މި ހަފުތާތޭރޭގައި، ވައިޓަލް ރަޖިސްޓްރޭޝަންގެ ޚިދުމަތް، މާލެއިން ދޭން ފެށުމުގެ މަސައްކަތް ކުރަމުން އަންނަ ކަމަށް, މާލޭ ސިޓީ ކައުންސިލުން މިއަދު ބުނެފިއެވެ.
ސިޓީ ކައުންސިލުން ކުރިން އެ ޚިދުމަތް ދެމުން އައީ މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި އަނދައިހުލިވި ހައުސިން މިނިސްޓްރީގެ އިމާރާތުގައެވެ.
އެ އިމާރާތުގައި ރޯވުމުން ބައެއް ލިޔެކިޔުންތައް ގެއްލި, އަނެއްބައި ލިޔެ ކިޔުމަށް ބޮޑެތި ގެއްލުންތަކެއް ވަނީ ލިބިފައެވެ.
އެހެން ކަމުން މި ވަގުތު، ވައިޓަލް ރަޖިސްޓްރޭޝަންގެ ޚިދުމަތް ދެމުން އަންނަނީ, ހުޅުމާލޭ އަމީން އެވެނިއުގެ ފުރަތަމަ ފަންގިފިލާގައި ހުންނަ މާލެސިޓީގެ އޮފީހުންނެވެ.
ސިޓީ ކައުންސިލްގެ މީޑިއާ އޮފިޝަލް މިއަދު ވިދާޅުވީ ރަޖިސްޓްރޭޝަންގެ މަސައްކަތްތައް އަލުން މާލޭގައި މި ހަފުތާގެ ތެރޭގައި ފެށުމުގެ މަސައްކަތް ކުރަމުން އަންނަ ކަމަށެވެ.
މި އަލިފާނުގެ ހާދިސާގައި ދެ އިމާރާތަކަށް އަސަރުކޮށްފައިވާއިރު އެ ތަންތަނުގައި ހިންގަމުން އައި އޮފީސްތައް މިއަދު ވަނީ ދަރުބާރުގޭގައި ހިންގަން ފަށައިފައެވެ.
ދަރުބާރުގޭގައި ޚިދުމަތް ދޭން ފެށީ، އަލިފާނުގެ ހާދިސާ ހިނގި ދެ އިމާރާތުގައި ހިންގި ހައުސިން މިނިސްޓްރީއާއި އިންފްރާންސްޓްރަކްޗާ މިނިސްޓްރީއާއި އެންވަޔަރަމަންޓް މިނިސްޓްރީގެ އިތުރުން އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ)އެވެ.
މި އަލިފާނުގެ ހާދިސާ ހިނގަން މެދުވެރިވި ސަބަބު ތަހުގީގު ކުރުމަށް ބޭރުގެ ތަޖުރިބާކާރުންގެ އެހީ ހޯދުމަށް ފުލުހުން ވަނީ ނިންމައިފައެވެ.