ހދ. ކުރިނބީގެ އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް ޕީއެންސީގެ ޓިކެޓުގައި އިންތިޚާބުވި ތިން ކެންޑިޑޭޓުންނަށް ރައީސް ޑރ. މުހައްމަދު މުއިއްޒު މަރުހަބާ ވިދާޅުވެއްޖެއެވެ.
މި އިންތިޚާބުގައި ވާދަކުރީ ވެރިކަން ކުރާ ޕީއެންސީންނާއި އިދިކޮޅު އެމްޑީޕީން ވެސް ތިން ކެންޑިޑޭޓުންނެވެ.
އެމްޑީޕީ ކެންޑިޑޭޓުންނާ ވާދަކޮށް އިންތިޚާބު ކާމިޔާބުކުރި ޕީއެންސީގެ ކެންޑިޑޭޓުންނަކީ ފާތިމަތު ނާފިޒާ އިސްމާއީލާއި، ރާނިޔާ މުހައްމަދުގެ އިތުރުން އިނާސާ އާދަމެވެ.
މި ކަމާ ގުޅިގެން ރައީސް މުއިއްޒު އެކްސްގައި ކުރެއްވި ޕޯސްޓުގައި ވަނީ، އެ ތިން ބޭފުޅުންނަށް ވެސް މަރުހަބާ ދަންނަވައިފައެވެ.
އަދި ޕީއެންސީގެ ކެންޑިޑޭޓުނަށް މި އިންތިޚާބު ކާމިޔާބު ކުރުމަށް މަސައްކަތްކޮށްދެއްވި ފަރާތްތަކަށާއި، ވޯޓުގައި ބައިވެރިވެ ވަޑައިގަތް ހުރިހާ ރައްޔިތުންނަށް ޝުކުރު އަދާކުރައްވައިފައެވެ.
ރަށްރަށުގެ އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ މެމްބަރުކަމުގެ ގޮނޑި ހުސްވުމަކީ އަބަދުވެސް ދިމާވާ މައްސަލައެކެވެ. އެހެންވެ އަބަދުވެސް ބައި އިލެކްޝަންތައް ބާއްވައެވެ.