ބަންގްލަދޭޝްގެ އާންމު އިންތިޚާބު އަންނަ އަހަރު ފަހުކޮޅު ނުވަނަ 2026 ވަނަ އަހަރު ކުރީކޮޅު ބާއްވަން މަސައްކަތްކުރާ ކަމަށް އެ ގައުމުގެ އިންތިގާލީ ރައީސް މުޙައްމަދު ޔޫނުސް ވިދާޅުވެއްޖެއެވެ.
ބަންގްލަދޭޝްގެ ދަރިވަރުން ނުކުމެ ކުރި މުޒާހަރާކޮށް މިއަހަރުގެ އޮގަސްޓް މަހު ކުރީގެ ބޮޑު ވަޒީރު ޝައިޚް ޙަސީނާގެ ވެރިކަން ވައްޓާލުމަށްފަހު، އެ ގައުމުގެ ވަގުތީ ލީޑަރަކަށް އައްޔަންކުރެއްވި ޔޫނުސްއަށް އަންނަނީ އިންތިޚާބު ބާއްވާނެ ތާރީޚެއް ކަނޑައެޅުމަށް ޕްރެޝާ ބޮޑުވަމުންނެވެ.
އުމުރުން 84 އަހަރުގެ ޔޫނުސް ގެންދަވަނީ ގާތްގަނޑަކަށް 170 މިލިއަން މީހުންގެ އާބާދީއެއް އޮންނަ ބަންގްލަދޭޝްގެ ނިޒާމު އަލުން ގާއިމު ކުރުމުގެ ޒިންމާ ގޮންޖެހުންތަކާއެކު ވެސް އަދާކުރައްވަން މަސައްކަތްކުރަވަމުންނެވެ.
"2025ވަނަ އަހަރު ނިމުމުގެ ކުރިން ނުވަތަ 2026 ވަނަ އަހަރުގެ ފުރަތަމަ ކުއާޓަރުގެ ތެރޭގައި އިންތިޚާބުގެ ތާރީޚުތައް ކަނޑައެޅިދާނެ،" ދައުލަތުގެ ޓީވީއަށް ދެއްވި ބަޔާނެއްގައި ޔޫނުސް ވިދާޅުވިއެވެ.
އިންތިޚާބު ބާއްވާނެ ތާރީޚެއް ކަނޑައެޅޭނީ ސިޔާސީ ޕާޓީތަކުން އެއްބަސްވާ ކަންކަމަށް ބަލައިގެން ކަމަށް ވެސް ޔޫނުސް ވިދާޅުވިއެވެ. އަދި ޔޫނުސް ވަނީ ބައެއް އިސްލާހުތައް ސުޕަވައިޒްކުރުމަށް ކޮމިޝަންތައް އުފައްދަވާފައެވެ.
ބަންގްލަދޭޝްގައި އެންމެ ފަހުން އިންތިޚާބެއް ބާއްވާފައި ވަނީ މިދިޔަ އަހަރުގެ ޖެނުއަރީ މަހެވެ.
ބަންގްލަދޭޝްގެ ބޮޑުވަޒީރުގެ ގަނޑުވަރަށްވަދެ އެތައް ހާސް ބަޔަކު މުޒާހަރާ ކުރަމުން ދަނިކޮށް، އުމުރުން 77 އަހަރުގެ ޙަސީނާ ވަނީ ފިއްލަވައިގެން އަވަށްޓެރި އިންޑިއާއަށް ވަޑައިގެންފައެވެ.
ޙަސީނާގެ ސަރުކާރަށް ކޯޓުތަކާއި ސިވިލް ސާވިސް ސިޔާސީ ކުރުމުގެ އިތުރުން، ޑިމޮކްރެޓިކް ބާރުތައް ނިގުޅައިގަތުމުގެ ގޮތުން ވަކި މީހަކަށް ކާމިޔާބުވާ ގޮތަށް އިންތިޚާބު ބޭއްވުމުގެ ތުހުމަތު ވެސް ކޮށްފައިވެއެވެ.
ކުރީގެ އިސް އޮފިޝަލުންގެ އިތުރުން މީހުން މެރުމާއި އިންސާނިއްޔަތާ ޚިލާފު އެކި އަމަލުތައް ހިންގުމުގެ ދައުވާގައި ހަސީނާ ކޯޓަށް ހާޒިރުކުރުމުގެ މަސައްކަތްވެސް ބަންގްލަދޭޝް ސަރުކާރުން އަންނަނީ ކުރަމުންނެވެ.