ރައްޔިތުންގެ މަޖިލީހުގެ މިއަހަރުގެ ފަހު ދައުރު ނިންމައި، މަޖިލިސް މިއަދު ޗުއްޓީއަށް ގޮސްފިއެވެ.
މިއަދުގެ ޖަލްސާ ނިންމަވާލައްވަމުން މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ މި ދައުރުގައި 73.3 އިންސައްތަ މަސައްކަތް ނިންމާފައިވާ ކަމަށެވެ.
"އެގޮތުން މަޖިލީހަށް ހުށަހެޅިފައިވާ މަސައްކަތްތަކުގެ 73.3 އިންސައްތަ މަސައްކަތް މިދައުރުގެ ނިޔަލަށް ވަނީ ނިމިފައި،" އަބްދުއްރަހީމް ވިދާޅުވިއެވެ.
"މި ދައުރުގަ ވެސް ރައްޔިތުންގެ މަޖިލީހުން ވަނީ މުހިންމު މަސައްކަތްތަކެއް ކޮށްފަ. އެގޮތުން މިދައުރުގަ ޖުމްލަ 27 ޖަލްސާ ބޭއްވިފަވޭ. އަދި މަޖިލީހުގެ ޖަލްސާތަކުގަ ޖުމްލަ 67 ގަޑިއިރު ހޭދަވެފަވޭ. ކޮމިޓީތަކުގެ މަސައްކަތްތަކަށް ބަލާލާއިރު 165 ބައްދަލުވުން ބޭއްވިފަވޭ. ކޮމިޓީތަކުގެ ބައްދަލުވުންތަކުގަ 118 ގަޑިއިރު ހޭދަވެފަވޭ،" އަބްދުއްރަހީމް ވިދާޅުވިއެވެ.
ނިންމާފައިވާ އިތުރު މަސައްކަތްތައް:
- 20 ބިލު
- އެއް ގަރާރު
- ސަރުކާރުން ހުށަހެޅި 13 މައްސަލަ
- ރިޔާސަތުން ހުށަހެޅި ފަސް މައްސަލަ
- ހަތަރު ކުއްލި މައްސަލަ
- ވަޒީރުންނާ ކުރި 13 ސުވާލު
- އެހެނިހެން މައްސަލަތަކާ ގުޅޭ ހަތް ރިޕޯޓު
އަބްދުއްރަހީމް ވަނީ މި ދައުރުގައި މެންބަރުން ކުރެއްވި މަސައްކަތަށް ޝުކުރު އަދާކުރައްވާފައެވެ. އަދި ދެން ފެށޭ ދައުރަކީ މަޖިލީހުގައި އުފެއްދުންތެރި، ބިނާކުރެވެނިވި މަސައްކަތްތަކެއް ކުރެވޭ ދައުރަކަށް ވާނެ ކަމަށް އުއްމީދު ކުރައްވާ ކަމަށް އެމަނިކުފާނު ވިދާޅުވިއެވެ.
މި ދައުރުގައި ކުރި މަސައްކަތްތަކުގެ ތެރޭގައި، މެންބަރުން ސިޔާސީ ޕާޓީއަކުން ވަކިވެ، ނުވަތަ ސިޔާސީ ޕާޓީއެއް ބަދަލުކޮށްފިނަމަ ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ފާހަގަކުރެވެއެވެ.
އަންނަ އަހަރުގެ ފުރަތަމަ ދައުރު ފަށާނީ އަންނަ ފެބްރުއަރީ މަހުއެވެ.