ވޮޝިންޓަން (12 ޑިސެންބަރު 2024): އެމެރިކާގެ ޚާރިޖީ ވަޒީރު އެންޓަނީ ބްލިންކެން ގެ އަނިޔާވެރިކަމާއި ޖައްބާރުކަމާ އަދި ޣައްޒާގެ އާންމުންނާ ދެކޮޅަށް އިސްރާއީލު ހިންގާ ގަތުލުއާންމުތަކަށް އޭނާ ހިއްވަރު ދޭ މައްސަލައިގައި އެމެރިކާގެ އެކްޓިވިސްޓުން ކޮންގްރެސްގައި ބްލިންކެން އާ ދެކޮޅަށް އަޑުއުފުލައި އޭނާ ހައްޔަރު ކުރުމަށް ގޮވައިލައިފިއެވެ.
އެމެރިކާގެ ކޮންގްރެސްގެ ތިރި ގެ ކަމަށްވާ ހައުސް އޮފް ރެޕްރެޒެންޓެޓިވްސްގެ ޖަލްސާއެއްގައި ބްލިންކެން ބައިވެރިވެ ވަޑައިގެންނެވި ވަގުތު އިންސާނީ ހައްގުތަކާބެހޭ އެމެރިކާގެ އެކްޓިވިސްޓުން އެތަނަށް ވަދެގަނެ ބްލިންކެން އަކީ ޣައްޒާގެ ގާތިލު (ބްލިންކެން އިސް ދަ ބަޗާ އޮފް ގާޒާ) ކަމަށް ސިފަކޮށް އެވަރުގެ ނުރައްކާތެރި ގާތިލަކު އެމެރިކާގެ ކޮންގްރެސްއަށް ވަނުމަކީ އަދި އެމެރިކާ ސަރުކާރުގެ އިސް މަގާމެއްގައި ހުރުމަކީ އެމެރިކާގެ ރައްޔިތުން ލަދުގަންނަ ކަމެއްކަން ހާމަކޮށް ބްލިންކެން ހައްޔަރުކުރުމަށްވަނީ ގޮވާލާފައެވެ.
"ބްލިންކެން އިސް ދަ ބަޗާ އޮފް ގާޒާ" މިގޮތަށް ގޮވައި އަޑުގަދަކުރި އެކްޓިވިސްޓުން ތިބީ އެމީހުންގެ އަތްތަކުގައި ރަތްކުލަ ހާކައި އެމެރިކާގެ އެހީތެރިކަމާއި އެއްބާރުލުމާއެކު ޣައްޒާގެ އާންމުންނާ ދެކޮޅަށް އިސްރާއީލު ހިންގާ ގަތުލުއާންމުތައް ސިފަވާގޮތަށެވެ. މަންޒަރު ދުށްމީހުން ބުނާގޮތުން އެވަގުތު ބްލިންކެން ހުންނެވީ ވަރަށް ދެރަވެފައެވެ.
އެމެރިކާގެ އިތުރުން ޔޫރަޕްގެ ގައުމުތަކުގައާއި އެނޫން ގައުމުތަކުގައި ވެސް އިންސާނީ ހައްގުތަކަށް މަސައްކަތްކުރާ ފަރާތަތްކުން އިސްރާއީލުގެ އިސްވެރިންގެ އިތުރުން އެމެރިކާގެ ޚާރިޖީ ވަޒީރު ބްލިންކެން އާއި އެމެރިކާގެ ރައީސް ބައިޑެންފަދަ ބޭފުޅުން ސިފަކުރަމުން ގެންދަނީ ޣައްޒާގެ ގާތިލުންގެ ގޮތުގައެވެ.
އިސްރާއީލުން ޣައްޒާގެ އާންމުންނާ ދެކޮޅަށް ހިންގާ ގަތުލުއާންމުތަކަކީ އެމެރިކާގެ އެހީގައި ކުރިޔަށްގެންދާ ގަތުލުއާންމުތަކެއްކަން މުޅި ދުނިޔެއަށް ވެސް އެނގެއެވެ. ޔަހޫދީން ކޮންޓްރޯލްކުރާ ހުޅަނގުގެ މެއިންސްޓްރީމް މީޑީއާ ތަކުން މިކަން އޮއްބާލަން އުޅުނު ނަމަވެސް ކާމިޔާބު ވެފައެއް ނުވެއެވެ.
މިމައްސަލާގައި އިސްރާއީލުގެ ވެރިންނާ ދެކޮޅަށް މައްސަލަ އުފުލާފައިވާ ގޮތަށް އެމެރިކާގެ ރައީސާއި ޚާރިޖީ ވަޒީރު ފަދަ އެމެރިކާގެ އިސްވެރިންނާ ދެކޮޅަށް ވެސް ބައިނަލްއަގްވާމީ ކޯޓުތަކަށާއި އެމެރިކާއާއި ޔޫރަޕްގެ ކޯޓުތަކަށް މައްސަލަތައް ވަނީ ހުށަހަޅާފައެވެ.
މިމައްސަލަތަކާ ގުޅިގެން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި އިސްރާއީލުގެ ކުރީގެ ދިފާއީ ވަޒީރު ޔޯވް ގަލަންޓް ހައްޔަރުކުރުމުގެ އަމުރެއް ބައިނަލްއަގްވާމީ ޖިނާއީ ކޯޓުން ދާދިފަހުންވަނީ ނެރެފައެވެ. އިސްރާއީލުން ޣައްޒާގައި ހިންގަމުން ގެންދާ ގަތުލުއާންމުތަކުގައި މިހާތަނަށްވަނީ 45 ހާހަށްވުރެ ގިނަ އާންމުން ޝަހީދުކޮށްލާފައެވެ. މީގެތެރޭގައި ގިނައީ ކުޑަކުދިންނާއި އަންހެނުންނެވެ.
އެމެރިކާއަކީ އިރާގާއި އަފްޣާނިސްތާނަށް ގަދަބާރުން އަރައި އެދެގައުމުން ވެސް ދެ މިލިޔަނެއްހާ އާންމުން މަރައި އެދެގައުމުގެ ބޮޑު ބައެއް އެއްވެސް ހައްގަކާނުލައި ސުންނާފަތިކޮށްފައިވާ އަދި ބައިނަލްއަގްވާމީ ނިޒާމަށް ނުކިޔަމަންތެރިވެ ބައިނަލްއަގްވާމީ ކޯޓުތަކަށް ވެސް ބިރު ދައްކަމުން ގެންދާ ގައުމެކެވެ.
އެމެރިކާ ވަނީ ވިއެޓްނާމަށް އަރައިކުރި ހަނގުރާމައިގާ ވެސް ވިއެޓްނާމް ގެ ދެމިލިޔަނަށް ވުރެ ގިނަ މީހުން މަރާލުމުގެ ބޮޑެތި ޖަރީމާތަކެއް ހިންގާފައެވެ.
މީގެއިތުރުން އެމެރިކާ ގެންދަނީ ހަނގުރާމައިގެ ޖަރީމާ ހިންގި ކަމުގެ ކުށުގައި ހައްޔަރު ކުރުމުގެ އަމުރު ނެރެފައިވާ އިސްރާއީލުގެ ވެރިންނަށް ވެސް ހިމާޔަތް ދެމުންނެވެ. ބައިނަލްއަގްވާމީ ޖިނާއީ ކޯޓުން ހައްޔަރު ކުރުމުގެ އަމުރު ނެފައިވާ އިސްރާއީލުގެ ކުރީގެ ދިފާއީ ވަޒީރު ޔޯވް ގަލަންޓް މިދިޔަ ހަފުތާގައި އެމެރިކާއަށް ދިޔުމުން ވެސް އޭނާ ހައްޔަރުކޮށް ބައިނަލްއަގްވާމީ ކޯޓާ ހަވާލު ކުރުމުގައި އެމެރިކާ އެއްބާރުލުން ދީފައެއް ނުވެއެވެ.
އޭގެބަދަލުގައި އެމެރިކާގެ ފަރާތުން ގަލަންޓަށް ދީފައި ވަނީ ހިމާޔަތާއި ރައްކާތެރި ކަމެވެ. ނަމަވެސް އެމެރިކާ ގެންދަނީ ސޫރިޔާގެ ކުރީގެ ރައީސް ބައްޝާރުލް އަސަދަކީ ގާތިލެއްކަމަށް ބުނެ ބައްޝާރާ ދެކޮޅަށް އަޑުއުފުލަމުންނެވެ.