ހައުސިން މިނިސްޓްރީ ހިންގި އިމަރާތުގައި މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި، ބޯހިޔާވަހިކަމާއި ގެދޮރުވެރިކަމާ ގުޅުންހުރި އެއްވެސް ލިޔެކިޔުމެއް ނުގެއްލޭކަމަށް އިންފްރާންސްޓްރަކްޗާ މިނިސްޓަރު، ޑރ. އަބްދުﷲ މުއްތަލިބު ވިދާޅުވެއްޖެއެވެ.
މި ހާދިސާގެ މައުލޫމާތު ދިނުމަށް ދަރުބާރުގޭގައި އިދާރާތައް ގުޅިގެން މިއަދު ވަނީ ނޫސްވެރިންގެ ބައްދަލުވުމެއް ބާއްވަފައެވެ. މި ބައްދަލުވުމުގައި ވާހަކަ ދައްކަވަމުން މުއްތޮލިބް ވިދާޅުވީ، މި ހާދިސާގައި ގިނަ ލިޔެކިޔުންތަކެއް ގެއްލުނު ކަމަށް ބުނެ ބައެއް މީހުން މައުލޫމާތު ފަރުތާކަމަށެވެ.
"އެހެން ނަމަވެސް ދައުލަތުގެ އިދާރާތަކުގެ ޑޭޓާތައް މިހާތަނަށް އަޅުގަނޑުމެން ބެލިބެލުމުން، އަޅުގަނޑުމެން އަތުގައި ފުދޭވަރެއްގެ ގިނަ ޑޭޓާތައް އެބަ ހުއްޓޭ ސްޓޯކުރެވިފައި ބެކަޕް ހެދިފައި،" އޭނަ ވިދާޅުވިއެވެ.
މިނިސްޓްރީތަކުން ގެއްލުނީ ކޮން ލިޔެކިޔުންތަކެއްކަން ދެނެގަތުމުގެ މަސައްކަތް މިހާރު ކުރަމުން އަންނަ ކަމަށް މުއްތޮލިބް ވިދާޅުވިއެވެ.
"އޭގެ ތެރޭގައި ސީދާ ރައްޔިތުންނާ ގުޅުންހުރި މަސައްކަތްތަކަށް ބަލާއިރު ހައުސިންއާ ގުޅުންހުރި އެއްވެސް އިންފޮމޭޝަންއެއް ގެއްލިފައި ނުވާކަމަށް މިހާރު ވެސް އެބަ ހުރި ކަމަށް އަޅުގަނޑަށް ޔަގީންކުރެވޭ. އެއާއެއްކޮށް އަލަށް ލޯން އެޕްލިކޭޝަންއާ މި އެއްޗެހިތަކުގެ ތެރެއިން ވެސް އެޕްލައިކޮށްފައި ހުރި ޑޭޓާތަކާއި ފޯމުތަކާ އެއްޗެހި ގެއްލިފައި ނުވާކަން ކްލައުޑުގައި އެވައިލޭބަލްކަން އަޅުގަނޑަށް ޔަގީންކުރެވޭ،" އޭނާ ވިދާޅުވިއެވެ.
ހައުސިން މިނިސްޓްރީ ހިންގާ އިމާރާތުގައި އަލިފާން ރޯވުން: އެ ހާދިސާގައި ބޯހިޔާވަހިކަމާ ގުޅުންހުރި އެއްވެސް އެއްޗެއް ނުގެއްލޭ ކަމަށް މިއަދު މިނިސްޓަރު މުއްތަލިބު ވިދާޅުވި -- ސަން ފޮޓޯ/ މުޙައްމަދު ހަމްޒާ
މީގެ އިތުރުން އަލިފާނުގެ ހާދިސާ ހިނގި ސަރަހައްދުން ސާވާތައް ނަގައިގެން އެތަކެތީގައި ހުރި އެއްޗެހި ރިކަވާ ކުރުމުގެ މަސައްކަތް މިހާރު ކުރަމުން އަންނަ ކަމަށް މިނިސްޓަރު ވިދާޅުވިއެވެ.
މީގެ އިތުރުން އޭނާ ވިދާޅުވީ، އެންމެ ބޮޑު އިސްކަމެއް ދީގެން މަސައްކަތް ކުރަނީ ވީ އެންމެ އަވަހަކަށް މިނިސްޓްރީގެ މަސައްކަތްތައް ފެށުމަށް ކަމަށެވެ.
މި ބައްދަލުވުމުގައި ވާހަކަ ދައްކަވަމުން ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހިމް ހިލްމީ ވިދާޅުވީ، އަލިފާނުގެ ރިޕޯޓު ލިބުނީ އެދުވަހު ހެނދުނު 06:27ގައި ކަމަށެވެ. އަދި މައުލޫމާތު ލިބުމާއެކު އެއް މިނިޓުތެރޭ އަލިފާނުގެ ހާދިސާއަށް ރެސްޕޮންޑުކޮށްފައި ވާކަމަށް އޭނާ ވިދާޅުވިއެވެ.
"މީގަ އެންމެ މުހިންމު ކަމެއްގެ ގޮތުގައި އަޅުގަނޑުމެން ބެލީ އެއްވެސް މީހެއްގެ ފުރާނައަށް ގެއްލުމެއް ނެތި އަދި މި އަލިފާން ފެތުރުނަ ނުދީ ކައިރީގައި ހުރި އެއްވެސް އިމާރާތެއްގައި އަލިފާން ރޯވިޔަ ނުދީ މަސައްކަތް ކުރުން،" ހިލްމީ ވިދާޅުވިއެވެ.
އަލިފާން ރޯވި އިމާރާތުގައި ތިން މިިސްޓްރީއެއްގެ މަސައްކަތް ކުރިއަށްގެންދިޔައެވެ. އެއީ ހައުސިން މިނިސްޓްރީ، އިންފްރާންސްޓްރަކްޗާ މިނިސްޓްރީ އަދި އެންވަޔަރަމަންޓު މިނިސްޓްރީއެވެ.
މި ތިން މިނިސްޓްރީގެ މަސައްކަތް ވެސް މިހާރު ވަނީ ވަގުތީ ގޮތުން ދަރުބާރުގެއަށް ބަދަލުކޮށްފައެވެ.
މިނިސްޓަރު މުއްތަލިބް ވިދާޅުވީ، މަސައްކަތް ކުރަނީ އާދިއްތަ ދުވަހު މިިނސްޓްރީތަކުގެ ޚިދުމަތް އަލުން ދޭން ފަށަން ކަމަށެވެ.