ސޫރިއާ ދޫކޮށް ފިލައިގެން ދާން ދުވަހަކުވެސް ބޭނުންނުވި ކަމަށް އެ ގައުމުގެ ކުރީގެ ރައީސް ބައްޝާރުލް އަސަދު ވިދާޅުވެއްޖެއެވެ.
ބައްޝާރު އެގޮތަށް ވިދާޅުވީ މި މަހުގެ އަށްވަނަ ދުވަހު ސޫރިއާގެ އިދިކޮޅު ފަރާތްތަކުން ދިމިޝްޤު ހިފުމުން ފިއްލަވައިގެން ރަޝިއާއަށް ވަޑައިގަތުމަށްފު ނެރުއްވި ފުރަތަމަ ބަޔާނުގައެވެ.
އެ ބަޔާނުގައި އޭނާ ވިދާޅުވަނީ، ސޫރިއާގެ ވެރިރަށް ބާޣީންގެ އަތްދަށަށް ވެއްޓުމާއެކު، ލަތާކިއާ ޕްރޮވިންސްގައި ހުންނަ ރަޝިޔާގެ އަސްކަރީ މަރުކަޒަކަށް ހަނގުރާމަ ހިނގާގޮތް ބަލަން ދިޔަކަމަށާއި ނަމަވެސް ފެނުނީ ސޫރިއާ ސިފައިން އެ މީހުންގެ މަގާމުތައް ދޫކޮށް ގޮސްފައިވާތަން ކަމަށެވެ.
ރަޝިއާއިން ހިންގާ ސޫރިއާގެ ޙުމެއިމީމް އެއާބޭސްއަށް ވެސް ޑްރޯން ހަމަލާތައް އަންނަނަމުންދާތީ ރަޝިއާއިން ނިންމީ އޭނާ މޮސްކޯއަށް ގެންދިއުމަށް ކަމަށް އެ ބަޔާނުގައި ބައްޝާރު ވިދާޅުވެފައިވާ ކަމަށް ބީބީސީން ރިޕޯޓުކޮށްފައިވެއެވެ.
"މި ހާދިސާތަކުގެ އެއްވެސް ހިސާބަކުން އަޅުގަނޑު މަގާމުން ވަކިވާން ނުވަތަ ހިމާޔަތް ހޯދުމަށް ވިސްނާފައެއް ނުވޭ، އަދި އެފަދަ ހުށަހެޅުމެއް އެއްވެސް ފަރުދެއް ނުވަތަ ޕާޓީއަކުން ހުށަހަޅާފައެއް ނުވޭ،" އެ ބަޔާނުގައިވެއެވެ.
"ދައުލަތް ޓެރަރިޒަމްގެ އަތްދަށަށް ގޮސް، މާނަހުރި ކަމެއް ކޮށްދިނުމުގެ ގާބިލުކަން ގެއްލިއްޖެނަމަ، މަގާމެއްގެ ބޭނުމެއް ނޯންނާނެ،" ވެރިކަން ދޫކޮށް ވަޑައިގަތް ސަބަބުގެ ގޮތުގައި ބަޔާނުގައި ވިދާޅުވެފައިވެއެވެ.
އިސްލާމިސްޓް ހަނގުރާމަވެރި ޖަމާއަތެއް ކަމަށްވާ ހަޔާތު ތަހުރީރު އަލް ޝާމް (އެޗްޓީއެސް) އިސްވެ އޮވެ ހަނގުރާމަވެރިންގެ އަތްދަށަށް ސޫރިއާގެ ސިޓީތަކާއި ޕްރޮވިންސްތައް 12 ދުވަހުގެ ތެރޭގައި ދިޔައިރު، ސޫރިއާގެ އެއްވެސް ތަނަކުން ބައްޝާރު ފެނިފައި ނުވާ ކަމަށް މީޑިއާތަކުން ރިޕޯޓުކޮށްފައިވެއެވެ.
ހަނގުރާމަވެރިން ދިމިޝްޤަށް ވަދެގަތް ވަގުތު ސޫރިއާގެ ބޮޑުވަޒީރަށް ވެސް އޭނާއާ ގުޅެވޭ ގޮތް ނުވުމުން އޭނާ ފިލައިގެން ދިޔަ ކަމަށް ޝައްކު ކުރެވުނެވެ.
އޭގެފަހުން ޑިސެމްބަރު މަހުގެ 9 ވަނަ ދުވަހު ރަޝިޔާގެ މީޑިއާތަކުން ވަނީ ބައްޝާރަށް އެތަނުން ހިމާޔަތް ދީފައިވާ ކަމަށް ރިޕޯޓުކޮށްފައެވެ.
ސޫރިއާގެ ކޮންޓްރޯލް ލިބުނީ ޓެރަރިސްޓުންނަށް ކަމަށް ބައްޝާރު ވިދާޅުވި ނަމަވެސް ޖަމާއަތް ވުޖޫދު ވުމުގެ މާ ކުރިންވެސް، ސަރުކާރާ ދެކޮޅަށް މުޒާހަރާކުރި މީހުން ވެސް ބައްޝާރު ސިފަކުރަމުން އައީ ޓެރަރިސްޓުންގެ ގޮތުގައެވެ. އަދި މިހާ ހިސާބަށް ވެސް ވެރިކަމުގައި ހުންނެވީ އީރާނާއި ރަޝިޔާގެ މަދަދާ އެކުގައެވެ.
ހަނގުރާމަވެރިން މިހާރު ދަނީ އިންތިގާލީ ސަރުކާރެއް އެކުލަވާލުމުގެ މަސައްކަތް ކުރަމުންނެވެ.
ސޫރިއާގެ އެންމެ ބާރުގަދަ ހަނގުރާމަވެރި ޖަމާއަތް ކަމަށްވާ އެޗްޓީއެސް އަކީ 2011 ވަނަ އަހަރު ޖަބަތު އަލް ނޫސްރާގެ ދަށުން އުފެއްދި ޖަމާއަތެކެވެ. ނަމަވެސް ޖެހިގެންއައި އަހަރު އަލް ޤައިދާއާ ބައިޢަތު ހިފާފައިވާކަމަށް ރިޕޯޓުތައް ބުނެއެވެ.
އަލް ނޫސްރާ ވަނީ 2016 ވަނަ އަހަރު އަލްގައިދާއާ ގުޅުން ކެނޑި، ފަހުން އެހެން ފެކްޝަންތަކާ ގުޅިގެން އެޗްޓީއެސްގެ ނަން ވެސް ނަގާފައެވެ. ނަމަވެސް އދ، އެމެރިކާ، އިނގިރޭސިވިލާތް އަދި އެހެން ގިނަ ގައުމުތަކުން ވެސް ވަނީ އެ ޖަމާއަތަކީ ޓެރަރިސްޓް ޖަމާއަތެއްގެ ގޮތުގައި ކަނޑައަޅާފައެވެ.