ސީރިއާގެ ދިގުލައިދިޔަ ހަނގުރާމައަށްފަހު، އެ ގައުމު އާރާސްތުކުރުމުގެ މަސައްކަތް ފަށާފައިވާއިރު، އެންމެ ބޮޑު އެއް ގޮންޖެހުމަކަށް ވެފައިވަނީ ބޯހިޔާވަހިކަމެވެ. މި މައްސަލައަށް ހައްލެއް ހޯދުމުގެ ގޮތުން، ޔޫއޭއީގެ ބޮޑެތި ކުންފުނިތަކުން މިހާރު ދަނީ ސީރިއާގެ ރިއަލް އެސްޓޭޓް ދާއިރާއަށް ބިލިއަން ޑޮލަރުގެ އިންވެސްޓްމަންޓްތައް ކުރަމުންނެވެ.
އަބޫދާބީގެ ކުންފުންޏެއް ކަމަށްވާ އީގަލް ހިލްސްއިން ވަނީ ސީރިއާ ސަރުކާރާއެކު ބޮޑު ދެ މަޝްރޫއެއް ހިންގުމަށް އެއްބަސްވުމެއްގައި ސޮއިކޮށްފައެވެ. ސީރިއާގެ ރައީސް އަހުމަދު އައްޝަރާގެ ހާޒިރުގައި ޑަމަސްކަސްގައި ސޮއިކުރި މި އެއްބަސްވުމުގެ ދަށުން، ޑަމަސްކަސްގައި "ތަދާމުން ޓަވަރސް" އަދި ލަޓާކިއާގައި "އިކޯ ލައިފް" ގެ ނަމުގައި ފަތުރުވެރިކަމުގެ މަޝްރޫއެއް ހިންގުމަށް ވަނީ ހަމަޖެހިފައެވެ.
މި ދެ މަޝްރޫއަށް ހިނގާނެ ޖުމްލަ ހަރަދު ހާމަކޮށްފައި ނުވި ނަމަވެސް، ސީރިއާގެ އަރަބް ނިއުސް އޭޖެންސީން ރިޕޯޓުކޮށްފައިވާ ގޮތުގައި މި މަޝްރޫއުތަކުގެ ސަބަބުން 40،000 އަށް ވުރެ ގިނަ ވަޒީފާ އުފެދިގެންދާނެއެވެ. އީގަލް ހިލްސްގެ ބާނީ މުހައްމަދު އަލަބާރު ބުނުއްވި ގޮތުގައި، މި މަޝްރޫއުތަކުގެ އަމާޒަކީ ރައްޔިތުންނަށް އެކަށީގެންވާ ބޯހިޔާވަހިކަމާއި، ރަނގަޅު ހިދުމަތްތަކުގެ އިތުރުން ވަޒީފާގެ ފުރުސަތުތައް ފަހިކޮށްދިނުމެވެ. މީގެ ކުރިން އޭނާ ބުނުއްވާފައިވާ ގޮތުގައި، ސީރިއާގައި 18 ބިލިއަން ޑޮލަރާ ހަމައަށް އިންވެސްޓްކުރުމަށް އޭނާ ގެންދަވަނީ ވިސްނަވަމުންނެވެ.
ސީރިއާގައި ބޯހިޔާވަހިކަމުގެ ޑިމާންޑް ބޮޑުވެފައިވަނީ މައިގަނޑު ދެ ސަބަބަކާ ހުރެއެވެ. ފުރަތަމަ ސަބަބަކީ، ބައްޝާރުލް އައްސަދުގެ ވެރިކަން މީގެ ދެ އަހަރެއްހާ ދުވަސް ކުރިން ވެއްޓުމާ ގުޅިގެން، ގިނަ އަދަދެއްގެ ރައްޔިތުން އެނބުރި ގައުމަށް އަންނަން ފެށުމެވެ. އދ.ގެ ރެފިއުޖީންނާ ބެހޭ އިދާރާ (ޔޫއެންއެޗްސީއާރް) އިން ލަފާކުރާ ގޮތުގައި، 2024 ވަނަ އަހަރުގެ ޑިސެންބަރު މަހުން ފެށިގެން 2026 ވަނަ އަހަރުގެ އޭޕްރީލް މަހާ ދެމެދު 1.7 މިލިއަން މީހުން ވަނީ އެނބުރި ސީރިއާއަށް ގޮސްފައެވެ.
ދެވަނަ ސަބަބަކީ، ގައުމުގެ އިގުތިސާދު ކޮޅަށްޖެހުމަށް ސަރުކާރުން ކުރަމުންދާ މަސައްކަތްތަކެވެ. ސީރިއާއިން އަމާޒުހިފާފައިވަނީ 2035 ވަނަ އަހަރު އަންނަންވާއިރަށް 2 މިލިއަން ގެ ބިނާކުރުމަށް ނުވަތަ މަރާމާތުކުރުމަށެވެ. މިކަން ކުރުމަށްޓަކައި ސަރުކާރުގެ އިންވެސްޓްމަންޓްތަކާއި، ބޭރުގެ އިންވެސްޓްމަންޓްތަކުގެ އިތުރުން އަމިއްލަ ފަރާތްތަކުގެ އެހީތެރިކަން ހޯދުމަށް ވަނީ ރާވާފައެވެ.
އީގަލް ހިލްސްގެ އިތުރުން، ޔޫއޭއީގެ އެހެން ކުންފުންޏެއް ކަމަށްވާ އަރާދާއިން ވެސް ދަނީ ޑަމަސްކަސްގައި 7 ބިލިއަން ޑޮލަރުގެ ބޮޑު މަޝްރޫއެއް ހިންގުމަށް ތައްޔާރުވަމުންނެވެ. ކުރިއަށް އޮތް 10 އަހަރު ދުވަހުގެ ތެރޭގައި ފުރިހަމަކުރާ ގޮތަށް ރާވާފައިވާ މި މަޝްރޫއުގައި 11،000 ގެދޮރާއި، 500 ހޮޓެލް ކޮޓަރީގެ އިތުރުން ސްކޫލްތަކާއި ހޮސްޕިޓަލެއް އެޅުމަށް ވަނީ ހަމަޖެހިފައެވެ.
އަރާދާގެ ގްރޫޕް ޗީފް އެގްޒެކެޓިވް އަހުމަދު އަލްހޮޝައިބީ މައުލޫމާތު ދެއްވި ގޮތުގައި، ސީރިއާގައި ދިރިއުޅޭ މީހުންނާއި ބޭރުގައި ދިރިއުޅޭ ސީރިއާގެ ރައްޔިތުންގެ ފަރާތުން ފެންވަރު ރަނގަޅު ބޯހިޔާވަހިކަމަށް އޮތް ޑިމާންޑް ވަރަށް ބޮޑެވެ. އޭނާ ފާހަގަކުރެއްވި ގޮތުގައި، ގައުމުގެ އެތެރެއިންނާއި ބޭރުގައި ދިރިއުޅޭ ސީރިއާގެ ރައްޔިތުންގެ ފަރާތުން އަންނަ މި ޑިމާންޑް ކުރިއަށް އޮތް ތާނގައި ވެސް ދާނީ އިތުރުވަމުންނެވެ. މިއާއެކު، ބޭރުގެ އިންވެސްޓްމަންޓްތައް މެދުވެރިކޮށް ސީރިއާގެ ބޯހިޔާވަހިކަމުގެ މައްސަލައަށް ހައްލެއް ހޯދުމުގެ މަސައްކަތް ވަނީ ބާރަށް ކުރިއަށް ގެންދަން ފަށާފައެވެ.