މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އަދި ނެޝެނަލް ބޯޓިން އެސޯސިއޭޝަން އޮފް މޯލްޑިވްސް (އެންބީއޭއެމް)އިން ގުޅިގެން، ޑައިވިން އެންޑް ރިސޯޓް ޓްރެވަލްސް އެކްޕޯ (ޑީއާރުޓީ) ޝޯގައި ރާއްޖޭގެ ކަނޑުއަޑީގެ ރީތިކަން ޕްރޮމޯޓް ކޮށްފިއެވެ.
ޑީއާރުޓީ ޝޯ އަކީ ޑައިވިން އާއި މެރިން ފަތުރުވެރިކަމުގެ ޕްރޮފެޝަނަލުން ގުޅުވައިދޭ ޕްރިމިއާ އިންޓަނޭޝަނަލް އިވެންޓެއް ކަމަށް އެމްއެމްޕީއާރުސީން ވަނީ ބުނެފައެވެ.
ހޮންކޮންގައި މިދިޔަ ހުކުރު ދުވަހުން ފެށިގެން އިއްޔެގެ ނިޔަަލަށް ކުރިއަށް ގެންދިޔަ މި ހަރަކާތުގައި ވިޒިޓްމޯލްޑިވްސް އަދި އެންބީއޭއެމްއާއެކު ރާއްޖޭގެ ފަތުރުވެރިކަމުގެ ސިނާއަތުގެ ހަ ކުންފުންޏަކުން ބައިވެރިވެފައި ވާކަމަށް އެމްއެމްޕީއާރުސީއިން ވަނީ ބުނެފައެވެެ.
އެމްއެމްޕީއާރުސީން ބުނީ މި އިވެންޓަކީ ދުނިޔޭގެ ފެންވަރުގެ ޑައިވިން އަދި މެރިން ޓޫރިޒަމް ހަބެއްގެ ގޮތުގައި ރާއްޖެ ފަދަ މަޝްހޫރު މަންޒިލްތައް ޕްރޮމޯޓްކުރުމަށާއި އެންމެ ފަހުގެ އުފެއްދުންތައް ދައްކާލުމަށް މުހިންމު ޕްލެޓްފޯމެއް ކަމަށެވެ. މި ހަރަކާތުގައި ރާއްޖޭގެ ޑައިވިން ސިނާއަތާ ބެހޭ އެންމެ ފަހުގެ މައުލޫމާތު ބީޓޫބީ ޓްރެވަލް ޓްރޭޑް ޕްރޮފެޝަނަލުންނަށް ފޯރުކޮށްދިނުމުގެ އެތައް ފުރުސަތެކެއް ލިބިގެންދިޔަ ކަމަށް އެމްއެމްޕީއާރުސީން ވަނީ ބުނެފައެވެ.
ވިޒިޓް މޯލްޑިވްސްގެ އަމާޒަކީ ރިސޯޓްތަކާއި ގެސްޓްހައުސްތަކާއި ލިވަބޯޑްތަކާއި ހޮޓާތަކާ އެކު ޑައިވިންގެ ހާއްސަ ޚިދުމަތްތަކުގެ އިތުރުން ރާއްޖޭގެ
ކަނޑުއަޑީގެ ތަފާތު ތަޖުރިބާތައް ޑީއާރުޓީ ޝޯގައި ދައްކާލުމެވެ. އަދި އިންޑަސްޓްރީ ޕާޓްނަރުންނާއެކު ވިޒިޓް މޯލްޑިވްސްގެ އެންމެ ފަހުގެ ޕްލޭންތައް ހާމަކޮށް ބައިނަލްއަގްވާމީ ފަތުރުވެރިކަމުގެ ދާއިރާގައި ހަރަކާތްތެރިވާ އެކިއެކި ފަރާތްތަކާއެކު ގުޅުން ބަދަހި ކުރުން ކަމަށް އެމްއެމްޕީއާރުސީން ވަނީ ބުނެފައެވެ.
މީގެއިތުރުން މި ހަރަކާތުގައި ވަކިވަކި ޕްރޮޕަޓީތަކުގެ އެންމެ ފަހުގެ މައުލޫމާތު ހޮންކޮންގުގެ ދަތުރުފަތުރުގެ ވިޔަފާރިތަކާ ހިއްސާކުރުމަށް މުހިންމު ޕްލެޓްފޯމެއް ލިބިގެންދިޔަ ކަމަށާއި ރާއްޖޭގެ ފަތުރުވެރިކަމުގެ ސިނާއަތަށް ހޮންކޮންގަކީ ވަރަށް މުހިންމު މާކެޓެއްކަން އެ ކޯޕަރޭޝަނުން ވަނީ ފާހަގަކޮށްފައެވެ.