ށ. އަތޮޅުގެ ގިނަ ރަށްތަކަށް ދަތުރުކުރާ އެމްޓީސީސީގެ ފެރީއެއްގައި މަސައްކަތް ކުރާ ފަޅުވެރިއަކު ކަނޑަށް ވެއްޓި، އޭނާ ދޫކޮށްލައިފައި ދިޔަ މައްސަލައެއް ފެންމަތިވެއްޖެއެވެ.
އެ ހާދިސާ ހިނގި ގޮތް އެ ފަޅުވެރިޔާގެ އާއިލާގެ މެންބަރަކު 'ސަން'އަށް ވަނީ ވަރަށް ތަފްސީލުކޮށް ކިޔައިދީފައެވެ. މި ހާދިސާ ހިނގާފައި ވަނީ އިއްޔެ ހެނދުނު 10:30 އާއި 11:00 ދޭތެރޭގައި ކަމަށް އޭނާ މައުލޫމާތު ދިނެވެ.
ށ. ބިލެތްފައްސަށް އުފަން އެ ފަޅުވެރިޔާއާ ހަވާލާދީ އާއިލާ މެންބަރު ބުނީ، ފެރީން ވެއްޓުނީ ފާޚާނާކުރުމަށް ފަހު، ސާފުވާން ކަނޑުން ފެން ބާލިދީއެއް ނަގަން އުޅެނިކޮށް ކަމަށެވެ. އެ ފެރީގައި ފާޚާނާގައި ފެން ބޭނުންކުރެވޭ ގޮތް ނުހުންނަ ކަމަށް އޭނާ ބުނެއެވެ.
އެ މީހާ ވެއްޓުނީ ށ. މިލަންދޫ އަށް ވަނުމަށް ފަހު އެރަށުން ނުކުމެ، ކަނޑާ ފަޅާ ގުޅޭ ހިސާބުން ކަމަށް އާއިލާ މެންބަރު ކިޔައިދިނެވެ. ވެއްޓުމުން ފަޅުވެރިޔާ ފަތާފައި އައިސް އެރީ މިލަންދޫ ތޮށީ މައްޗަށެވެ. އޭރު ފަތާފައި އައިސް، މިލަންދޫ ތޮށި މައްޗަށް އެރިއިރު، ވަރަށް ގިނައިން ލޮނު ބޮވުނު ކަމަށް ފަޅުވެރިޔާ ބުނި ކަމަށް އެ މެންބަރު ބުންޏެވެ.
އެހެން އިންދާ، ކަނޑަށް ވެއްޓުނު ފަޅުވެރިޔާ ފެނުނީ މިލަންދޫ ބަނދަރު މަތީގައި ދެ ފަންގިފިލާއަށް ހަދާފައި ހުރި ކެފޭއެއްގެ މަތީގައި ޑެގުގައި މަތީގައި ތިބި ބަޔަކަށެވެ. އެމީހުން ޑިންގީއެއްގައި ގޮސް ފަޅުވެރިޔާ ގޮވައިގެން ފެރީ ކައިރިއަށް ދިޔަ ކަމަށް އޭނާ ކިޔައިދިނެވެ. ފަޅުވެރިޔާ ބަލާދިޔައިރު، އިނީ ވަރަށް ބިރުން ކަމަށް ވެސް އާއިލާއިން ބުންޏެވެ.
"އޭރު [ފެރީ] ނަރުދޫއަށް ދަނީ. ފެރީގައި ތިބި މީހުންނެއް އޭނާއަކަށް އެހާ ސަމާލުކަމެއް ނުދިން، ތިން ފަހަރު ދުއްވި ފެރީ ކައިރިން، އެކަމު [ފެރީގައި ތިބި] އެމީހުން އަޅާނުލި ކަމަށް ބުނަނީ. ޑީންގީގަ ތިބި ތިން ފިރިހެނުން،" އާއިލާއިން ވާހަކަދެއްކި މެންބަރު ބުންޏެވެ.
އިތުރަށް އޭނާ ކިޔައިދިން ގޮތުގައި، ފެރީއަށް ނުނެގުމުން ފަޅުވެރިޔާ އަނބުރާ މިލަންދޫއަށް ގެންދިޔައެވެ. އަދި އެ ރަށަށް ގެންގޮސް އެ ރަށުގައި އުޅޭ އޭނާގެ ރައްޓެއްސެއްގެ ގޭގައި ބޭއްވިއެވެ. އޭގެފަހުން ހަވީރު 6:00 ޖެހުމުން އަނބުރާ ބިލެތްފައްސަށް ގެނައީ ކަނޑަށް ވެއްޓުނު ފެރީގައި ކަމަށް އޭނަ ބުންޏެވެ.
ރަށަށް އައުމުން ބިލެތްފަހީ ސިއްހީ މަރުކަޒަށް ގެންގޮސް ފަރުވާ ދިން ކަމަށާއި މިހާރު ގެއަށް ދޫކޮށްލާފައިވާ ކަމަށް އޭނާ މައުލޫމާތުދިނެވެ.
ފަޅުވެރިޔާ ބިލެތްފައްސަށް ގެންދިޔުމުން އެ މައްސަލަ ކައުންސިލުން ފުލުހަށް ވަނީ ރިޕޯޓުކޮށްފައެވެ. އަދި، އެކަމުގައި ފަޅުވެރިޔާގެ ބަޔާން ފުލުހުން ނެގި ކަމަށް އޭނާ ބުންޏެވެ.
"އަޅުގަނޑުމެން ސީދާ ހަމަ އެމްޓީސީސީއަށް ވެސް އިންނާނެ ގުޅާފައި. ފެރީ ގުރޫޕުގައި އިންނަ އިންޗާޖަށް ވެސް އަޅުގަނޑުމެން ގުޅިގެން، ގުޅާފައި އާއިލާ މީހެއްގެ ފަރާތުން ހުރި ކަންބޮޑުވުންތައް އިންނާނެ އެ މީހުންނާ ހިއްސާކޮށްފައި،" އޭނާ ކިޔައިދިނެވެ.
މި ހާދިސާގައި ކޭޝިއަރަށް ވަނީ އެކި ވަރުގެ އަނިޔާތައް ލިބިފައެވެ.
އެގޮތުން، ހިލަތައް މައްޗަށް އަރަން އުޅުމުގެ ތެރޭގައި އެއް ފައިގެ ކަށިމަތި ވަރަށް ބޮޑަށް ދުޅަވެފައި ހުރި ކަމަށާއި ފެރީން ވެއްޓުނު އިރު ތަނެއްގައި ޖެހިގެން ލޯ ކައިރި ނިތްކުރި މަތިން ނޫފައިގެންފައި ހުރި ކަމަށް އާއިލާ މެންބަރު ބުންޏެވެ. އަދި، ފެން ނަގަން ބޭނުން ކުރި ވާގަނޑު އޮޅިފައި އޮތް އަތުގެ ޝަހާދަތް އިނގިއްޔާއި އަތާ ގުޅޭ ހުޅަށް ތަދުވެފައި ހުރި ކަމަށް ބުނެފައިވެއެވެ.
"ކޮންމެ ކޮންމެ ފަހަރަކު މިހެން ސަލާމަތްނުވެ ދާނެޔޭ، އާއިލާއެއް ލޯބިވާ މީހެއްގެ ފުރާނާ ދިޔުން އެކަށީގެންވޭ މިފަދަ ހާދިސާއެއްގައި،" އާއިލާއިން ބުންޏެވެ.
އޭގެއިތުރުން، މި މައްސަލައަކީ އިހުމާލަކުން ހިނގި ކަމެއްގެ ގޮތުގައި އޭނާ ސިފަކޮށްފައިވެއެވެ. މިހާތަނަށް މި މައްސަލާގައި ފުލުހުންނާއި އެމްޓީސީސީގެ ބަހެއް ލިބިފައެއް ނުވެއެވެ.