ފިއުލް ސަޕްލައި މޯލްޑިވްސް (އެފްއެސްއެމް)ގެ މެނޭޖިން ޑިރެކްޓަރުގެ މަގާމަށް ފާތިމަތު އާޝާން މިއަދު އައްޔަންކޮށްފިއެވެ.
އެފްއެސްއެމްއަކީ އެސްޓީއޯގެ ސަބްސިޑަރީ ކުންފުންޏެކެވެ. އެއީ ރާއްޖޭގައި ތެޔޮވިކުއްމުގެ ވިޔަފާރި އެންމެ ފުޅާ ދާއިރާއެއްގައި ކުރާ އެއް ކުންފުންޏެކެވެ. މިއީ އެސްޓީއޯ ގްރޫޕުގައި ހިމެނޭ ކުންފުންޏެއްގެ އެމްޑީގެ މަގާމަށް އަންހެން ބޭފުޅަކު އައްޔަނުކުރި ފުރަތަމަ ފަހަރެވެ.
އެސްޓީއޯއިން އެކްސްގައި ކުރި ޕޯސްޓެއްގައިވަނީ މިއަދުން ފެށިގެން އެފްއެސްއެމްގެ މެނޭޖިން ޑިރެކްޓަރުގެ މަގާމަށް އާޝާން އައްޔަނު ކުރެވުމަކީ ލިބުނު އުފަލެއް ކަމަށެވެ.
ފާތިމަތު އާޝާންވަނީ އެފްއެސްއެމްގެ އެމްޑީ ކަމަށް އައްޔަނުކޮށްފައި -- ފޮޓޯ/ އެސްޓީއޯ
އާޝާން އަކީ އެސްޓީއޯ ގްރޫޕުގައި ހިމެނޭ ކުންފުންޏަކަށް އައްޔަނު ކުރި ފުރަތަމަ އަންހެން އެމްޑީކަން ފާހަގަކޮށް، އެސްޓީއޯއިން ބުނީ މިއީ އެ ކުންފުނީގެ ޚާއްސަ ލީޑަޝިޕް ދައްކުވައިދޭ ކަމެއް ކަމަށެވެ.
އާޝާން މީގެ ކުރިން އަދާ ކުރެއްވި މަގާމުތަކުގެ ތެރޭގައި އެސްޓީއޯގެ ސީނިއާ ޖެނެރަލް މެނޭޖަރުކަމާއި، މިފްކޯގެ ޑެޕިއުޓީ ސީއީއޯގެ މަގާމު ހިމެނެއެވެ.
އެފްއެސްއެމްގެ އެމްޑީގެ މަގާމަށް އާޝާން އައްޔަންކޮށްފައި ވަނީ އެ މަގާމުގައި ހުންނެވި އިސްމާއީލް ސުހައިލް، މިދިޔަ ނޮވެންބަރު 26ގައި އިސްތިއުފާ ދެއްވުމާ ގުޅިގެންނެވެ.