރަހައްދެއް، ސަދަން އޭރިއާ ސްކޮޑްރަން ގެ އުޅަނދުތަކުން ހިންގި ސާޗް އޮޕަރޭޝަން ގައި ބަލައިފައިވާކަމަށެވެ.
މި އޮޕަރޭޝަން ކުރިއަށްގެންގޮސްފައި ވަނީ ކަނޑުމަގުން ކަމަށާއި ގެއްލުނު ފަޅުވެރިޔާ އަދިވެސް ފެނިފައި ނުވާކަމަށް އެމްއެންޑީއެފުން ބުންޏެވެ.
މި ހާދިސާއާ ގުޅިގެން މީގެ ކުރިން ފުލުހުން ބުނީ، އޭނާ ގެއްލުނީ އައްޑޫ ސިޓީއިން ފުރައިގެން މާލެއަށް ދަތުރުކުރި "ސީމެކްސް" ނަމަކަސް ކިޔާ ބޯޓަކުން ކަމަށެވެ. އޭނާ ބޯޓުގައި ނެތްކަން އެނގިފައި ވަނީ ފުވައްމުލައް ސިޓީއާ އަށް މޭލަށް ކައިރިވެފައި ވަނިކޮށް ކަމަށް ފުލުހުން މައުލޫމާތުދިނެވެ.
ފުލުހުން ބުނީ އެ ބޯޓް ރޭ 11:30 ހާއިރު އައްޑޫ ސިޓީއިން ފުރިއިރު ރާޖް ކުމާރު ބޯޓްގައި ހުރި ކަމަށެވެ. އަދި ރޭ 01:15 ހާއިރު ބޯޓްގެ ކެޕްޓަނާ އޭނާ ވާހަކަ ދެއްކި ކަމަށް ވެސް ފުލުހުން ބުންޏެވެ.
ފަޅުވެރިޔާ ހޯދުމުގެ މަސައްކަތް އެމްއެންޑީއެފް އިން ކުރަމުންދާ އިރު، އެ މައްސަލަ ފުލުހުން ވެސް ދަނީ ތަހުގީގު ކުރަމުންނެވެ.
ފާހަގަކޮށްލެވޭ ގޮތުގައި މިދުވަސްވަރަކީ ރާއްޖޭގެ އެކި ހިސާބުތަކަށް މޫސުން ގޯސް ދުވަސްވަރެކެވެ. އެހެންކަމުން ކަމާބެހޭ ފަރާތްތަކުން ގެންދަނީ މޫސުމަށް ސަމާލުވުމަށް ވެސް އިލްތިމާސްކުރަމުންނެވެ.